آپریشن معرکہ حق اور14اگست کی تقریبات کی تیاری کیلئے اعلیٰ سطحی کمیٹی قائم

وفاقی وزیر احسن اقبال کی سربراہی میں 14رکنی کمیٹی قائم ، پاک فوج کے محکمہ تعلقات عامہ اور جنرل ہیڈکوارٹرز سے ڈی جی پی ایس اینڈ پی ایم بھی کمیٹی کا حصہ ہوں گے،کمیٹی کو 10 روز میں وزیراعظم شہباز شریف کو تقریبات کامکمل پلان پیش کرنے کی ہدایات

فیصل علوی ہفتہ 5 جولائی 2025 12:22

آپریشن معرکہ حق اور14اگست کی تقریبات کی تیاری کیلئے اعلیٰ سطحی کمیٹی ..

اسلام آباد(اردوپوائنٹ اخبار تازہ ترین۔05جولائی 2025)وزیراعظم شہباز شریف کی ہدایات پر معرکہ حق اور 14اگست کی تقریبات کی تیاری کیلئے اعلیٰ سطحی کمیٹی قائم کر دی گئی،وزیراعظم کے دفتر سے جاری اعلامیے کے مطابق وفاقی وزیر احسن اقبال کی سربراہی میں 14رکنی کمیٹی قائم کی گئی ہے، کمیٹی کے دیگراراکین میں وفاقی وزراء محسن نقوی،عطا تارڑ، رانا ثناء اللہ،وفاقی وزیر ڈاکٹر خالد مقبول، وزیر ثقافت حذیفہ رحمان اور دیگر اراکین شامل ہیں۔

معاون خصوصی حذیفہ رحمٰن کمیٹی میں اہم کردار ادا کریں گے۔ حذیفہ رحمٰن قومی تقریبات کیلئے فکری وثقافتی حکمت عملی مرتب کریں گے۔پاک فوج کے محکمہ تعلقات عامہ (آئی ایس پی آر) اور جنرل ہیڈکوارٹرز (جی ایچ کیو) سے ڈی جی پی ایس اینڈ پی ایم بھی کمیٹی کا حصہ ہوں گے۔

(جاری ہے)

کمیٹی میں وفاقی اور صوبائی سیکریٹریز، چاروں صوبوں اور گلگت بلتستان اور آزاد کشمیر کے چیف سیکریٹریز بھی رکن ہوں گے۔

وزارت ثقافت کی زیرنگرانی یوم آزادی کی تقریبات کو نیارنگ دیاجائے گا۔ 13 اور 14 اگست کو ملک بھرمیں خصوصی تقریبات منعقد ہوں گی اور منفرد پروگرام تشکیل دئیے جائیں گے۔وزیراعظم کی ہدایت پر قائم کردہ کمیٹی کو 10 روز میں وزیراعظم شہباز شریف کو تقریبات کامکمل پلان پیش کرنے کی ہدایات کی گئیں ہے۔کمیٹی ملک بھر میں چودہ اگست اورمعرکہ حق کی تقریبات کیلئے لائحہ عمل تیار کریگی اورتمام پروگرامز کی مکمل نگرانی کریگی۔

اعلیٰ سطح کی کمیٹی جشن آزادی کے حوالے سے قومی اور علاقائی تقریبات، سیکیورٹی اور میڈیا مہمات کی نگرانی کرے گی اور تقریبات کا موضوع“معرکہ حق”اور“عملی یک جہتی”قرار دیا گیا۔کمیٹی کو یہ ہدایات دی گئی ہیں کہ ملک بھر میں منعقدہ تقریبات میں سیکیورٹی، ہنگامی تیاری اور پروٹوکول کا مکمل خیال رکھا جائے گا۔ میڈیا مہم، ثقافتی پریڈز، قومی مقابلوں اور عوامی سرگرمیوں کا جامع پلان ترتیب دیا جائے گا۔اس کے علاوہ ٹی او آرز میں کمیٹی کو یوم آزادی سے قبل تقاریب کا جامع شیڈول تشکیل دینے کی ہدایت کی گئی ہے اور تمام تقریبات قومی و ثقافتی شناخت کی آئینہ دار ہوں گی اور وفاق بھر میں عوامی شمولیت یقینی بنانے کیلئے خصوصی اقدامات کئے جائیں گے۔