Live Updates

اسرائیل کے معاملے پرپاکستان تنہا کوئی فیصلہ نہیں کریگا ، حتمی فیصلے سے قبل وزیراعظم پارلیمنٹ کو اعتماد میں لیں گے، گیلانی

جمعرات 2 اکتوبر 2025 22:49

پشاور/اسلام آباد(اُردو پوائنٹ اخبارتازہ ترین - این این آئی۔ 02 اکتوبر2025ء) قائم مقام صدر اور چیئرمین سینیٹ سید یوسف رضا گیلانی نے کہا ہے کہ اسرائیل کے معاملے پر پاکستان تنہا کوئی فیصلہ نہیں کرے گا بلکہ ڈونلڈ ٹرمپ سمیت عرب ممالک، سعودی عرب، ترکی اور دیگر مسلم ممالک کی اجتماعی مشاورت اور اعلامیے کے تحت آگے بڑھا جائے گا، حتمی فیصلے سے قبل وزیر اعظم پارلیمنٹ کو اعتماد میں لیں گے۔

وہ گورنر ہاؤس پشاور میں میڈیا سے گفتگو کر رہے تھے، اس موقع پر گورنر خیبرپختونخوا فیصل کریم کنڈی اور پیپلز پارٹی خیبرپختونخوا کے صدر محمد علی شاہ باچا بھی ان کے ہمراہ تھے۔قائم مقام صدر نے کہا کہ ملک اور صوبوں کو آئین کے مطابق چلایا جائے تو کسی قسم کا تصادم پیدا نہیں ہوگا۔

(جاری ہے)

صوبوں کو این ایف سی ایوارڈ کے تحت وسائل ملتے ہیں، ماضی میں ساتواں این ایف سی ایوارڈ میں نے گوادر میں اعلان کیا تھا۔

اگر صوبوں کو ان کے حقوق بروقت ملتے تو سانحہ مشرقی پاکستان کبھی رونما نہ ہوتا۔انہوں نے کہا کہ پیپلز پارٹی اور مسلم لیگ کے درمیان اختلافات جمہوری عمل کا حصہ ہیں، اختلاف رائے جمہوریت کا حسن ہے۔ ہم سب کو مل کر ملک کی سلامتی اور جمہوریت کے استحکام کے لیے کام کرنا ہوگا۔ ماضی میں بھی پیپلز پارٹی نے صدارتی اختیارات وزیر اعظم کو منتقل کر کے پارلیمانی نظام کو مضبوط بنایا، صدر آصف علی زرداری نے حقیقی جمہوریت پسند صدر کا کردار ادا کیا۔

سیدیوسف رضا گیلانی نے کہا کہ میں وفاق کا نمائندہ ہوں اور صوبہ خیبرپختونخوا میں قیام امن کے لیے تمام جماعتوں کو متحد ہونا ہوگا۔ جب ہماری حکومت میں سوات آپریشن کیا گیا تو تمام سیاسی جماعتیں ایک پیج پر تھیں اور دنیا نے پاکستان کا ساتھ دیا۔ اس کامیاب آپریشن کے بعد لاکھوں متاثرین کو صرف نوے دن میں اپنے گھروں میں آباد کیا گیا۔افغانستان کے ساتھ مذاکرات کے حوالے سے سوال پر انہوں نے کہا کہ ملکی خارجہ پالیسی کے تحت ہی فیصلے ہوتے ہیں۔

نئے صوبوں کے قیام کے حوالے سے بھی آئین میں ایک واضح طریقہ کار موجود ہے۔قائم مقام صدر نے کہا کہ وزیر خارجہ اور چیئرمین بلاول بھٹو زرداری نے آپریشن بنیان المرصوص میں پاکستان کا موقف بہترین انداز میں پیش کر کے سفارتکاری کی نئی مثال قائم کی۔ کالا باغ ڈیم سمیت تمام متنازع امور کو مشترکہ مفادات کونسل کے ذریعے حل کیا جانا چاہیے۔