وزیر اعلیٰ پنجاب پیر کو فیصل آباد میں گرین بس انیشیٹو اور اربوں روپے کے ترقیاتی منصوبوں کا افتتاح کریں گی، رانا ثناءاللہ

فیصل آباد (اُردو پوائنٹ اخبارتازہ ترین - اے پی پی۔ 28 ستمبر2025ء) وزیراعظم کے مشیربرائے سیاسی امور سینیٹر رانا ثناءاللہ خاں نے کہا ہے کہ وزیر اعلیٰ پنجاب مریم نواز کل پیر کو فیصل آباد کا دورہ کے دوران گرین بس انیشیٹو سمیت اربوں روپے کے ترقیاتی منصوبوں کا افتتاح کریں گی۔اتوار کو یہاں بوہڑانوالی گرائونڈ میں میڈیا سے گفتگو کرتے ہوئے انہوں نے کہا کہ مریم نواز کی عوامی فلاح پر مبنی ان گنت اصلاحات میں سے گرین بسیں ایک بڑا انیشیٹو ہے جس کا مقصد عام آدمی کو ریلیف فراہم کرنا ہے۔

انہوں نے کہا کہ ابتدائی طور پر یہ سروس دو روٹس پر شروع ہوگی جو جلد سات روٹس تک وسعت اختیار کرے گی۔ انہوں نے کہا کہ الیکٹرو بس کا کرایہ صرف 20 روپے ہوگا جبکہ طلبہ، بزرگ شہریوں اور معذور افراد کو اس میں مفت سفر کی سہولت میسر ہوگی۔

(جاری ہے)

رانا ثناءاللہ نے کہا کہ حکومت نے عام شہری کو فوکس کرتے ہوئے مزدور کارڈ اور کسان کارڈ جیسے ویلفیئر انیشیٹو متعارف کرائے ہیں تاکہ معاشرے کے کمزور طبقات کو سہولت دی جا سکے۔

انہوں نے کہا کہ فیصل آباد میں اڑھائی سو ارب روپے پر مبنی دیگر منصوبوں پر بھی کام جاری ہے جن میں ستیانہ اور سمندری روڈ کو موٹروے سے لنک کرنے کا منصوبہ، نشاط آباد روڈ اور جدید سیوریج اسکیمیں شامل ہیں۔ انہوں نے کہا کہ واسا کے منصوبے دو سال میں مکمل ہوں گے جبکہ میٹرو بس کا 100 ارب روپے مالیت کا منصوبہ اسی سال پایہ تکمیل کو پہنچے گا۔انہوں نے کہا کہ فیصل آباد اپنی محبوب قائد مریم نواز کے استقبال کے لیے بے تاب ہے اوران کی آمد پر شہر عقیدت و محبت کے پھول نچھاور کرے گا۔

انہوں نے کہا کہ ہیلی پیڈ سے یونیورسٹی گیٹ تک عوامی استقبال ہوگا اور اسی مقام پر وزیر اعلیٰ مریم نواز عوام سے خطاب بھی کریں گی۔ انہوں نے مزید کہا کہ وزیر اعلیٰ پنجاب کے دورہ کے دوران ترقیاتی منصوبوں کی بروقت تکمیل کے لیے سیاسی اور انتظامی کمیٹیاں تشکیل دی جائیں گی تاکہ ان منصوبوں کی تکمیل میں کوئی رکاوٹ باقی نہ رہے۔انہوں نے کہا کہ حکومت کوالیکٹرو بس جیسے منصوبوں پر سبسڈی دینا پڑتی ہے لیکن یہ عوام کے وسیع تر مفاد میں ہے کیونکہ یہ انویسٹمنٹ براہ راست عام شہری پر ہو رہی ہے۔

انہوں نے کہا کہ گرین بسیں اور دیگر فلاحی اقدامات سے نہ صرف عام آدمی کو ریلیف ملے گا بلکہ معاشی اور سماجی ترقی کی رفتار بھی تیز ہوگی۔ انہوں نے کہا کہ پاکستان کوآج دنیا بھر میں عزت کی نگاہ سے دیکھا جا رہا ہے۔ انہوں نے کہا کہ وہ دور گزر گیا جب پاکستانی پاسپورٹ کودیکھ کر مذاق اڑایا جاتا تھا، آج دنیا پاکستان کو خوش آمدید کہتی ہے۔ انہوں نے کہا کہ وزیراعظم شہباز شریف کے عالمی دوروں اور سفارتی حکمت عملی نے پاکستان کو دنیا میں عزت ووقار اور بلند مقام دلایا ہے، حتیٰ کہ امریکی صدر نے بھی انہیں خصوصی طور پر ملاقات کے لیے مدعو کیا۔

ان کامیابیوں کے نتیجے میں پاکستان کو معاشی فوائد بھی حاصل ہوں گے۔سیلاب متاثرین کے حوالے سے رانا ثناءاللہ نے کہا کہ مریم نواز نے متاثرین کو اپنے مہمان قرار دے کر ان کی بھرپور دیکھ بھال کی۔ انہوں نے بچوں اور خواتین تک رسائی حاصل کی اور کھانے پینے سمیت تمام سہولیات پہنچائیں۔ انہوں نے کہا کہ مریم نواز کی قیادت عوامی خدمت کی عملی تصویر ہے۔