شاہی مسجد دہلی کے امام پر قاتلانہ حملہ ، بال بال بچ گئے، ملزم گرفتار ،حملہ آورنے نماز مغرب کے دوران سید احمد بخاری پر تیل کی بوتل پھینک کر انہیں آگ لگانے کی کوشش کی،بھائی طارق بخاری، ملزم کا نام کمال الدین اوراس کی عمر 30 سال سے زائد ہے جو مغربی بنگال کا رہائشی ہے، تحقیقات کی جارہی ہیں، پولیس

پیر 27 اکتوبر 2014 07:41

نئی دلی(اُردو پوائنٹ اخبار آن لائن۔27اکتوبر۔2014ء) بھارت کی تاریخی شاہی مسجد کے امام سید احمد بخاری قاتلانہ حملے میں بال بال بچ گئے جب کہ حملہ آور کو گرفتار کرلیا گیا۔

(جاری ہے)

بھارتی میڈیا کے مطابق سید احمد بخاری کے چھوٹے بھائی طارق بخاری کا کہنا تھا کہ حملہ آور نوجوان نے نماز مغرب کے دوران امام مسجد پر تیل کی بوتل پھینک کر انہیں آگ لگانے کی کوشش کی تاہم وہ ناکام رہا اور حملہ آور کو گارڈز اور نمازیوں نے بروقت پکڑ کر پولیس کے حوالے کردیا جبکہ سید احمد بخاری حملے میں محفوظ رہے۔

مقامی میڈیا کے مطابق حملہ آور کا نام کمال الدین اوراس کی عمر 30 سال سے زائد ہے جو مغربی بنگال کا رہائشی ہے۔دوسری جانب مقامی پولیس کا کہنا ہے کہ حملہ آور سے تحقیقات کی جارہی ہیں جس کے بعد ہی حملے کی وجوہات کا تعین کیا جاسکے گا۔