مضبوط اور مستحکم پاکستان ہی کشمیریوں کی آزادی کاحقیقی ضامن ہو سکتا ہے،بیرسٹر سلطان محمود چوہدری

جمعہ 18 جولائی 2025 20:20

مظفرآباد (اُردو پوائنٹ اخبارتازہ ترین - اے پی پی۔ 18 جولائی2025ء) صدرآزادجموں وکشمیر بیرسٹر سلطان محمود چوہدری نے کہا ہے کہ مضبوط اور مستحکم پاکستان ہی کشمیریوں کی آزادی کاحقیقی ضامن ہو سکتا ہے۔ مجھے یہ اعزاز حاصل ہے کہ میرے والد قائد ملت چوہدری نور حسین غازی ملت سردار محمد ابراہیم خان کی سرینگر میں رہائش گاہ پر پیش کی جانے والی اس قرارداد الحاق پاکستان میں سب سے کم عمر ترین کشمیری لیڈر تھے جنہوں نے الحاق پاکستان کی قرارداد پر دستخط کیے تھے۔

ان خیالات کا اظہار انہوں نے جمعہ کے روز یوم قرارداد الحاق پاکستان کے حوالے سے برمنگھم میں مقیم اعزاز صدارتی مشیر چوہدری اسلم خان سے ملاقات کے دوران کیا۔ انہوں نے کہا کشمیر کا پاکستان کے ساتھ جغرافیائی، نظریاتی، مذہبی اور ثقافتی رشتہ ہے۔

(جاری ہے)

ہندوستان کا کشمیر کے ساتھ کوئی تعلق نہیں بنتا۔بھارت نے گزشتہ کئی دہائیوں سے کشمیریوں کو ان کے عالمی سطح پرتسلیم شدہ پیدائشی حق، حق خودارادیت سے محض طاقت کے بل بوتے پر محروم کر رکھا ہے۔

لیکن کشمیری عوام بھارت کے کشمیر پر غاصبانہ قبضے کی اس مذموم سازش کو کبھی کامیاب نہیں ہونے دیں گے۔ یوم الحاق پاکستان کے موقع پر اپنے خصوصی پیغام میں صدر آزادجموں وکشمیر بیرسٹر سلطان محمود چوہدری نے کہا کہ 19جولائی 1947کا دن کشمیر کی تاریخ کا اہم باب ہے،آج ہی کے دن سرینگر میں قرارداد الحاق پاکستان منظور کی گئی۔ تقسیم ہند کے فارمولے کے تحت ریاستوں کا فیصلہ استصواب رائے کے ذریعہ ہونا تھا۔

بھارت کی درخواست پر اقوام متحدہ نے یہ فیصلہ کیا تھا لیکن بعد کے واقعات شاہد ہیں کہ بھارتی حکمران اپنے وعدہ سے مکمل طور پرمنحرف ہو گئے جس کے نتیجے میں حق خوداراردیت کی تحریک کا آغاز ہوا جو آج بھی اسی تسلسل سے جاری ہے۔ 19جولائی 1947کو کشمیریوں کی اعلیٰ قیادت کے تاریخ ساز فیصلے نے جدو جہد آزادی کا رخ جس منزل کی طرف موڑا تھا اسی عظیم مقصد کے حصول کیلئے آج مقبوضہ کشمیر میں نہتے کشمیری بھارت کی 9لاکھ سے زائد فوج کے آگے سینہ سپر ہیں اور اقوام عالم میں ایک نئی تاریخ رقم کر رہے ہیں۔