پیپلزپارٹی اقلیتی ونگ کے رہنماؤں کی جانب سے کرسمس کے سلسلے میں تقریب کا اہتمام

شہید بینظیر بھٹو کے ساتھ شہباز بھٹی نے اقلیتوں کے حقوق کی آواز دنیا بھر میں ہر فورم پر اٹھائی،ندیم بھٹی

پیر 22 دسمبر 2025 22:55

اسلا م آباد(اُردو پوائنٹ اخبارتازہ ترین - این این آئی۔ 22 دسمبر2025ء) پاکستان پیپلزپارٹی اقلیتی ونگ کے رہنماؤں ندیم بھٹی اور سہیل رومی کی جانب سے کرسمس کے سلسلے میں ایک تقریب کا اہتمام پی پی پی میڈیا آفس اسلام آباد میں کیا گیا جس میں کرسمس کا کیک کاٹا گیا۔ ندیم بھٹی نے کینیڈا سے اپنے پیغام میں کہا کہ پاکستان پیپلزپارٹی نے ہمیشہ اقلیتوں کے حقوق کی جدوجہد میں پاکستان کی اقلیتی برادری کا ساتھ دیا ہے، شہید شہباز بھٹی پیپلزپارٹی کے ساتھ اپنی آخری سانسوں تک منسلک رہے اور پارٹی نے پاکستان کی تاریخ میں پہلی بار اقلیتی امور کا وفاقی وزیر مقرر کیا، شہید بینظیر بھٹو کے ساتھ شہباز بھٹی نے اقلیتوں کے حقوق کی آواز دنیا بھر میں ہر فورم پر اٹھائی۔

سہیل رومی نے اس موقع پر اظہار خیال کرتے ہوئے کہا کہ ابھی چند روز قبل صدر آصف علی زرداری نے نیشنل کمیشن فار مینارٹیز رائٹس بل 2025پر دستخط کئے جو اس بات کا ثبوت ہے کہ پیپلزپارٹی اقلیتوں کے حقوق کی جدوجہد میں اقلیتی برادری بھی اس عزم کا اظہار کرتی ہے کہ وہ ماضی سے بڑھ کر پارٹی اور پارٹی قیادت کے ساتھ ہے اور بلاول بھٹو زرداری کو اس ملک کا وزیراعظم بنانے میں اپنا کردار ادا کرے گی تاکہ ملک ترقی کر سکے اور عوام خوشحال ہوں۔

(جاری ہے)

اس موقع پرانچارج سینٹرل سیکریٹریٹ سبطل حیدر بخاری، پاکستان پیپلزپارٹی وسطی پنجاب کے نائب صدر، خا لد نواز بوبی، شکیل عباسی، شیرین اسلم، دانیال کھوکھر، فیاض بھٹی، پاسٹر یعقوب، خالد حبیب ڈار، پاسٹر یعقوب اور دیگر نے شرکت کی۔