ایران کے سفیر ڈاکٹر رضا امیری مقدم کا گورنر کے پی کے فیصل کریم کنڈی کے اعزاز میں عشائیہ

اسلام آباد (اُردو پوائنٹ اخبارتازہ ترین - اے پی پی۔ 11 جولائی2025ء) اسلامی جمہوریہ ایران کے سفیر ڈاکٹر رضا امیری مقدم نے گورنر خیبرپختونخوا فیصل کریم کنڈی کے اعزاز میں عشائیہ دیا ،دونوں رہنماؤں نے پاک ایران مثالی دوستی ، دونوں ممالک میں حکومتی اور عوامی سطح پر پائی جانے والے مذہبی عقیدت و احترام اور مستقبل میں تجارت سمیت دونوں ریاستوں کی ترقی و خوشحالی کے لئے ممکنہ اقدامات و تجاویز پر تبادلہ خیال کیا۔

یہاں جاری پریس ریلیز کے مطابق عشائیہ کی تقریب میں پبلک اکاؤنٹس کمیٹی کے سابق چیئرمین اور پیپلز پارٹی کے مرکزی سیکرٹری اطلاعات ندیم افضل چن بھی انکے ہمراہ تھے۔اس موقع پر دونوں راہنماؤں نے پاک ایران مثالی دوستی ، دونوں ممالک میں حکومتی اور عوامی سطح پر پائی جانے والی مذہبی عقیدت و احترام اور مستقبل میں تجارت سمیت دونوں ریاستوں کی ترقی و خوشحالی کے لئے ممکنہ اقدامات و تجاویز پر تبادلہ خیال کیا۔

(جاری ہے)

گورنر خیبرپختونخوا فیصل کریم کنڈی نے کہا کہ پاک- بھارت جنگ میں ایران نے پاکستان کا بھرپور ساتھ دیکر ایک بار پھر دونوں ممالک کے مابین مثالی دوستی کو دنیا پر واضح کردیا ہے۔انہوں نے کہا کہ زائرین کی بڑی تعداد پاکستان اور بالخصوص ڈیرہ اسماعیل خان سے ایران اور عراق جاتی ہے انہیں پاکستانی سرحد پر بلوچستان میں درپیش مسائل کے حل کے حوالہ سے وزیر داخلہ محسن رضا نقوی نے مجھے بھرپور تعاون کی یقین دہانی کرائی ہے اور میری یہ گزارش ہے کہ ایرانی حکومت بھی ان زائرین کے مسائل کے حل میں خصوصی توجہ مبذول کرے۔

انہوں نے کرم متاثرین کو امداد کی فراہمی کے حوالہ سے ہلال احمر کی خدمات اور وہاں قیام امن کے لیئے افواج پاکستان کی جانب سے جاری کوششوں کو بھی سراہا۔انہوں نے خیبر پختونخوا کے امن کے حوالہ سے ایرانی سفیر کو بتایا کہ حکومت پاکستان وفاقی سطح پر قیام امن میں سنجیدہ ہے اور سکیورٹی فورسز انٹیلی جنس بیسڈ آپریشن کررہی ہیں ،بعد ازاں ایرانی سفیر نے دعوت عشائیہ قبول کرنے پر گورنر خیبر پختونخوا کا شکریہ ادا کیا۔

انہوں نے کہا کہ حالیہ جنگ میں پاکستان نے ایران کا ساتھ دے کر ملی اتحاد اور اسلامی بھائی چارے کا ثبوت دیا، ایران پاکستان تمدن ، مذہب اور محبت کے نہ ٹوٹنے والے رشتہ سے جڑے ہیں زائرین کی ہرممکن خدمت کرکے اللہ کی رضا کا حصول ایران کی ترجیح ہے تاہم اس معاملہ میں عراق بھی جڑا ہوا ہے۔ پاکستان ، ایران اور عراق کے وزرائے داخلہ کا مشہد میں مشترکہ اجلاس منعقد ہورہا ہے جس میں اربعین اور دیگر مواقع پر جانے والے زائرین کے مسائل کا ہرممکن حل نکالا جائے گا۔

انہوں نے کہا کہ پاکستانی زائرین کی جانب سے اپنی بسیں لے جانے سے ایک بڑی مشکل کافی حد تک کم ہوئی ہے،دونوں ممالک میں کاروبار کے فروغ کا وسیع میدان موجود ہے جس پر سنجیدگی سے توجہ دینا ہوگی ، ملاقات میں دونوں ممالک کے درمیان وفود کے تبادلہ کے حوالہ سے تجاویز پر بھی تبادلہ خیال کیا گیا۔پارٹی کے مرکزی سیکرٹری اطلاعات ندیم افضل چن کی جانب سے طلبہ ، علماء اور میڈیا کے حوالہ سے وفود کے تبادلہ کی تجویز کو انہوں نے امن کے فروغ ، یک جہتی کی تقویت کے لیئے ضروری قرار دیا ۔

انہوں نے کہا کہ پاکستان پیپلز پارٹی کے ساتھ ایران کے دیرینہ تعلقات ہیں ان شاء اللہ دونوں ممالک مستقبل میں دفاعی ، تجارتی اور حکومتی سطح پر مزید قریب آئیں گے جس کے ثمرات سے پورا خطہ اور بالخصوص دونوں ممالک کے باشندے مستفید ہونگے۔ اس موقع پر گورنر خیبر پختونخوا فیصل کریم کنڈی نے ایرانی سفیر کو گلدستہ پیش کیا جبکہ ایرانی سفیر نے گورنر خیبر پختونخوا کو یادگاری شیلڈ پیش کی۔ڈیرہ اسماعیل خان کی معروف سیاسی سماجی شخصیات ، انجمن متولیان و سالاران کے راہنماء سید نجم الحسن شاہ المعروف گلا شاہ بھی اس موقع پر انکے ہمراہ تھے۔