ملکی سیاست میں نئے باب کا آغاز ، ذوالفقار علی بھٹو جونیئر کا نئی سیاسی جماعت بنانے کا اعلان

پیپلز پارٹی زرداری گروپ، آصف زرداری نے جیے بھٹو کا نعرہ کرپشن کو فروغ دینے کے لیے لگایا روٹی کپڑا اور مکان کے بعد اب بجلی،گیس اور پانی کی بھی عوام کو ضرورت ہے‘ لاہور میں پریس کانفرنس

ہفتہ 12 جولائی 2025 20:30

لاہور (اُردو پوائنٹ اخبارتازہ ترین - این این آئی۔ 12 جولائی2025ء) سابق وزیراعظم اور پاکستان پیپلز پارٹی کے بانی ذوالفقار علی بھٹو کے پوتے ذوالفقار علی بھٹو جونیئر نے ملکی سیاست میں نئے باب کا آغاز کرتے ہوئے اپنی سیاسی جماعت کے قیام کا اعلان کردیا اور کہا کہ آصف علی زرداری نے جیے بھٹو کا نعرہ کرپشن کو فروغ دینے کے لیے لگایا، روٹی کپڑا اور مکان کے بعد اب بجلی،گیس اور پانی کی بھی عوام کو ضرورت ہے۔

اس امر کا اظہار انہوں نے لاہور پریس کلب میں حقوقِ خلق پارٹی کے رہنمائوں کے ساتھ کسانوں کی زمینوں سے جبری بے دخلی کے خلاف پریس کانفرنس کرتے ہوئے کیا ۔ذوالفقار علی بھٹو جونیئر نے کہا کہ آصف علی زرداری نے جیے بھٹو کا نعرہ کرپشن کو فروغ دینے کے لیے لگایا۔ کارپوریٹ فارمنگ کسانوں کی زمینوں پر قبضہ کرنے کا منصوبہ ہے۔

(جاری ہے)

پیپلز پارٹی زرداری گروپ، مسلم لیگ (ق) اور دیگر جماعتیں آج کہاں ہے جو کسانوں کی بات کرتی تھیں۔

انہوں نے کہا کہ پنجاب کے محنت کش کسان ملک کی معیشت کی ریڑھ کی ہڈی ہیں۔کسانوں کی زمین کو چھیننا ناانصافی ہے ۔انہوں نے دعویٰ کیا کہ کارپوریٹ فارمنگ کے نام پر زمینوں پر قبضے کی کوششیں کی جا رہی ہیں، جس کا مقصد کسانوں کا استحصال ہے۔ذوالفقار علی بھٹو جونیئر کا کہنا تھا کہ اگر ہمارے سندھ کے کسان بھی پنجاب کی طرح آواز اٹھائیں گے تو ہم اسلام آباد کی طرف لانگ مارچ کا اعلان کریں گے۔

انہوں نے کہا کہ جلد ایک سیاسی جماعت بنانے جا رہا ہوں۔ عوامی فلاح کے نعرے روٹی، کپڑا اور مکان کی آج بھی اہمیت ہے، تاہم بدلتے وقت کے تقاضے مزید بنیادی ضروریات، جیسے بجلی، گیس اور پانی کو بھی شامل کرنے کے متقاضی ہیں۔ ان کی جماعت کا نیا نعرہ جیے عوام ہوگا۔انہوں نے پیپلز پارٹی پر تنقید کرتے ہوئے کہاکہ زرداری گروپ نے جئے بھٹو جیسے تاریخی نعرے کو کرپشن کی علامت بنا دیا ہے۔