Live Updates

بلوچستان میں خون خرابے کے پیچھے بھارت ہی: وزیراعظم آزاد کشمیر

بھارت اپنی حرکتوں سے باز نہ آیا تو اسے مزید ہزیمت کا سامنا کرنا پڑے گا‘نجی ٹی وی سے گفتگو

اتوار 13 جولائی 2025 11:20

مظفرآباد(اُردو پوائنٹ اخبارتازہ ترین - این این آئی۔ 13 جولائی2025ء)وزیر اعظم آزاد کشمیر چوہدری انوارالحق نے کہا ہے کہ بلوچستان میں خون خرابے کے پیچھے بھارت ہے، بھارت اپنی حرکتوں سے باز نہ آیا تو اسے مزید ہزیمت کا سامنا کرنا پڑے گا۔نجی ٹی وی سے گفتگو کرتے ہوئے انہوں نے کہا کہ حالیہ جنگ میں بھارت کو ہر محاذ پر رسوائی کا سامنا کرنا پڑا، پاکستان ایئر فورس کی برتری کا مشاہدہ پوری دنیا نے دیکھا، فیلڈ مارشل کی قیادت میں پاکستان نے تاریخی کامیابی حاصل کی۔

چوہدری انوارالحق کا کہنا ہے کہ آزاد کشمیر کی سیاست میں ہلچل جمہوری عمل کا حصہ ہے، حکومت کی تبدیلی نمبرز کے ذریعے آتی ہے، آزاد کشمیر اسمبلی میں کسی جماعت کے پاس نمبر پورے نہیں ہیں، کوئی بھی جماعت نمبرز پورے کر کے عدم اعتماد لاتی ہے تو اقتدار سے الگ ہو جاؤں گا۔

(جاری ہے)

وزیر اعظم آزاد کشمیر نے کہا کہ دسمبر سے پہلے فارورڈ بلاک میں شامل سارے دوست فیصلہ کریں گے کیا کرنا ہے، انتخابات سے قبل چیف الیکشن کمشنر کی تعیناتی پر مشاورت جاری ہے، حکومت شفاف انتخابات کو یقینی بنانے کے لیے ہر اقدام کرے گی، آزاد کشمیر میں احتساب بیورو مکمل طور پر فعال نہیں ہو سکا۔

ان کا کہنا ہے کہ ہماری حکومت میں ایک بھی وزیر کے لیے نئی گاڑی نہیں خریدی گئی، ہم نے 3 روپے بجلی اور 2 ہزار روپے من آٹے کا خسارہ بھی پورا کیا، آزاد کشمیر میں مالی ضابطگی کی مثال قائم کی ہے، میرا ٹارگیٹ تھا عوام کا جمہوری عمل پر اعتماد بحال ہو۔چوہدری انوارالحق نے کہا کہ آڈٹ رپورٹ میں ریکارڈ سامنے آنے کا مطلب خرد برد نہیں، آزاد کشمیر سیکریٹریٹ پچھلے سال اور اس سال بھی 50 فیصد بجٹ سرنڈر کر چکا ہے، ہم نے ہیلتھ کارڈ بھی دے رہے ہیں سوشل پروٹیکسن فنڈ بھی قائم کیا ہے۔

انہوں نے کہا کہ 13 جولائی یوم شہدائے کشمیر تحریک آزادی کشمیر کی بنیاد ہے، کشمیریوں کی اخلاقی، سفارتی اور سیاسی حمایت پاکستان کا کام ہے، بھارت کے ناجائز قبضے کے خلاف مسلح جدوجہد کشمیریوں کا حق ہے۔وزیر اعظم آزاد کشمیر کا کہنا ہے کہ 22 لوگ اذان دیتے دیتے سرینگر میں جام شہادت نوش کر گئے، کشمیریوں کے جذبہ آزادی کو بھارت نہیں دبا سکتا۔