Live Updates

مسلم لیگ(ن) ملک کی ترقی و خوشحالی کی ضمانت ہے، چودھری جعفر اقبال

قوم سیسہ پلائی دیوار بن کر دشمن کا مقابلہ ، سیاسی و عسکری قیادت کا مکمل ساتھ جاری رکھا جائے گا، رہنما مسلم لیگ (ن)

ہفتہ 4 اپریل 2026 20:35

اسلام آباد(اُردو پوائنٹ اخبارتازہ ترین - این این آئی۔ 04 اپریل2026ء) پاکستان مسلم لیگ(ن) کے رہنماؤں نے کہا ہے کہ موجودہ حکومت ملک کو ترقی و خوشحالی کی راہ پر گامزن کرنے کیلئے عملی اقدامات کر رہی ہے اور عالمی سطح پر پاکستان کی پذیرائی مربوط خارجہ پالیسی کا نتیجہ ہے۔تفصیلات کے مطابق سنیئر رہنما مسلم لیگ(ن) و سابق ڈپٹی سپیکر قومی اسمبلی چودھری محمد جعفر اقبال اور صوبائی رکن اسمبلی عشرت اشرف نے اپنے بیان میں کہا کہ مسلم لیگ(ن) ملک و قوم کی تعمیر و ترقی اور خوشحالی کی ضمانت ہے۔

انہوں نے کہا کہ قائد مسلم لیگ(ن) نواز شریف کی سرپرستی میں وزیراعظم شہباز شریف ملک کو ترقی کی راہ پر گامزن کرنے کیلئے کوشاں ہیں۔ ایران، امریکہ اور اسرائیل کے درمیان کشیدگی کے باعث عالمی معاشی بحران کے باوجود حکومت کی مثبت پالیسیوں سے پاکستان معاشی بہتری کی جانب بڑھ رہا ہے۔

(جاری ہے)

انہوں نے مزید کہا کہ ماضی میں مسلم لیگ(ن) نے لوڈشیڈنگ اور دہشتگردی جیسے بڑے مسائل پر قابو پایا اور اب بھی ملک کو ایشین ٹائیگر بنانے کیلئے اقدامات جاری ہیں۔

حکومت غریب عوام کو ریلیف فراہم کرنے کیلئے پرعزم ہے اور کسی رکاوٹ کو برداشت نہیں کیا جائے گا۔دوسری جانب مسلم لیگ(ن) شعبہ خواتین اسلام آباد کی صدر، رکن قومی اسمبلی و وفاقی پارلیمانی سیکرٹری فرح ناز اکبر نے کہا کہ عالمی سطح پر پاکستان کی پذیرائی حکومت کی موثر خارجہ پالیسی کا نتیجہ ہے۔ انہوں نے کہا کہ ایران، امریکہ اور اسرائیل کے درمیان کشیدگی کے خاتمے کیلئے پاکستان کا کردار قابل تحسین ہے اور پاکستان پائیدار امن کا داعی ہے۔

انہوں نے کہا کہ قوم سیسہ پلائی دیوار بن کر دشمن کا مقابلہ کرے گی جبکہ سیاسی و عسکری قیادت کا مکمل ساتھ جاری رکھا جائے گا۔ ان کا کہنا تھا کہ حکومت تعلیم، صحت اور دیگر شعبوں میں عوام کو سہولیات فراہم کرنے کیلئے موثر اقدامات کر رہی ہے اور عوام مخالف عناصر کی منفی سیاست کو مسترد کر چکے ہیں۔