ٹرمپ کا ظہرانہ، فیلڈ مارشل عاصم منیر کی امریکی صدر سے ملاقات طے پاگئی

واشنگٹن ( اُردو پوائنٹ اخبارتازہ ترین۔ 18 جون 2025ء ) امریکہ کے دورے پر موجود فیلڈ مارشل عاصم منیر کی امریکی صدر ڈونلڈ ٹرمپ سے ملاقات طے پاگئی۔ تفصیلات کے مطابق امریکہ کے صدر ڈونلڈ ٹرمپ آج فیلڈ مارشل جنرل عاصم منیر کے اعزاز میں وائٹ ہاؤس میں ظہرانہ دیں گے، یہ ظہرانہ امریکی وقت کے مطابق دوپہر ایک بجے کیبنٹ روم میں منعقد کیا جائے گا، اس موقع پر فیلڈ مارشل عاصم منیر کی صدر ٹرمپ سے اہم ملاقات بھی متوقع ہے جس میں دو طرفہ تعلقات، خطے کی سکیورٹی صورتحال اور خاص طور پر ایران اسرائیل تنازعے پر تبادلہ خیال کیا جائے گا۔

بتایا گیا ہے کہ یہ ملاقات کلوزڈ پریس ہوگی یعنی صحافیوں کو اس موقع پر جانے کی اجازت نہیں ہوگی تاہم ظہرانے کے بعد فیلڈ مارشل عاصم منیر اور امریکی صدر کی میڈیا سے گفتگو کا امکان موجود ہے، ممکنہ طور پر اس ظہرانے میں امریکی نائب صدر جے ڈی وینس اور وزیر دفاع ہینکر سمیت اہم شخصیات بھی شریک ہوں گی۔

(جاری ہے)

معلوم ہوا ہے کہ فیلڈ مارشل عاصم منیر کی امریکی وزیر خارجہ اور وزیر دفاع سے الگ الگ ملاقاتیں بھی شیڈول ہیں، یہ ملاقاتیں نا صرف پاکستان اور امریکہ کے تعلقات کے حوالے سے اہم قرار دی جارہی ہیں بلکہ خطے میں بڑھتی ہوئی کشیدگی کے پسِ منظر میں انہیں غیرمعمولی اہمیت حاصل ہوچکی ہے۔

مسلح افواج کے شعبہ تعلقات عامہ ( آئی ایس پی آر ) نے بتای چیف آف آرمی سٹاف فیلڈ مارشل سید عاصم منیر، نشانہ امتیاز ملٹری، امریکہ کے سرکاری دورے پر ہیں، دورے کے دوران انہوں نے واشنگٹن ڈی سی میں اوورسیز پاکستانی کمیونٹی سے بات چیت کی، چیف آف آرمی سٹاف سے ملاقات کے لیے بڑی تعداد میں جمع ہونے والے سمندر پار پاکستانیوں کی جانب سے سید عاصم منیر کا پرتپاک استقبال کیا گیا۔

پاک فوج کے ترجمان ادارے کا کہنا ہے کہ تارکین وطن نے آپریشن بنیان مرصوص/ مارکہ حق کے دوران مسلح افواج کی شاندار کارکردگی کو سراہتے ہوئے ان کی بہادری اور پیشہ ورانہ مہارت کے مظاہرے کو کراج تحسین پیش کیا، بات چیت کے دوران آرمی چیف نے بیرون ملک مقیم پاکستانیوں کی جانب سے پاکستان کے سفیر ہونے کے لیے ادا کیے جانے والے اہم کردار کے لیے پاکستانی کمیونٹی کی تعریف کی۔

آئی ایس پی آر نے بتایا کہ فیلڈ مارشل نے ترسیلات زر، سرمایہ کاری اور دیگر شعبوں میں اعلیٰ کامیابیوں کے ذریعے فعال کردار ادا کرکے پاکستان کی معیشت اور عالمی شہرت میں ان کی شراکت کا اعتراف کیا، اس موقع پر سمندر پار پاکستانیوں نے آرمی چیف کے ساتھ اپنے تجربات اور تجاویز شیئر کیں، انہوں نے مشترکہ چیلنجز سے نمٹنے اور تعاون کو فروغ دینے کے لیے مسلسل تعاون اور تعاون کی ضرورت کو اجاگر کرتے ہوئے سمندر پار پاکستانیوں کے ساتھ روابط کی اہمیت پر زور دیا، بات چیت کا اختتام اس مقصد اور عزم کی تجدید کے ساتھ ہوا جس کے تحت آرمی چیف اور سمندر پار پاکستانیوں نے ایک زیادہ محفوظ اور خوشحال پاکستان کے لیے مل کر کام کرنے کا عہد کیا۔