Live Updates

وزیراعظم شہباز شریف سے ایرانی سفیر کی اہم ملاقات، خطے میں امن واستحکام اور جغرافیائی صورتحال پر تبادلہ خیال

ایرانی سفیر نے ایران اسرائیل امریکہ تنازع پر وزیراعظم کو بریفنگ دی اور ایران کے مؤقف سے آگاہ کیا، دونوں رہنماؤں کے درمیان ملاقات میں ایران اور اسرائیل کے درمیان کشیدگی ودیگر امور پر تفصیلی تبادلہ خیال کیا گیا

فیصل علوی پیر 23 جون 2025 13:00

وزیراعظم شہباز شریف سے ایرانی سفیر کی اہم ملاقات، خطے میں امن واستحکام ..

اسلام آباد(اردوپوائنٹ اخبار تازہ ترین۔23جون 2025)وزیراعظم شہباز شریف سے ایرانی سفیر نے اہم ملاقات کی جس میں خطے میں امن واستحکام اور جغرافیائی صورتحال پر تبادلہ خیال کیا گیا،ایران میں پاکستان میں متعین سفیر رضا امیر مقدم وزیراعظم ہاؤس پہنچے تو ان کا پرتپاک خیر مقدم کیا گیا،دونوں رہنماؤں کے درمیان وزیراعظم ہاؤس میں ہونے والی ملاقات میں ایران اور اسرائیل کے درمیان کشیدگی، خطے میں امن و استحکام، اور تازہ جغرافیائی و سیاسی صورتحال پر تفصیلی تبادلہ خیال کیا گیا۔

ذرائع کے مطابق ایرانی سفیر نے ایران اسرائیل امریکہ تنازع پر وزیراعظم کو بریفنگ دی اور ایران کے مؤقف سے آگاہ کیا، جبکہ وزیراعظم نے پاکستان کے امن و استحکام اور سفارتی حل کے اصولی مؤقف کو دہرایا۔

(جاری ہے)

یاد رہے کہ اس سے قبل پاکستان نے ایران کی جوہری تنصیبات پر امریکہ کے حملوں کی مذمت کی تھی۔ پاکستان نے خطے میں کشیدگی میں ممکنہ اضافے پر شدید تشویش کا اظہار کیا تھا۔

دفتر خارجہ سے جاری بیان میں پاکستان نے ایک بار پھر اس مؤقف کا اعادہ کیا تھا کہ یہ حملے بین الاقوامی قانون کے تمام اصولوں کی خلاف ورزی تھے اور ایران کو اقوام متحدہ کے چارٹر کے تحت اپنے دفاع کا مکمل حق حاصل تھا۔پاکستان نے شہری جان و مال کے احترام اور فوری طور پر اس تنازع کو ختم کرنے کی ضرورت پر زور دیا تھا۔دفتر خارجہ کے بیان میں تمام فریقین سے مطالبہ کیا گیا تھا کہ وہ بین الاقوامی قانون، خصوصاً بین الاقوامی انسانی قانون کی مکمل پاسداری کریں۔

پاکستان نے کہا تھا کہ ایران کے خلاف جاری جارحیت کے نتیجے میں کشیدگی اور تشدد میں غیرمعمولی اضافہ نہایت تشویشناک تھی۔ اگر کشیدگی میں مزید اضافہ ہوا تو اس کے اثرات خطے اور اس سے باہر بھی نہایت سنگین ہوں گے۔بعدازاں سلامتی کونسل میں پاکستانی مندوب عاصم افتخار نے ایران کی جوہری تنصیبات پر حملے کی مذمت کرتے ہوئے کہا تھا کہ پاکستان فوری اور غیرمشروط جنگ بندی کا مطالبہ کرتا تھا۔

سلامتی کونسل کے اجلاس سے خطاب کرتے ہوئے ان کاکہناتھا کہ امریکی حملوں سے خطے میں کشیدگی مزید بڑھیگی، ایران کی جوہری تنصیبات پر حملے یو این قراردادوں کی خلاف ورزی ہے، سلامتی کونسل کشیدگی کم کرنے کیلئے فوری اقدامات کئے جائیں۔پاکستانی مندوب کا کہنا تھا کہ تنازع کے پرامن حل کیلئے سفارتکاری کو موقع دیا جائے۔ ایران کے حق دفاع کی بھرپور حمایت کرتے تھے۔