راشد خان پاکستان سپر لیگ سے دستبردار ہو گئے

لاہور (اُردو پوائنٹ اخبارتازہ ترین۔ 25 جنوری2024ء) راشد خان پاکستان سپر لیگ سے دستبردار ہو گئے، افغان آل راونڈر انجری کے باعث پی ایس ایل 9 میں شرکت نہیں کر پائیں گے۔ تفصیلات کے مطابق پاکستان سپر لیگ (پی ایس ایل) سیزن 9 میں لاہور قلندرز کو بڑا دھچکا لگ گیا، افغانستان کے راشد خان لیگ 2024 سے باہر ہوگئے۔ذرائع کے مطابق راشد خان کمر کی انجری کے باعث پاکستان سپر لیگ سے دستبردار ہوئے ہیں۔

واضح رہے کہ حال ہی میں انہوں نے کمر کی سرجری کروائی تھی، آسٹریلیا کی بگ بیش لیگ سے بھی دستبردار ہو گئے تھے جہاں انہیں ایڈیلیڈ اسٹرائیکرز کی نمائندگی کرنی تھی۔ راشد خان کمر کی تکلیف کا شکار ہیں اور انہوں نے آخری میچ آئی سی سی ورلڈ کپ میں کھیلا تھا اس حوالے سے افغانستان کرکٹ ٹیم کے کوچ جوناتھن ٹروٹ کا کہنا ہے کہ راشد خان کی واپسی کے لیے کوئی وقت نہیں دیا جا سکتا، ان کی کمر کی تکلیف کا خیال رکھا جا رہا ہے۔

(جاری ہے)

جوناتھن ٹروٹ نے کہا کہ وہ ایک موثر ترین کھلاڑی ہیں، ہمیں اس بات کا یقین کرنا ہے کہ وہ سو فیصد فٹ ہوں، راشد خان کی سرجری ہوئی ہے، واپسی میں جلدی کی ضرورت نہیں۔افغانستان ٹیم کے کوچ نے کہا کہ وہ ٹیم کے ساتھ ہیں اور بڑی محنت کر رہے ہیں، راشد خان کے ابھی مزید چیک اپ ہونے ہیں جس کے لیے وقت لیا جا چکا ہے۔ دسمبر 2023 کو پی سی بی نے تمام چھ فرنچائزز کی جانب سے برقرار رکھے گئے کھلاڑیوں کی فہرست کا اعلان کیا تھا جن میں لاہور قلندرز کے یہ کھلاڑی شامل تھے: شاہین شاہ آفریدی (پلاٹینم کیٹیگری)، حارث رؤف (ڈائمنڈ کیٹیگری) اور ڈیوڈ ویز (ڈائمنڈ کیٹیگری)، سکندر رضا (گولڈ کیٹیگری)، عبداللہ شفیق (گولڈ کیٹیگری) اور زمان خان (گولڈ کیٹیگری)، مرزا طاہر بیگ (سلورکیٹیگری) اور راشد خان (سلور کیٹیگری)۔

یاد رہے کہ پاکستان سپر لیگ کے نویں ایڈیشن کے میچز 17 فروری سے چار شہروں کراچی، لاہور، ملتان اور راولپنڈی میں کھیلے جائیں گے اور ایونٹ کا فائنل 18 مارچ کو کراچی کے نیشنل بینک اسٹیڈیم میں ہوگا۔34 میچوں پر مشتمل اس ٹی20 ٹورنامنٹ میں کراچی سب سے زیادہ 11میچوں کی میزبانی کرے گا جن میں کوالیفائر، دو ایلیمینیٹرز اور فائنل شامل ہیں۔لاہور کا قذافی اسٹیڈیم اور راولپنڈی کا پنڈی کرکٹ اسٹیڈیم 9، 9 میچز کی میزبانی کریں گے جبکہ ملتان میں پانچ میچز کھیلے جائیں گے۔

کراچی کنگز، لاہور قلندرز، ملتان سلطانز اور اسلام آباد یونائیٹڈ اپنے ہوم گراؤنڈ پر پانچ میچز کھیلیں گی جبکہ پشاور زلمی چار میچز راولپنڈی کرکٹ اسٹیڈیم میں کھیلے گی۔اسی طرح کوئٹہ گلیڈی ایٹرز کراچی، لاہور اور راولپنڈی میں تین، تین میچ کھیلے گی جبکہ ایک میچ ملتان کرکٹ سٹیڈیم میں 25 فروری کو ہوم سائیڈ سلطانز کے خلاف کھیلے گی۔