گورنرسندھ سید محمد نہال ہاشمی سے چیئرمین پی آئی ڈی سی ایل وسیم اختر باجوہ کی ملاقات، گرین لائن اور ترقیاتی منصوبوں پر تفصیلی بریفنگ

جمعہ 8 مئی 2026 19:04

ٰکراچی(اُردو پوائنٹ اخبارتازہ ترین - آن لائن۔ 08 مئی2026ء) سید محمد نہال ہاشمی سے پاکستان انفراسٹرکچر ڈیولپمنٹ کمپنی لمیٹڈ کے چیئرمین وسیم اختر باجوہ نے گورنر ہاؤس میں ملاقات کی، جس میں کراچی اور حیدرآباد کے جاری ترقیاتی منصوبوں، بالخصوص گرین لائن بی آر ٹی منصوبے پر تفصیلی بریفنگ دی گئی۔گورنر سندھ نے کہا کہ گرین لائن منصوبہ سابق وزیراعظم محمد نواز شریف کی جانب سے کراچی کے شہریوں کے لیے ایک اہم اور دیرپا تحفہ ہے، جس سے شہریوں کو جدید سفری سہولیات میسر آئیں گی۔

ملاقات میں بتایا گیا کہ وزیراعظم محمد شہباز شریف نے کراچی اور حیدرآباد کی ترقی کے لیے بالترتیب 1500 ملین اور 500 ملین روپے کے خصوصی پیکجز کی منظوری دی ہے۔ وفاقی فنڈنگ کے تحت کراچی میں 504 جبکہ حیدرآباد میں 17 ترقیاتی منصوبے مکمل کیے جائیں گے۔

(جاری ہے)

چیئرمین پی آئی ڈی سی ایل نے بریفنگ دیتے ہوئے بتایا کہ گرین لائن منصوبے کے فیز ٹو کو رواں سال کے اختتام تک مکمل کرنے کا ہدف مقرر کیا گیا ہے۔

انہوں نے این او سیز، یوٹیلیٹی شفٹنگ اور دیگر انتظامی رکاوٹوں سے بھی آگاہ کیا۔گورنر سندھ نے ترقیاتی منصوبوں میں حائل تمام رکاوٹیں فوری طور پر دور کرنے کی ہدایت دیتے ہوئے این او سیز اور دیگر منظوریوں کے حصول کے لیے ون ونڈو آپریشن کے فوری قیام پر زور دیا۔سید محمد نہال ہاشمی نے کہا کہ کراچی کے شہریوں کو جدید، محفوظ اور معیاری سفری سہولیات کی فراہمی حکومت کی اولین ترجیح ہے۔ انہوں نے گرین لائن منصوبے کا ہر 15 روز بعد جائزہ لینے کا اعلان بھی کیا۔گورنر سندھ کے مطابق شہری انفراسٹرکچر کی بہتری سے نہ صرف ٹریفک کے مسائل میں کمی آئے گی بلکہ معاشی سرگرمیوں میں بھی اضافہ ہوگا۔