Live Updates

کرپشن کی حد ہوگئی،تمام سڑکیں بہہ گئیں،سیالکوٹ میں تباہی کی بڑی وجہ نالوں پر تجاوزات ہیں،خواجہ آصف

جو کام سویلین اداروں کے کرنے والے ہیں وہ ہماری فوج کر رہی ہے، وزیردفاع کا سیلاب متاثرہ علاقوں کے دورے کے موقع پر گفتگو

جمعرات 28 اگست 2025 13:29

سیالکوٹ(اُردو پوائنٹ اخبارتازہ ترین - این این آئی۔ 28 اگست2025ء)وزیردفاع خواجہ آصف نے کہاہے کہ سیالکوٹ میں تباہی کی بڑی وجہ نالوں پر تجاوزات ہیں،یہ ہمارے بلدیاتی اداروں کی ناکامی ہے۔سیلاب متاثرہ علاقوں کے دورے کے موقع پر گفتگو کرتے ہوئے خواجہ آصف نے کہاکہ اس وقت جو بربادی ہوئی ہے اس کے مختلف پہلو ہیں، جموں سے جتنے نالے نکلتے ہیں سیالکوٹ شہر اس پر آباد ہے، جموں سے پانی آتا ہے تو سیالکوٹ کو سیلاب کا سامنا کرنا پڑتا ہے، سیالکوٹ میں تباہی کی بڑی وجہ ان نالوں پر تجاوزات ہیں۔

وزیردفاع نے کہاکہ میرا خیال ہے کہ یہ ہمارے بلدیاتی اداروں کی ناکامی ہے، بلدیاتی ادارے مضبوط نہیں ہوں گے تویہ مسئلے حل نہیں ہوں گے، پورے ضلع میں تباہی ہوئی نارووال میں بھی تباہی ہوئی، پانی کے راستے میں جب تعمیرات ہوں گی تو پانی پھر اپنا راستہ خود بناتا ہے۔

(جاری ہے)

انہوںنے کہاکہ اس سیلاب میں شہر کا اسٹرکچر تباہ ہوگیا ہے، کرپشن کی حد ہوگئی ہے، سیلاب میں تمام سڑکیں بہہ گئی ہیں، کوئی پوچھنے والا ہے ایس ڈی او، ایکس ای این کو یا ٹھیکدار کو ۔خواجہ آصف نے کہاکہ جو کام سویلین اداروں کے کرنے والے ہیں وہ ہماری فوج کر رہی ہے، پاک فوج نے بھارت کے خلاف جنگ جیتی اب قدرتی آفات سے لڑ رہی ہے، فوجی جوان عوام کی جانیں بچا رہے ہیں، محفوظ مقامات پر منتقل کر رہے ہیں۔