افغانستان سے ہمارے بچوں کےخون سے ہولی کھیلنے طالبان اورافغانی آتے ہیں،اتنی محسن کشی کبھی نہیں ہوئی،وزیر دفاع خواجہ محمد آصف

بدھ 10 ستمبر 2025 00:10

اسلام آباد (اُردو پوائنٹ اخبارتازہ ترین - اے پی پی۔ 10 ستمبر2025ء) وزیر دفاع خواجہ محمد آصف نے کہا ہے کہ افغانستان سے ہمارے بچوں کےخون سے ہولی کھیلنے طالبان اورافغانی آتے ہیں،اتنی محسن کشی کبھی نہیں ہوئی۔سوشل میڈیا ایکس پر اپنی پوسٹ میں انہوں نے کہا کہ آج پاک فوج نے پھر اپنے ایک بہادر بیٹے کو وطن پہ قربان کیا۔ شہید کی والدہ کا کہنا تھا میرے 10 بیٹے ہوتے تو وہ پاکستان کی ناموس پر قربان کردیتی ، بہنیں اور بیوی دکھ میں ڈوبی تھیں ۔

،والد کو گلے لگایا تو وہ کہنے لگے میں مضبوط ہوں، میرا بیٹا میرا فخر ہے۔ انہوں نے کہا کہ میجر عدنان برطانیہ کی رائل ملٹری اکیڈمی سینڈھرسٹ کے گریجویٹ تھے۔ کون لوگ ہیں یہ جن کا نصب العین وطن سے محبت اور شہادت ہے۔ نہ اقتدار نہ دولت نہ شہرت ہے۔

(جاری ہے)

اللہ نے اس پاک دھرتی کو انکے طفیل اپنی پناہ میں رکھا ہوا ہے ۔ انکی جانوں کے صدقے ہمیں بھارت پہ فتح دی ہے۔

‏پانچ دہشت گردوں میں تین افغانی اور دو ٹی ٹی پی کے تھے۔انہوں نے کہا کہ ہم نے جن کے لئے دو طویل جنگیں لڑیں، اپنا امن اور اپنی معیشت تباہ کر لی لاکھوں شہید ہو گئے۔ 60/70 لاکھ افغان ہمار ی دھرتی پہ موجود ہیں ۔ہماری پناہ میں ہیں، روزی کما رہے ہیں، بڑے بڑے ٹرانسپورٹر اور ارب پتی ٹھیکیدار ہیں اور افغان سر زمین سے ہمارے بچوں کے خون سے ھولی کھیلنے طالبان دہشت گرد اور افغانُ شہری آتے ہیں ۔ دنیا کی تاریخ ميں اتنی محسن کشی کبھی نہیں ہوئی۔