Live Updates

جنگ بندی میں توسیع کے لیے سنجیدہ مذاکرات ناگزیر ہیں، شیری رحمن

منگل 21 اپریل 2026 22:06

اسلام آباد (اُردو پوائنٹ اخبارتازہ ترین - این این آئی۔ 21 اپریل2026ء) نائب صدر پیپلز پارٹی سینیٹر شیری رحمان نے کہاہے کہ جنگ بندی میں توسیع کے لیے سنجیدہ مذاکرات ناگزیر ہیں۔ امریکی ٹی وی چینل بلوم برگ کو انٹرویو دیتے ہوئے انہوںنے کہاکہ پاکستان نے موجودہ صورتحال میں غیر معمولی سفارتی مہارت کا مظاہرہ کرتے ہوئے اپنے مفادات کو مؤثر انداز میں آگے بڑھایا ہے، ایران اور سعودی عرب جیسے خلیج کے بڑے توانائی ذخائر کے حامل ممالک کے ساتھ پاکستان کے مضبوط تعلقات اور صدر ڈونلڈ ٹرمپ کی جانب سے پاکستان کی قیادت پر اعتماد و حمایت کے بیانات اسے اہم سفارتی پوزیشن دیتے ہیں۔

شیری رحمان نے کہاکہ پاکستان کا سعودی عرب کے ساتھ مشترکہ دفاعی معاہدہ ہے جبکہ ایران ہمسایہ ہونے کے باعث اہم جغرافیائی و تجارتی حیثیت رکھتا ہے، پاکستان دونوں ممالک کے درمیان اعتماد کا ذریعہ بن کر جنگ کے خطرات کم کرنے میں اہم کردار ادا کر رہا ہے۔

(جاری ہے)

شیری رحمان نے کہاکہ جنگ بندی میں توسیع کے لیے سنجیدہ مذاکرات ناگزیر ہیں، آبنائے ہرمز کی صورتحال عالمی تجارت اور توانائی کو متاثر کر رہی ہے، موجودہ حالات میں جنگ بندی کے لیے سازگار اسٹریٹجک ماحول ضروری ہے۔

شیری رحمن نے کہاکہ پاکستان کو خطے میں موزوں ثالث سمجھا جاتا ہے اور فریقین کا اعتماد برقرار ہے، یہ اعتماد پاکستان کی سفارتی ساکھ اور اثر و رسوخ کو ظاہر کرتا ہے، پاکستان اور امریکہ کے تعلقات میں اتار چڑھاؤ رہا مگر روابط کبھی ختم نہیں ہوئے، اوباما دور میں افغانستان اور سرحدی معاملات کے باعث کشیدگی کا مرحلہ بھی آیااس دوران بعض واقعات پر پاکستان نے امریکی معافی کا مؤقف اختیار کیا، خصوصاً فائرنگ کے واقعات پر۔

۔ انہوںنے کہاکہ پاکستان کی کوشش ہے کہ جنگ بندی برقرار رہے اور مذاکرات کا ماحول بہتر ہو۔ شیری رحمان نے کہاکہ تہران اور واشنگٹن کے درمیان بداعتمادی کم کرنے کے لیے بات چیت اور رابطے ضروری ہیں، فریقین کشیدگی میں کمی چاہتے ہیں، پاکستان نے عملی منصوبہ پیش کیا ہے جس پر اعتماد حاصل ہوا، پاکستان نے سعودی عرب، ترکی، عمان اور مصر کو بھی سفارتی عمل میں شامل رکھا، ۔ انہوںنے کہاکہ پاکستان اس وقت خطے میں مرکزی اور ناگزیر کردار ادا کر رہا ہے۔