Live Updates

لوکل گورنمنٹ ملازمین آج سے سندھ بھر کے بلدیاتی اداروں میں احتجاج سے احتجاجی تحریک کا آغاز کریں گے

19 جون کو کراچی پریس کلب سے اسمبلی بلڈنگ تک ریلی نکالی جائے گی۔دیگر مزدورتنظیموں سے رابطوں کا آغاز کردیا گیا

اتوار 15 جون 2025 19:20

کراچی(اُردو پوائنٹ اخبارتازہ ترین - این این آئی۔ 15 جون2025ء)آل پاکستان لوکل گورنمنٹ ورکرز فیڈریشن نے وفاق،سندھ اور کے پی کے کے بجٹ کو مزدور دشمن بجٹ قرار دیتے ہوئے اپنی تمام یونینز، یونٹس، ڈسٹرکٹس، ڈویڑنز کے ذمہ داروں کو ہدایت دیتی ہیکہ وہ بجٹ کے خلاف اپنے اپنے اداروں،پریس کلبوں پر بروز پیرمورخہ 16 جون سے احتجاج کا سلسلہ شروع کریں اور بروز جمعرات مورخہ 19 جون کو کراچی پریس کلب سے سندھ اسمبلی بلڈنگ/وزیر اعلی ہاوس تک ریلی نکالنے کی تیاری کرلیں۔

تاکہ بجٹ پاس ہونے سے پہلے اپنا بھرپور احتجاج ریکارڈ کرواسکیں۔ان خیالات کا اظہار آل پاکستان لوکل گورنمنٹ ورکرز فیڈریشن کے مرکزی چیئرمین سیدذوالفقارشاہ،مرکزی صدر ملک نوید اعوان اور مرکزی جنرل سیکریٹری ملک نصیرالدین ہمایوں نے اپنے مشترکہ بیان میں کیا۔

(جاری ہے)

انہوں نے کہا کہ تنخواہوں اور پینشن میں اضافہ اونٹ کے منہ میان زیرے کے مترادف ہے۔

چار ایڈہاک ریلیف کو بنیادی تنخواہ میں ضم نہ کیا گیا۔نہ ہی اسکیل کو ریوائز کیا گیا۔جبکہ 2004 سے ہاوس رینٹ،کنونیئس،میڈیکل الاونسنز میں موجودہ تنخواہ کی شرح سے اضافہ کیا گیا۔وفاق کی طرز پر بجٹ میں اضافے کی دعوی دار کے پی کے حکومت نے ڈسپیرٹی الاونس 30 کی بجائے 15 اور 20 فیصد دیا ہے۔اسی طرح حکومت سندھ نے پہلے ہی تین برسوں کے ڈسپیرٹی ریڈکشن الاونس سے ملازمین کو محروم رکھا ہوا تھا اب آئندہ مالی سال کے بجٹ میں ڈسپیرٹی الاونس دینے کا اعلان تک نہیں۔

ان ذیادیتوں اور ناانصافیوں کے خلاف ملک بھر کے بلدیاتی ملازمین احتجاجی تحریک شروع کررہے ہیں۔جس کا آغاز صوبہ سندھ سے پیر 16 جون سے کیا جائے گا۔جبکہ 19 جون کو صوبے بھر بلدیاتی ملازمین کراچی پریس کلب سے سندھ اسمبلی تک ریلی نکالیں گے اس سلسلے میں دیگر مزدور تنظیموں سے بھی رابطوں کا آغاز کردیا گیا ہے۔جبکہ کے پی کے ،پنجاب اور بلوچستان میں بھی تحریک شروع کی جارہی ہے۔