مسلم لیگ ن ڈیرہ غازی میں متاثر کن عوامی طاقت کا مظاہرہ کرنے میں کامیاب رہی

ڈیرہ غازی خان میں مسلم لیگ ن کے تاریخی جلسے نے مخالفین کے لیے خطرے کی گھنٹی بجا دی

منگل 24 جولائی 2018 00:30

ڈیرہ غازی خان(اُردو پوائنٹ اخبار آن لائن۔ پیر 23 جولائی 2018ء) :مسلم لیگ ن ڈیرہ غازی میں متاثر کن عوامی طاقت کا مظاہرہ کرنے میں کامیاب رہی۔ ڈیرہ غازی خان میں مسلم لیگ ن کے تاریخی جلسے نے مخالفین کے لیے خطرے کی گھنٹی بجا دی۔تفصیلات کے مطابق 2018 کے عام انتخابات میں اب محض 2 روز باقی رہ گئے اور تمام سیاسی جماعتیں اپنے اپنے مخالفین کو شکست دینے کے لیے تیار ہیں ۔

بڑے فیصلے سے 2 روز قبل تمام تر جماعتوں کی انتخابی مہم اپنے عروج پر پہنچ چکی ہے۔آج رات 12بجے تمام تر سیاسی جماعتیں اپنی انتخابی مہم تمام کرچکی ہیں۔اس موقع پر الیکشن 2018 کے سلسلے میں مسلم لیگ ن نے آخری جلسہ ڈیرہ غازی خان میں کیا۔ آج شہباز شریف نے ڈیرہ غازی خان میں تاریخی جلسہ کیا۔

(جاری ہے)

میڈیا رپورٹس کے مطابق مسلم لیگ ن ڈیرہ غازی خان میں متاثر کن عوامی طاقت کا مظاہرہ کرنے میں کامیاب رہی۔

جلسے میں ہزاروں افراد نے شرکت کی اور پنڈال مکمل طور پر لوگوں سے بھر گیا۔اس موقع پر جب جلسہ گاہ کے فضائی مناظر دکھائے گئے تو لوگوں کا ٹھاٹھیں مارتا ہوا سمندر تھا جو شہباز کا خطاب سننے کے لیے بے چین تھا۔اس حوالے سے ن لیگ کے متوالوں میں ایک خاص قسم کا جوش و جذبہ پایا جارہا تھا۔ اتنی بڑی تعداد میں کارکنان کا اٹک جلسے میں اکٹھا ہو جانے کومسلم لیگ ن کی ایک بہت بڑی کامیابی سمجھا جارہا ہے۔

اس موقع پر شہباز شریف بھی خاصے خوش اور پرجوش نظر آئے۔ ڈیرہ غازی خان میں جلسے سے خطاب کرتے ہوئے شہباز شریف نے کہا کہ ہم نے ڈی جی خان میں میڈیکل کالج، دانش سکول بنائے ۔ اس کے علاوہ بھی یہاں ترقیاتی کام کروائے۔ میاں نواز شریف اور اس کی بیٹی مریم اس وقت اڈیالہ جیل میں ہیں میاں نواز شریف کو دل کا عارضہ ہے وہ اپنی انتہائی علیل اہلیہ کو لندن میں چھوڑ کر رآئے ہیں ۔

اڈیالہ جیل میں ان کو زمین پر سلایا گیا ۔ کمرے میں شدیدگرمی ہے وہ دل کے مریض ہونے کے ناطے ان کو درست ادویات نہیں دی جا رہی ۔ ڈاکٹر کہنے کے باوجود نہیں آئے اگر نواز شریف کو درست طبی امداد نہ دی گئی تو پھر عوام ہونگے اور نگران حکومت کا گریبان ہو گا ۔ شہباز شریف نے کہا کہ جنوبی پنجاب سے نیب پریشر ڈال کر نواز لیگ کے امیدواروں کو توڑنے میں کوئی کسر نہیں چھوڑی لیکن ہمارے ساتھی ہمت کے ساتھ کھڑے ہیں ۔

عوام (ن) لیگ کے امیدواروں کو ووٹ دے کر کامیاب بنائیں ، انہوں نے کہا کہ چین میرے ساتھ مل کر پاکستان کی خدمت کرنا چاہتا ہے ۔ چین پاکستان کا مہربان دوست ہے ۔ اگر ن لیگ جیتی تو بھاشا ڈیم چین کی مدد سے تعمیر کریں گے ۔ شہباز شریف نے کہا کہ اس ملک کے ناانصافی پرمبنی نظام کے خلاف جدوجہد کروں گا ۔ اس ملک کو قائداعظم کا پاکستان بنائوں گا ۔ پاکستان کو ترقی کے اس مقام پر لے جائیں گے جہاں دنیا رشک کرے گی ۔

ہندوئوں کو مات دیں گے ۔ جنوبی پنجاب کے عوام لوٹوں کو بند کرکے تالے لگا دیں گے ۔ نوجوانوں کو آگے لے کر آئیں گے،سیاسی تجزیہ کاروں کے مطابق ڈیرہ غازی خان کے ووٹرز کی اتنی بڑی تعداد نے اس شہر سے مسلم لیگ ن کی فتح کا نقارہ بجا دیا،اگر یہ فتح کا نقارہ نہ ہو تو بھی یہ مسلم لیگ ن کی مقبولیت کا منہ بولتا ثبوت ہیں۔ اور یہ جلسہ اس بات کی علامت ہے کہ مسلم لیگ ن آج بھی عوامی طاقت کا بھرپور مظاہرہ کرنے کے قابل ہے۔