پاکستان اور سعودی عرب کے دفاعی معاہدے سے کسی کو خوفزدہ ہونے کی ضرورت نہیں

اسلام آباد ( اردوپوائنٹ اخبار تازہ ترین۔ انٹرنیشنل پریس ایجنسی۔ 19 ستمبر 2025ء ) وزیردفاع خواجہ آصف نے کہا ہے کہ پاکستان اور سعودی عرب معاہدے سے کسی کو خوفزدہ ہونے کی ضرورت نہیں ہے، اس معاہدے سے بھارت کی پریشانی فطری ہے۔ انہوں نے لندن میں میڈیا سے گفتگو کرتے ہوئے کہا کہ سعودی عرب کے ساتھ دفاعی تعاون کوئی نئی بات نہیں۔ سعودی عرب کے ساتھ چالیس سے پچاس سالوں سے دفاعی تعاون جاری ہے، سعودی عرب کے ساتھ دفاعی تعاون کبھی زیادہ ہوتا ہے اور نارمل ہوتا ہے،ضرورت کے مطابق سعودی عرب کے ساتھ دفاعی تعاون بڑھتا ہے اور معمول پر لے آتے ہیں۔

اس معاہدے پر بعض عناصر کی جانب سے قیاس آرائیاں اپنے مقاصد کے حصول کیلئے کی جارہی ہیں،ہمارے کوئی جارحانہ عزائم نہیں۔ یہ اول وآخر ایک دفاعی معاہدہ ہے ہم تو خود بھارتی جارحیت کا شکار رہے ہیں، دونوں ممالک میں کسی ایک پر حملہ ہوگا تو دونوں تعاون کریں گے۔

(جاری ہے)

پاکستان اور سعودی عرب معاہدے سے کسی کو خوفزدہ ہونے کی ضرورت نہیں ہے، پاکستان افواج ایک عرصہ سے سعودی عرب میں موجود ہے، اس معاہدے کے تحت سعودیہ میں فوج کی موجودگی بڑھ جائے گی تو کسی کو کیا مسئلہ ہوگا؟ اس معاہدے سے بھارت کو ہونے والی پریشانی فطری ہے، بھارت کا چیخیں مارنا کوئی مسئلہ نہیں ہے۔

ہمارے کسی کے خلاف کوئی عزائم نہیں۔ ہم تو برصغیر میں بھی امن چاہتے ہیں ۔اگر ہمارے خلاف جارحیت ہوگی تو دفاع کرنا ہمارا حق ہوگا۔ دوسری جانب وزیراعلیٰ پنجاب مریم نواز شریف نے سرگودھا میں الیکٹروبس پراجیکٹ کی افتتاحی تقریب سے خطاب کرتے ہوئے کہا کہ آپریشن بنیان مرصوص میں کامیابی پر دنیا بھر میں پاکستان کی دھاک بیٹھ گئی۔ ایک شخص جگہ جگہ جاکر لڑائیاں کراتا تھا، اب سیاسی اور عسکری قیادت نیک نیت لوگوں پر مشتمل ہے۔

شہباز شریف کو ہی نہیں بلکہ پاکستان کو سعودی عرب میں سلامی دی گئی۔ وزیراعلیٰ مریم نواز شریف نے کہا کہ وہ لوگ جنہوں نے مسجد نبوی اور شہباز شریف اور وفد کی تضحیک کی کوشش کی آج نامراد ہیں۔ نبیؐ کے سامنے آواز اونچی کرنے کی اجازت نہیں اور شرپسند نعرے لگاتے رہے۔آج مسجد نبوی اور حرم پاک میں وزیراعظم پاکستان محمد شہباز شریف صاحب کواللہ نے عزت دی۔

شہباز شریف صاحب کی سعودی عرب میں تاریخی عزت افزائی کی گئی۔ ایک پرائم منسٹر ہواکرتا تھا جس کو جہاز سے اتار کر کہا گیا کہ جاؤ بھائی۔ محمد نواز شریف کے بھائی شہباز شریف کو سعودی عرب کی فضاؤں میں جنگی طیاروں نے سلامی دی۔سعودی عرب نے پاکستان کے لئے تعریفی گانا بنا کرریلیز کیا۔ سعودیہ میں سبز پرچموں کی بہار تھی، عزت افزائی کی وجہ حکمران کا دھرتی سے پیار ہے۔

اللہ کے فضل و کرم سے سبز پاسپورٹ کی عزت بڑھی ہے۔ محض نعرے مارنے سے عزت نہیں ملتی، کبھی عسکری ادارے اور کبھی دوسروں کا نام لیکر ٹوئٹ کرنے سے عزت نہیں ملتی۔ دنیا بدل چکی ہے پاکستان آگے بڑھ چکا اور وہ شخص قصہ پرینہ بن چکا ہے۔ اللہ کا شکر ہے کہ کسی کے نصیب میں عزت آئی اور حرم پاک کی پاسبانی کا شرف ملا۔ سعودی عرب نے کہا کہ پاکستان پر حملہ سعودی عرب پر حملہ اور سعودی عرب پرحملہ پاکستان پر حملہ تصور ہوگا۔ وزیراعظم شہباز شریف کی انتھک محنت اور بصیرت کو سلام پیش کرتی ہوں اورسعودی ولی عہد محمد بن سلمان اور سعودی عرب کو خراج تحسین پیش کرتے ہیں۔ پاکستان کے ساتھ سعودی عرب کا تعلق لازوال رشتہ میں بدل چکا ہے،آنے والی نسلوں کو نصاب میں یہ بتایا جائے گا۔