1965ء کی جنگ کے دوران افواجِ پاکستان نے جرأت، شجاعت اور بے مثال بہادری کا مظاہرہ کیا ، چیئرمین سینیٹ سید یوسف رضا گیلانی

اسلام آباد (اُردو پوائنٹ اخبارتازہ ترین - اے پی پی۔ 05 ستمبر2025ء) چیئرمین سینیٹ پاکستان سید یوسف رضا گیلانی نےپوری قوم، افواجِ پاکستان اور شہداء کو زبردست خراجِ عقیدت پیش کرتے ہوئے کہا ہے کہ 1965ء کی جنگ کے دوران افواجِ پاکستان نے جرأت، شجاعت اور بے مثال بہادری کا جو مظاہرہ کیا وہ آنے والی نسلوں کے لئے ایک مشعل راہ ہے، ہماری بہادر مسلح افواج نے موثر حکمتِ عملی اور بہادری سے دشمن کے عزائم کو خاک میں ملایا جس کی مثال پوری دنیا میں نہیں ملتی، جیسے 1965ء میں دشمن کو عبرتناک شکست کا سامنا کرنا پڑا تھا ویسے ہی آج بھی دشمن کو عالمی سطح پر رسوائی اور ناکامی کے سوا کچھ حاصل نہیں ہوا۔

یومِ دفاع پاکستان کے موقع پر اپنے خصوصی پیغام میں انہوں نے پوری قوم، افواجِ پاکستان اور شہداء کو زبردست خراجِ عقیدت پیش کرتے ہوئے کہا کہ 6 ستمبر ہماری قومی تاریخ کا وہ روشن اور سنہری باب ہے جس نے دنیا پر یہ ثابت کر دیا کہ پاکستانی قوم اور افواجِ پاکستان اپنی آزادی، خودمختاری اور قومی وقار کے تحفظ کے لیے کسی قربانی سے دریغ نہیں کرتے۔

(جاری ہے)

چیئرمین سینیٹ نے کہا کہ 1965ء کی جنگ کے دوران افواجِ پاکستان نے جرأت، شجاعت اور بے مثال بہادری کا جو مظاہرہ کیا وہ آنے والی نسلوں کے لئے ایک مشعل راہ ہے، شہداء اور غازیوں نے اپنی جانوں کے نذرانے پیش کر کے مادرِ وطن کی سرحدوں کی حفاظت کی اور دنیا کو یہ پیغام دیا کہ پاکستانی عوام اور فوج ایک جان، ایک دل اور ایک مقصد رکھتے ہیں۔انہوں نے حالیہ پاک بھارت کشیدگی کا ذکر کرتے ہوئے کہا کہ ہماری بہادر مسلح افواج نے موثر حکمتِ عملی اور بہادری سے دشمن کے عزائم کو خاک میں ملایا جس کی مثال پوری دنیا میں نہیں ملتی۔

انہوں نے کہا کہ جیسے 1965ء میں دشمن کو عبرتناک شکست کا سامنا کرنا پڑا تھا ویسے ہی آج بھی دشمن کو عالمی سطح پر رسوائی اور ناکامی کے سوا کچھ حاصل نہیں ہوا۔چیئرمین سینیٹ نے کہا کہ یومِ دفاع محض ایک دن کی یاد نہیں بلکہ ایک عہد، ایک نظریہ اور ایک پیغام ہے کہ پاکستان کی بقا اور ترقی پوری قوم کی مشترکہ ذمہ داری ہے، یہ دن ہمیں یاد دلاتا ہے کہ وطنِ عزیز کی سلامتی کے لئے صرف افواجِ پاکستان ہی نہیں بلکہ پوری قوم کو اتحاد، قربانی اور عزم کا مظاہرہ کرنا ہوگا۔

سید یوسف رضا گیلانی نے اس موقع پر ذوالفقار علی بھٹو، محترمہ بینظیر بھٹو، صدر آصف علی زرداری اور چیئرمین بلاول بھٹو زرداری کے کردار کو بھی خراجِ تحسین پیش کیا۔ انہوں نے کہا کہ شہید ذوالفقار علی بھٹو نے ایٹمی پروگرام کی بنیاد رکھ کر پاکستان کے دفاع کو ناقابلِ تسخیر بنایا، محترمہ بینظیر بھٹو نے اپنی جمہوری جدوجہد اور قربانیوں کے ذریعے پاکستان کے وقار اور نظریے کو مزید مستحکم کیا، صدر آصف علی زرداری نے پارلیمان کو بالادست بنا کر جمہوریت کی جڑوں کو مضبوط کیا جبکہ بلاول بھٹو زرداری نوجوان نسل کے لئے امید کا استعارہ ہیں جو پاکستان کو ترقی، خوشحالی اور قیامِ امن کے نئے سفر پر گامزن کرنے کے لئے پرعزم ہیں۔

انہوں نے کہا کہ یومِ دفاع ہمیں یہ سوچنے پر مجبور کرتا ہے کہ ہم اپنی معاشی، سیاسی اور سماجی کمزوریوں کو کس طرح اپنی طاقت میں بدل سکتے ہیں، ہماری ذمہ داری ہے کہ ہم اپنی آنے والی نسلوں کو ایک ایسا پاکستان دیں جو مضبوط، خوشحال، پرامن اور ترقی یافتہ ہو۔چیئرمین سینیٹ نے کہا کہ شہداء کی قربانیاں یہ پیغام دیتی ہیں کہ وطن کی سلامتی سب سے مقدم ہے، ہمیں قومی یکجہتی کو فروغ دینا ہوگا اور اس عہد کو دہرانا ہوگا کہ پاکستان کی تعمیر و ترقی میں ہر شہری اپنا بھرپور کردار ادا کرے گا۔

انہوں نے کہا کہ پاکستان ایک امانت ہے اور ہمیں اس کی حفاظت ہر حال میں کرنی ہے، ہماری افواج دنیا کی بہترین افواج میں شمار ہوتی ہیں اور قوم ہر مشکل گھڑی میں ان کے شانہ بشانہ کھڑی ہے، آج کے دن ہمیں یہ عہد کرنا ہوگا کہ ہم پاکستان کو امن، ترقی اور خوشحالی کا گہوارہ بنانے کے لئے اپنی انفرادی اور اجتماعی ذمہ داریوں کو پوری دیانت داری سے نبھائیں گے۔