شہداء کی توہین ناقابلِ قبول، مولانا فضل الرحمان قوم سے معافی مانگیں‘ سپیکر پنجاب اسمبلی

قومی مفاد، ریاستی اداروں، افواجِ پاکستان اور شہدا کے وقار کا تحفظ ہر صورت مقدم رہنا چاہیے‘ملک احمد خاں

بدھ 15 جولائی 2026 17:33

لاہور (اُردو پوائنٹ اخبارتازہ ترین - این این آئی۔ 15 جولائی2026ء) اسپیکر پنجاب اسمبلی ملک محمد احمد خان نے کہا ہے کہ شہداء کی تضحیک کسی صورت قابلِ قبول نہیں، مولانا فضل الرحمان کو اپنے حالیہ بیان پر پوری قوم سے معافی مانگنی چاہیے،قومی سلامتی سے متعلق معاملات پر تمام سیاسی رہنمائوں کو ذمہ داری اور احتیاط کا مظاہرہ کرنا چاہیے،قومی مفاد، ریاستی اداروں، افواجِ پاکستان اور شہدا کے وقار کا تحفظ ہر صورت مقدم رہنا چاہیے۔

پنجاب اسمبلی میں پریس کانفرنس سے خطاب کرتے ہوئے ملک محمد احمد خان نے کہا کہ سیاسی اختلافات اپنی جگہ تاہم قومی اداروں اور شہداء کے احترام پر کوئی سمجھوتا نہیں کیا جا سکتا، جمعیت علمائے اسلام (ف) ایک بڑی سیاسی جماعت ہے لیکن مولانا فضل الرحمان کے حالیہ بیان سے انہیں شدید اختلاف ہے۔

(جاری ہے)

انہوں نے کہا کہ افواجِ پاکستان کے خلاف توہین آمیز بیانات ناقابلِ برداشت ہیں اور شہداء کی قربانیاں پوری قوم کا فخر ہیں، قومی سلامتی سے متعلق معاملات پر تمام سیاسی رہنمائوں کو ذمہ داری اور احتیاط کا مظاہرہ کرنا چاہیے۔

سپیکر پنجاب اسمبلی نے کہا کہ دہشتگردوں کے ساتھ مذاکرات مناسب نہیں کیونکہ جو عناصر مساجد، امام بارگاہوں، عدالتوں اور عام شہریوں کو نشانہ بناتے ہیں، انہیں سیاسی جدوجہد کرنے والوں کے برابر نہیں رکھا جا سکتا۔ان کا کہنا تھا کہ بلوچستان میں دہشتگردی، ٹرین حملوں اور کلبھوشن یادیو کے اعترافات کے بعد ریاست کی ذمہ داری دہشتگردوں کے خلاف کارروائی کرنا ہے، نہ کہ ان سے مذاکرات کرنا، دہشتگرد عناصر کو دوبارہ ملک میں خوف و ہراس پھیلانے کی اجازت نہیں دی جا سکتی۔

ملک محمد احمد خان نے کہا کہ اگر کسی کا موقف فوج کے سیاسی کردار پر تنقید کا ہے تو وہ ہر دور میں یکساں ہونا چاہیے، سیاسی جماعتوں کو اپنے بیانات اور موقف میں تسلسل برقرار رکھنا چاہیے۔انہوں نے مزید کہا کہ انتخابی تنازعات کا حل سڑکوں کے بجائے آئینی اور قانونی فورمز، خصوصاً الیکشن ٹریبونلز، کے ذریعے نکالا جانا چاہیے، قومی مفاد، ریاستی اداروں، افواجِ پاکستان اور شہدا کے وقار کا تحفظ ہر صورت مقدم رہنا چاہیے۔