وزیر خزانہ پنجاب مجتبیٰ شجاع الرحمان کا جشن آزادی کی تقریب سے خطاب

لاہور (اُردو پوائنٹ اخبارتازہ ترین - اے پی پی۔ 14 اگست2025ء) لاہور میں پاکستان کے 78ویں جشن آزادی کی مرکزی تقریب سٹی ڈسٹرکٹ گورنمنٹ کے زیر اہتمام تاریخی حضوری باغ میں شاندار ملی جوش و جذ بہ کے ساتھ منائی گئی، جس میں وزیر خزانہ پنجاب مجتبیٰ شجاع الرحمان نے وزیر اعلیٰ پنجاب مریم نواز کی نمائندگی کی، تقریب کا آغاز صوبائی وزیر کی مزارِ اقبال پر حاضری، چادر پوشی اور فاتحہ خوانی سے ہوا جہاں انہوں نے وطنِ عزیز کی سا لمیت، امن اور خوشحالی کے لیے خصوصی دعائیں کیں۔

بعد ازاں عالمگیری دروازے پر پرچم کشائی کی گئی اور صوبائی وزیر نے مہمانوں کے لیے رکھی گئی یادگاری کتاب میں اپنے تاثرات قلم بند کیے۔تقریب میں ترکی، چین، ایران اور امریکہ سمیت دوست ممالک کے مندوبین، پارلیمنٹیرینز، صوبائی وزرا، سرکاری افسران، سول سوسائٹی کے نمائندگان اور طلبہ و طالبات کی بڑی تعداد نے شرکت کی۔

(جاری ہے)

وزیر خزانہ نے اپنی تقریر میں تمام معزز مہمانوں کا ان کی آمد پر شکریہ ادا کیا اور میڈیا کے توسط سے پوری قوم کو جشن آزادی کی مبارکباد پیش کرتے ہوئے کہا کہ "اس سال یومِ آزادی خصوصی اہمیت کا حامل ہے کیونکہ اس سال جشن آزادی کی خوشیوں میں بھارت کے خلاف معرکہ حق آپریشن بنیان المرصوص کی کامیابی کی خوشی بھی شامل ہے جس نے دنیا بھر میں پاکستان کے منظر نامے کو یکسر تبدیل کر دیا ہے ۔

آپریشن بنیان المرصوص کی یہ کامیابی اس حقیقت کی علامت ہے کہ ہم اپنی آزادی کی حفاظت کرنا جانتے ہیں۔"انہوں نے کہا کہ بنیان المرصوص کی فتح ہماری سیاسی و عسکری قیادت کی بہترین حکمت عملی کا نتیجہ ہے، جس نے دنیا کو باور کرایا کہ پاکستان اور اس کا ایٹمی پروگرام محفوظ ہاتھوں میں ہیں۔صوبائی وزیر نےمسلم لیگ ن کے قائد نواز شریف ، وزیر اعظم شہباز شریف ، آرمی چیف فیلد مارشل جنرل عاصم منیر اور تمام افواج پاکستان کو خراج تحسین پیش کرتے ہوئے کہا کہ آپریشن بنیان المرصوص میں ہماری افواج نے ہندوستان کو ناکوں چنے چبوا کر بری طرح شکست دی آج بھارت کی جرات نہیں کہ پاکستان کو میلی آنکھ سے دیکھ سکے۔

" تقریب میں بارش کے باوجود طلبہ و طالبات کے جوش و خروش کو سراہتے ہوئے صوبائی وزیر کا کہنا تھا کہ ہم پاکستانی ایک زندہ قوم ہیں اور زندہ قومیں اپنی آزادی کا جشن جوش و خروش سے مناتی ہیں۔ انہوں نے کہا کہ یوم آزادی کا دن اس عہدکی تجدید کا دن بھی ہے کہ ہم پاکستان کو امن، ترقی اور خوشحالی کا گہوارہ بنائیں گے اور آنے والی نسلوں کو ا یک محفوظ اور خوشحال ملک دیں گے۔

تقریب کے آخر میں مختلف سکولوں کے طلبہ و طالبات نے قومی ترانہ اور ملی نغمے پیش کیے، جبکہ فضا "پاکستان زندہ باد" کے نعروں سے گونجتی رہی۔ بارش کے باعث تقریب مقررہ وقت سے پہلے ختم کر دی گئی،وزیر خزانہ پنجاب نے تمام معزز مہمانوں کی آمد پر ایک بار پھران کا شکریہ ادا کرتے ہوئے کہا کہ جشنِ آزادی کا اصل پیغام اتحاد، قربانی اور وطن سے محبت ہے، اور ہمیں اس پیغام کو عملی طور پر اپنانا ہوگا۔