راولپنڈی چیمبر آف کامرس میں پرچم کشائی کی تقریب،وزیر خزانہ محمد اورنگزیب کی شرکت ،جشن آزادی کا کیک کاٹا

راولپنڈی (اُردو پوائنٹ اخبارتازہ ترین - اے پی پی۔ 13 اگست2025ء) راولپنڈی چیمبر آف کامرس مین یوم آزادی اور معرکہ حق تقریبات کے سلسلے میں پرچم کشائی کی تقریب منعقد کی گئی ۔تقریب میں وزیر خزانہ محمد اورنگزیب نے خصوصی شرکت کی اور جشن آزادی کا کیک کاٹا گیا۔چیمبر آمد پر صدر چیمبر عثمان شوکت،نائب صدر خالد فاروق قاضی، نائب صدر فہد برلاس، اور دیگر عہدےداروں نے بھرپور استقبال کیا۔

وزیرخزانہ نے صدر چیمبر عثمان شوکت ، عہدےداران اور بزنس کمیونٹی کے ہمراہ پرچم کشائی کی۔ اس موقع پر ایڈیشنل ڈائریکٹر جنرل ایم ایل اینڈ سی رانا منظور احمد ، تحریک نوجوانان پاکستان کے چیئرمین عبداللہ گل ، بھی موجود تھے۔اس موقع پر چیمبر کی جاری سرگرمیوں کے حوالے سے ڈاکومنٹری بھی دکھائی گئی ۔

(جاری ہے)

تقریب سے خطاب میں صدر چیمبر نے وزیر خزانہ محمد اورنگزیب کا شکریہ ادا کیا۔

انہوں نے کہا کہ وزارت خزانہ اور حکومت پاکستان کی کوششوں سے معاشی اشاریے بہتر ہوئے ہیں،تاہم انہوں نے کاروباری سرگرمیوں کے فروغ اور روزگار کے مواقع بڑھانے کے لیے شرح سود کو سنگل ڈیجیٹ تک لایا جائے، بجلی گیس کی قیمتیں کم کی جائیں اور ٹیکسوں کی شرح میں کمی لائی جائے۔وزیر خزانہ نے چیمبر تجاویز کا خیرمقدم کیا اور کہا کہ حکومت اور وزیراعظم شہباز شریف کی اولین ترجیح سازگار ماحول پیدا کرنا ہے۔

راولپنڈی چیمبر آف کامرس میں یوم آزادی اور معرکہ حق کی تقریب میں تاجر برادری سے خطاب کرتے ہوئے انہوں نے کہا کہ پالیسی بنانے کے نتائج سے سب کو فائدہ ہو،اس کے لیے کوشاں ہیں۔آج صارفین کا اعتماد بلند ترین سطح پر ہے،ہماری اکانومی کا ریکارڈ بڑھ رہا ہے۔انہوں نے کہا کہ رواں سال سرکاری اداروں کی نجکاری میں تیزی آئے گی،زرمبادلہ ذخائر میں ریکارڈ اضافہ ہوا جبکہ مقامی طور پر کاروبار کی فضا بھی بہتر ہوئی ہے۔

وزیر خزانہ کا کہنا تھا کہ سب پاکستانیوں کو یوم آزادی کی پیشگی مبارک مباد دیتا ہوں۔یہ جذبہ ایمان اور قومی اتحاد ملک کی علامت ہے،قومی سلامتی اور معاشی استحکام ایک دوسرے کے لئے لازم ملزوم ہے۔انہوں نے کہا کہ گزشتہ ڈیڑھ سال میں آمدنی میں اضافے کے لئے کام کیا ہے،روپے کی قدر میں استحکام اور پالیسی ریٹ میں کمی کے فیکٹ فیگر سب کے سامنے ہیں،ہمیں مزید بہتری کی ضرورت ہے جلد آپ کو نتائج بھی ملیں گے۔

ان کا کہنا تھا کہ قرضوں میں 41 فیصد اضافہ ہوا ہے۔زرعی قرضے ڈھائی ٹریلین کراس کر گئے ہیں۔پچھلے سال میں ایک ٹریلین ڈیٹ سروس واپس کئے ہیں۔محمد اورنگزیب نے کہا کہ اسٹاک ایکسچینج میں روزانہ کی بنیاد پر اضافہ ہوا ہو رہا ہے۔بڑی تبدیلی کی وجہ یہ ہے کہ نئے سرمایہ کاروں کی تعداد میں ریکارڈ اضافہ ہوا ہے، 45 وزارتوں میں رائٹ سیزنگ جاری ہے۔پینشن میں بہتری لائی جا رہی ہے۔

بجلی کی قیمتوں میں کمی پر بھی کام ہو رہا ہے۔وزیر خزانہ نے مزید کہا کہ وزیراعظم ایف بی آر کی ٹرانسفرمیشن کی میٹنگ کی خود نگرانی کر رہے ہیں، تنخواہ دار طبقہ پر مزید بوجھ نہیں ڈال سکتے۔ٹیکس کی شرح بڑھانا ہو گی۔ہم ابھی مزید تبدیلی لا رہے ہیں اور جو لوپ پول ہیں انکو بند کر رہے ہیں۔عالمی مالیاتی ترقی اداروں نے ہمارے اقدامات کو سراہا ہے، امریکہ سے ٹیرف ڈیل جو ہوئی ہے۔

آئی ایم ایف سے مالیاتی منصوبے پر گفتگو ہوئی ہے۔پاکستان سے اڑھائی سال بعد میڈل ایسٹ سے ایک ارب ڈالر سرمایہ اکٹھا کیا ہے۔بیرونی محاذ پر جو اثر پڑا ہے اس میں مختلف سروے موجود ہیں، آنے والے دنوں میں اچھی امید برقرار ہے۔ایسی معشیت بنائیں گے جس کے دور رس نتائج حاصل ہونگے۔پرائیوٹ سیکٹر اس ملک کو لیڈ کرے تو بہت زیادہ بہتری آئے گی۔محمد اورنگزیب کا مزید کہنا تھا گزشتہ ڈیڑھ سال میں معیشت مستحکم ہوئی ہے۔پالیسی ریٹ میں نمایاں کمی لائی گئی ہے اور اس میں مزید کمی کی گنجائش بھی ہے۔شرح سود میں جلد مزید کمی کا اعلان بھی کیا جائے گا۔