سیاست چمکانے والوں کی کارکردگی صفر، پاکستان مسلم لیگ ن کی حکومت نے ہر دور میں عوامی مفادات کا تحفظ کیا،وفاقی وزیر انجنیئرامیرمقام

پشاور (اُردو پوائنٹ اخبارتازہ ترین - اے پی پی۔ 21 جون2025ء) وفاقی وزیر برائے امور کشمیر، گلگت بلتستان و سیفران انجینئر امیر مقام نے کہا ہے کہ ہم نے ہمیشہ سیاست کو خدمت کا ذریعہ بنایا، عوام کے مفادات کو مقدم رکھا اور ہر موقع پر عوام کے حقوق کیلئے آواز بلند کی، بعض لوگ آج سیلز ٹیکس کے نام پر سیاست چمکا رہے ہیں حالانکہ جب قوم کو مشکل میں چھوڑا گیا تھا تو یہ لوگ ایوانوں سے غائب تھے، ہم نے میدان میں رہ کر عوام کے لیے کام کیا، قربانیاں دیں اور مشکل فیصلوں کا سامنا کیا۔

سوات میں بار ایسوسی ایشن سے خطاب کرتے ہوئے انجینئر امیر مقام نے کہا کہ وکلا برادری نے ہر دور میں آئین و قانون کی سربلندی کے لیے جدوجہد کی ہے، بار اور بنچ کا تعلق صرف پیشہ ورانہ نہیں بلکہ قومی ذمہ داری کا رشتہ ہے، جب بار مضبوط ہوتا ہے تو معاشرے میں انصاف پنپتا ہے۔

(جاری ہے)

انجینئر امیر مقام نے کہا کہ 2016 میں جب ملاکنڈ ڈویژن پر کسٹم ایکٹ نافذ کیا گیا تو وہ پہلے شخص تھے جنہوں نے اس کی شدید مخالفت کی اور میں نے جب وزیراعظم کو عوامی تحفظات سے آگاہ کیاتوبعد میں یہ فیصلہ واپس لیا گیا تھا۔

2018 میں فاٹا انضمام کے بعد جب نیا ٹیکس نظام نافذ کرنے کی کوشش کی گئی تو ہم نے ملاکنڈ ڈویژن کو اس سے مستثنیٰ قرار دلوایا۔ عوامی خواہشات کا احترام کرتے ہوئے 2023 تک ٹیکس کا اطلاق مؤخر ہوا اور بعد ازاں مزید ایک سال کی توسیع کے ساتھ 2025 تک نرمی حاصل کی گئی۔ان کا کہنا تھا کہ اس وقت صرف مخصوص اشیاء پر محدود سیلز ٹیکس نافذ ہے، نہ کوئی کسٹم ڈیوٹی ہے نہ انکم ٹیکس کا اطلاق۔

بعض عناصر اپنے سیاسی وجود کی بقا کے لیے اس پر عوام کو گمراہ کر رہے ہیں جبکہ حقیقت یہ ہے کہ یہ معاملہ بھی صنعتکاروں اور تاجروں کی مشاورت سے طے ہوا ہے۔ ہم نے تصادم نہیں بلکہ تدبر اور فہم کے ساتھ راستہ نکالا۔انجینئر امیر مقام نے پاکستان تحریک انصاف کی سابقہ حکومت پر تنقید کرتے ہوئے کہا کہ پی ٹی آئی نے خیبرپختونخوا، خصوصاً سوات کے ساتھ مجرمانہ غفلت کا مظاہرہ کیا۔

مراد سعید نے جان بوجھ کر سوات کے ترقیاتی منصوبے بند کیے، موٹروے منصوبہ ہو یا دیگر سکیمیں، سب کچھ روک دیا گیا۔ انہوں نے کہا کہ میرے خلاف جھوٹے مقدمات بنائے گئے، عدالتوں میں پیش کیا گیا، مگر میں نے ہر الزام کا سامنا کیا اور خود کو سرخرو ثابت کیا۔انہوں نے کہا کہ بانی پی ٹی آئی نے جھوٹے بیانیے کے ذریعے قوم کو گمراہ کیا لیکن اب عوام باشعور ہو چکے ہیں۔

اب بات بیانیے کی نہیں، کارکردگی کی ہے۔ قوم جان چکی ہے کہ کون خدمت کر رہا ہے اور کون صرف فریب بیچ رہا ہے۔وفاقی وزیر انجینئر امیر مقام نے افواج پاکستان کو خراج تحسین پیش کرتے ہوئے کہا کہ ہماری فوج نے ہر محاذ پر ملک کا وقار بلند کیا، بھارت کو شکست دی، سبز پاسپورٹ کو عزت ملی۔ ہم کشمیری عوام، فلسطینیوں اور ایرانی بھائیوں کے ساتھ کھڑے ہیں اور عالمی سطح پر جاری ظلم و بربریت کی بھرپور مذمت کرتے ہیں۔

انہوں نے کہا کہ امت مسلمہ کو چاہیے کہ مظلوموں کے حق میں ایک ہو کر آواز بلند کرے۔اس موقع پر انجینئر امیر مقام نے سوات ڈسٹرکٹ بار ایسوسی ایشن کے صدر محمد مشتاق خان ایڈووکیٹ کو 25 لاکھ روپے کی گرانٹ کا چیک بھی دیا، جس پر وکلا برادری نے ان کا شکریہ ادا کیا۔تقریب میں مسلم لیگ ن لوئر سوات کے صدر قوی خان ایڈووکیٹ، صوبائی ڈپٹی سیکرٹری فضل رحمان نونو، سوات ڈسٹرکٹ بار ایسوسی ایشن کے نائب صدر محمد الیاس خان، جنرل سیکرٹری محمد قیوم مشوانی، جوائنٹ سیکرٹری محمد اویس شاہین، فنانس سیکرٹری بابر نعیم، پشاور ہائی کورٹ بار ایسوسی ایشن کے جنرل سیکرٹری اشفاق داؤدزئی اور پشاور ہائی کورٹ بار منگورہ بنچ کے نائب صدر محمد ارشاد خان اور سابقہ صوبائی امیدوار ارشاد خان بھی موجود تھے۔

تمام رہنماؤں نے انجینئر امیر مقام کی قیادت پر مکمل اعتماد کا اظہار کرتے ہوئے کہا کہ مسلم لیگ ن ہی وہ جماعت ہے جو حقیقی معنوں میں عوامی مسائل کی نمائندگی کرتی ہے۔خطاب کے اختتام پر انجینئر امیر مقام نے کہا کہ ہم سیاسی استحکام، ترقی، امن اور خوشحالی چاہتے ہیں۔ ہم جھوٹ، فریب اور افواہوں کی سیاست پر یقین نہیں رکھتے بلکہ خدمت، سنجیدگی اور عملی اقدامات کے قائل ہیں۔