پاک فوج نے بھارت کو شکست فاش دی ،بلاول بھٹو کی سربراہی میں وفد نے بھارت کے بے بنیاد پروپیگنڈا کا موثر جواب دیا ،سابق وزیراعظم آزاد کشمیر

مظفرآباد (اُردو پوائنٹ اخبارتازہ ترین - اے پی پی۔ 12 جون2025ء) آزاد کشمیر کے سابق وزیراعظم چوہدری عبدالمجید نے کہا ہے کہ پاک فوج نے بھارت کو شکست فاش دی جبکہ بین الاقوامی سطح پر سابق وزیر خارجہ و چیئرمین بلاول بھٹو زرداری کی سربراہی میں بین الاقوامی سفارتکار وفد نے بھارت کے بے بنیاد پروپیگنڈا کا موثر جواب دیا ہے جس سے مسئلہ کشمیر، فلسطین اور پاکستان کے جاندار موقف کو عالمی سطح پر زبردست پذیرائی ملی ہے۔

پاک فوج نے مکار بھارت کے حملوں کا جس طرح مقابلہ کرکے اس کا غرور خاک میں ملایا اب اس شکست کو اس کی نسلیں بھی بھلا نہیں سکیں گی۔ فیلڈ مارشل جنرل سید حافظ عاصم منیر نے کشمیر ایشو پرجس جرات اور بہادری کا مظاہرہ کیا یہ ان کی کشمیریوں سے والہانہ محبت کااظہار ہے۔

(جاری ہے)

کشمیر پر دو ٹوک موقف سے مسئلہ کشمیر پوری دنیا میں فلیش پوائنٹ بن گیا ہے۔اب بھارت کشمیریوں کے حق خودارادیت کو زیادہ دیر طاقت کے بل بوتے پر دبا نہیں سکے گا۔

ان خیالات کا اظہار انہوں نے مختلف عوامی وفود سے بات چیت کرتے ہوئے کیا۔انہوں نے کہا کہ بھارت ایک مکار اور دہشت گرد ملک ہے جو خطہ میں آگ اور خون کی ہولی کھیل رہا ہے۔پاکستان جنگ میں تاریخی فتح کے باوجود امن کا داعی ہے اور سابق وزیر خارجہ بلاول بھٹو زرداری کی سربراہی میں بین الاقوامی سفارتکار وفد مختلف ممالک کے دورہ کے دوران پاک بھارت تناؤ کے بنیادی مسئلہ کشمیر پر بھرپور سفارتکاری کررہا ہے جس سے عالمی سطح پر پاکستان کے موقف کو زبردست پذیرائی مل رہی ہے۔

یہ ایک ذمہ دار اور باوقار پر امن ملک کی نشانی ہے جب کہ اس کے مقابلے میں بھارت کی بین الاقوامی دہشت گردی میں ملوث ہے۔بھارت کے اندر اقلیتوں کے حقوق محفوظ نہیں اور مقبوضہ کشمیر میں بھارت ناجائز قبضہ کرکے وہاں کشمیریوں پر ناقابل برداشت ظلم و جبر کررہا ہے۔ انہوں نے کہا کہ بھارت نے پہلگام واقعہ کی آڑ میں ریاست پر حملہ کیا اور پاکستان کی سالمیت کو چیلنج کیا جس کے جواب میں فیڈ مارشل جنرل سید عاصم منیر کی سربراہی میں مسلح افواج پاکستان نے اسے چند گھنٹوں میں ایسی دندان شکن شکست دی کہ اسے پلٹنے کا موقع نہ مل سکا۔

پاکستان نے بھارت کو جنگ میں بدترین شکست دی ہے اگر بھارت نے اپنی شکست کی خفت مٹانے کے لیے دوبارہ پاکستان کی طرف کوئی فوجی مہم جوئی کی تو پاک فوج اس کی اینٹ سے اینٹ بجا دے گی۔