پاکستان علما کونسل کے تحت (کل )ملک میں یوم تشکر و یوم دعا منایا جائے گا

لاہور (اُردو پوائنٹ اخبارتازہ ترین - این این آئی۔ 18 ستمبر2025ء) پاکستان کے تمام مکاتب فکر کے علما و مشائخ اور مذاہب کے قائدین نے پاکستان سعودی عرب دفاعی معاہدہ کو عظیم کامیابی قرار دیتے ہوئے کہا ہے کہ پاکستان اور سعودی عرب کی قیادت کا فیصلہ دنیا میں امن چاہنے والوں کیلئے نوید صبح ہے،پاکستان کے وزیر اعظم میاں شہباز شریف ، سپہ سالار قوم فیلڈ مارشل جنرل سید حافظ عاصم منیر اور سعودی عرب کے ولی عہد امیر محمد بن سلمان نے دونوں ممالک اور عوام کے درمیان قائم تعلقات کو مزید مضبوط اور مستحکم کر دیا ہے،اس دفاعی معاہدے کے بعد اہل فلسطین اور کشمیر کی منزل بھی آسان ہو گی،آج (جمعتہ المبارک ) کو پورے ملک میں پاکستان علما کونسل کے تحت یوم تشکر و یوم دعا منایا جائے گا۔

پیغام امن کمیٹی موجودہ حکومت کا درست سمت اور قابل تحسین فیصلہ ہے ، پہلی مرتبہ غیر مسلموں کی نمائندگی بھی اعلی سطح کی کمیٹی میں کی گئی ۔

(جاری ہے)

لاہور ورث روڑ چرچ میں چیئرمین پاکستان علما کونسل و کوارڈینیٹر قومی پیغام امن کمیٹی حکومت پاکستان حافظ محمد طاہر محمود اشرفی اور چرچ آف پاکستان کے صدر بشپ آزاد مارشل نے مسلم مسیحی اور دیگر مذاہب کے قائدین مولانا محمد نعمان ، مولانا محمد اسلم صدیقی، پادری عمائنول کھوکھر،شہزاد احمد، مولانا اسد اللہ فارق، قاری عبد الحکم اطہر، مولانا قاری مبشر رحیمی، قاری فیصل امین اور دیگر کے ہمراہ پریس کانفرنس سے خطاب کرتے ہوئے کہا کہ وزیراعظم شہباز شریف اور سعودی ولی عہد کے درمیان پاک سعودی دفاعی سٹریٹیجی شراکت کا معاہدہ پوری پاکستانی قوم کے لیے بڑی خوشخبری ہے۔

انہوں نے وزیراعظم شہباز شریف اور آرمی چیف جنرل عاصم منیر کو خراج تحسین پیش کرتے ہوئے کہا کہ یہ معاہدہ نہ صرف پاک سعودی تعلقات کو مضبوط کرے گا بلکہ ارض حرمین شریفین کے تحفظ کو سعودی عرب کے ساتھ مل کر یقینی بنائے گا۔ انہوں نے کہا کہ پاک سعودی عرب دفاعی معاہدہ سے امن چاہنے والوں کو دفاعی معاہدہ سے نئی طاقت ملے گی، ان کاکہنا تھاکہ بائیس ستمبر کو وزیر اعظم ولی عہد فلسطینی ریاست پر خوشخبری دیں گے، ان کاکہنا تھاکہ دہشت گردی چرچ مسجد امام بارگاہ اور عام لوگوں کے ساتھ ہوئی دہشت گرد ہمیں پاکستانی سمجھ کر مارتا ہے،ان کاکہنا تھاکہ کل جمعہ کو ملک بھر میں یوم تشکر و یوم دعا منائیں گے ، پاکستان کی مسلح افواج سعودی عرب کی مسلح افواج کے ساتھ مل کر ارض حرمین شریفین کی حفاظت کریں گے اور یہ ذمہ داری یہ سعادت پاکستان کے حصے میں آئی ہے۔

پیغام امن کمیٹی کا بنیادی مقصد امن سلامتی کو فروغ دے کر دوریوں تلخیوں کو ختم کرنا جس نے ہمارے معاشرے کو تشدد زدہ کردیاہے، ان کاکہنا تھاکہ دفاعی معاہدہ سے امن و سلامتی آتی ہے کچھ معاہدہ آگے بڑھ رہے ہیں ارض حرمین کیلیے جانیں قربان کرنے کیلئے تیار ہیں، بشپ آزاد مارشل کاکہنا تھاکہ پاکستان کانام معرکہ حق کی وجہ سے اونچا ہوا اور ہمیں ملی کہ ہماری مسلح افواج کے پاس صلاحیت ہے کہ وہ اپنے سے چار گنا بڑے دشمن کا مقابلہ بہادری سے کر سکتے ہیں، انہوں نے کہا کہ جو لوگ پاکستان کا نام بدنام کرتے ہیں خواہ وہ ہیومین رائٹس کا نام لے کر کریں یا کوئی اور نام ان کے خلاف ایکشن ہونا چاہیے ،انہوں نے کہا کہ سیلاب سے بڑی آبادی متاثر ہوئی ہے ، ہم مشترکہ طور پر سیلاب زدگان کی امداد کیلئے نکلیں گے اور مسلمان اور غیر مسلم اپنے بھائیوں کی بھرپور مدد کریں گے۔

انہوں نے کہا کہ پیغام امن کمیٹی پاکستان میں پہلی مرتبہ ایسی کمیٹی قائم کی گئی ہے جس میں غیر مسلموں کو بھی شامل کیا گیا ہے اور ہم امید رکھتے ہیں کہ اس سے جو غلط فہمیاں ہیں، انتہا پسندی ہے ، دہشت گردی ہے اس کے خاتمے میں مدد ملے گی۔ دہشت گرد پاکستانیوں کو نشانہ بناتے ہیں ان کا ہدف صرف اور صرف پاکستانی ہوتے ہیں وہ کسی مذہب یا مسلک کے نمائندوں ک نشانہ نہیں بناتے وہ پاکستانیوں کو نشانہ بناتے ہیں۔