آزادجموں وکشمیر قانون ساز اسمبلی کا اجلاس، متعدد قراردادیں متفقہ طور پر منظور

مظفر آباد (اُردو پوائنٹ اخبارتازہ ترین - اے پی پی۔ 24 جون2025ء) آزادجموں وکشمیر قانون ساز اسمبلی کا اجلاس منگل کو سپیکر چوہدری لطیف اکبرکی زیر صدارت منعقد ہوا۔ اجلاس کے آغاز میں وزیر اوقاف احمد رضا قادری نے وزیربحالیات جاوید اقبال بڈھانوی کے بھائی چوہدری عبدالکریم کی وفات پر ایوان میں فاتحہ خوانی کروائی۔ ایوان نے مسلم لیگ ن کے صدر شاہ غلام قادر، وزراء حکومت سردارجاوید ایوب، چوہدری قاسم مجید، سردارعامر الطاف کی جانب سے پیش کردہ قراردادیں متفقہ طورپر منظورکرلیں۔

صدرمسلم لیگ ن آزادجموں وکشمیر کی جانب پیش کردہ قرارداد میں کہاگیاکہ قانون ساز اسمبلی آزاد جموں و کشمیر کا یہ اجلاس اسلامی جمہوریہ ایران پر اسرائیلی جارحیت کی شدید الفاظ میں مذمت کرتا ہے۔

(جاری ہے)

اس وقت تک اسرائیل 60 ہزار سے زائد فلسطینیوں کو بھی شہید کر چکا ہے۔ یہ ایوان اقوام متحدہ اور عالمی برادری سے مطالبہ کرتا ہے کہ وہ فلسطین میں اسرائیلی جارحیت کا نوٹس لیں ۔

یہ ایوان اسرائیل اور ایران کے درمیان جنگ بندی کی بھر پور حمایت کرتا ہے ۔ یہ ایوان امت مسلمہ بالخصوص ’’او آئی سی ‘‘ کو ایران کی بھر پور حمایت کرنے پر خراج تحسین پیش کرتا ہے۔ وزراء حکومت سردارجاوید ایوب اور چوہدری قاسم مجید کی جانب سے پیش کردہ قرارداد میں کہاگیاکہ پاک بھارت جھڑپوں کے دوران پاکستان کے اصولی موقف کے ساتھ افواج پاکستان کی عالمی سطح پر بہترین ترجمانی اور فیلڈ مارشل سید عاصم منیر کی قیادت میں حاصل ہونے والی تاریخ ساز فتح مبین کے بعد دنیا بھر میں چیئر مین بلاول بھٹو زرداری نے جس طرح سفیر پاکستان اور محافظ کشمیر کا کردار ادا کرتے ہوئے سفارتی کامیابیاں حاصل کیں اس پر یہ ایوان انہیں خراج تحسین پیش کرتا ہے۔

ایوان افواج پاکستان کے آفیسران اور جوانوں کی حب الوطنی، قوت ایمانی، شوق شہادت کو خراج تحسین اور شہداء کو خراج عقیدت پیش کرتا ہے۔ نیز اہل کشمیر کی جانب سے شہید ذوالفقار علی بھٹو، محترمہ بے نظیر بھٹو کی دفاع وطن کے لئے پیش بندی پر انہیں سلام عقیدت پیش کرتا ہے اور بھارتی وزیر اعظم نریند مودی ، ان کی بنیاد پرست قیادت اور میڈیا کی جانب سے تسلسل کے ساتھ وطن عزیز پاکستان اور ریاست جموں و کشمیر کے خلاف ہرزہ سرائی کی پر زور مذمت کرتا ہے اور ایک بار پھر افواج پاکستان اور قومی سلامتی کے اداروں کو اپنے غیر مشروط تعاون کا یقین دلاتا ہے۔

وزیربرائے ٹیوٹا سردارعامر الطاف کی جانب سے پیش کردہ قرارداد میں کہاگیاکہ قانون ساز اسمبلی آزاد جموں و کشمیر کا یہ اجلاس ایران کی جوہری تنصیبات پر حملے کی شدید مذمت کرتا ہے اور اس حملے میں شہید ہونے والے ایرانی بھائیوں کی شہادت کو سلام پیش کرتا ہے اور عالمی رہنماؤں اور دنیا سے یہ مطالبہ کرتا ہے کہ اس جنگ کو رکوانے میں اپنا کردار ادا کرے۔

ایوان کی رائے میں اسرائیل فلسطینیوں کی نسل کشی کر رہا ہے۔ اسرائیل کے توسیع پسندانہ عزائم کی وجہ سے دنیا تیسری عالمی جنگ کے دہانے پر پہنچ چکی ہے۔یہ ایوان فلسطین، غزہ اور ایران کے بھائیوں کے ساتھ مکمل یکجہتی کا اظہار کرتا ہے اور ’’او آئی سی ‘‘ سے مطالبہ کرتا ہے کہ وہ اسرائیلی جارحیت کو رکوانے کے لیے اپنا بھر پور کردار ادا کرے۔ یہ ایوان اسرائیل اور ایران کے درمیان جنگ بندی کی بھر پور حمایت کرتا ہے اور یہ ایوان تمام اسلامی ممالک جنہوں نے جنگ کے دوران ایران کی سفارتی و اخلاقی حمایت کی، کو بھر پور خراج تحسین پیش کرتا ہے ۔ سپیکر چوہدری لطیف اکبر نے آزادجموں وکشمیر قانون ساز اسمبلی کا اجلاس 26 جون بروز جمعرات دن 02 بجے تک ملتوی کردیا۔