Live Updates

عمران خان کے بیٹے آرہے ہیں یا کوئی جن بھوت آرہے ہیں، رانا تنویر حسین کا طنز

جن پاکستان مخالف قوتوں کی سپورٹ عمران خان کو حاصل ہے انہی قوتوں کے ساتھ ان کے بیٹے بھی رابطے کررہے ہیں، بانی پی ٹی آئی کی طرح وہ بھی ناکام ہوں گے؛ وفاقی وزیر کی میڈیا سے گفتگو

ساجد علی اتوار 27 جولائی 2025 16:16

عمران خان کے بیٹے آرہے ہیں یا کوئی جن بھوت آرہے ہیں، رانا تنویر حسین ..

مریدکے ( اُردو پوائنٹ اخبارتازہ ترین۔ 27 جولائی 2025ء ) وفاقی وزیر غذائی تحفظ و تحقیق رانا تنویر حسین نے طنزیہ تبصرہ کرتے ہوئے کہا ہے کہ بانی پی ٹی آئی عمران خان کے بیٹے آرہے ہیں یا جن بھوت آرہے ہیں ،ہم انتظار کررہے ہیں کہ وہ پاکستان آئیں۔ میڈیا سے گفتگو کرتے ہوئے انہوں نے کہا کہ ہمیں معلوم ہے اور قوم کو بھی بتانا چاہتے ہیں کہ عمران خان کو جن پاکستان مخالف قوتوں کی سپورٹ حاصل ہے انہی قوتوں کے ساتھ ان کے بیٹے بھی رابطے کررہے ہیں، جو عمران خان کی طرح ناکام ہوں گے، عمران خان کے کیس عدالتوں میں ہیں اور پاکستان کی عدالتیں آزاد ہیں، عمران خان کو اپنے کیسز کا سامنا کرنا ہوگا اور قانون انصاف کے تقاضے پورا کرنا ہوں گے۔

ایک سوال پر وفاقی وزیر کا کہنا تھا کہ پیپلز پارٹی کو پہلے بھی حکومت میں آنے کی دعوت دی وہ نہیں آئے مگر اب مجھے علم نہیں وہ حکومت میں آرہے ہیں یا نہیں، پنجاب میں پیپلز پارٹی کو انتظامی امور میں مسئلہ ہے، وہ چاہتے ہیں انتظامی امور میں ان کا عمل دخل ہو، ہم نے پہلے ہی ان کو بہت زیادہ پذیرائی دی ہوئی ہے۔

(جاری ہے)

انہوں نے کہا کہ زرعی انقلاب کیلئے وزیر اعظم نے بہت سی ہدایات دی ہیں ،ہم چاہتے ہیں کسان کو تمام سہولتیں ملیں ،معیاری رجسٹرڈ بیج اورکھاد ملے ،عوام دیکھیں گے اگلے چھ ماہ میں زرعی انقلاب کے اثرات نظر آنا شروع ہوجائیں گے، بھارت سن لے کہ اگر اس نے ہمارا پانی روکا تو اسے جنگ تصویر کیا جائے گا، کشمیر ہماری شہ رگ ہے، بھارت کے ساتھ اس وقت تک تعلقات ٹھیک نہیں ہوسکتے جب تک کشمیر کا مسئلہ اقوام متحدہ کی قرادادوں کے مطابق حل نہیں ہوجاتا۔