پاکستان اسٹیٹ آئل اورFAWموٹرز سی پیک کے تناظر میں پی ایس او فلیٹ کا معیار بلند کرنے کے لیے سرگرم

کراچی(اُردو پوائنٹ اخبارتازہ ترین - این این آئی۔ 05 اپریل2018ء) پاکستان اسٹیٹ آئل (پی ایس او) نے اپنے کیرج کنٹریکٹرز کے تعاون سے اپنے روڈ ٹرانسپورٹ پورٹ فولیو کو جدید خطوط پر استوار کرنے کے لیے اپنے فلیٹ میں جدید ترین گاڑیاں شامل کرنے کا سلسلہ جاری رکھا ہوا ہے تاکہ انسانی جانوں اور عوامی املاک کے تحفظ کو یقینی بنایا جاسکے۔ سڑکوں پر تحفظ کے نئے معیارات قائم کرنے والے جدید ترین گاڑیوں کے فلیٹ کوالحاج FAWموٹرز نے کراچی میں منعقدہ ایک شاندار تقریب میں پی ایس او کیرج کنٹریکٹرز کے حوالے کردیا۔

پی ایس او کے سی ای او وایم ڈی ،شیخ عمران الحق تقریب کے مہمان خصوصی تھے۔ تقریب میں سینیٹر تاج آفریدی سمیت اہم شخصیات نے شرکت کی جن میں FAWموٹرز کے نمائندے ، پی ایس او ، الحاج FAW پاکستان اور Hyndaiپاکستان کے اعلیٰ عہدیداران بھی شامل تھے۔

(جاری ہے)

تقریب میں بڑی تعداد میں کیرج کنٹریکٹرز نے بھی شرکت کی جنھوں نے پی ایس او کے فلیٹ سسٹم کے لیے جدید ترین ٹینکرکی خریداری کے لیے الحاج FAWکی جانب سے تین سالہ التوا کے ساتھ بلاسود ادائیگی کی سہولت کو سراہا ۔

آئل ٹینکرزکی اس جدید رینج کو آئل اینڈ گیس ریگولیٹری اتھارٹی (اوگرا) اینڈ نیشنل ہائی ویز اتھارٹی ( این ایچ ای) کے معیارات کے عین مطابق تیار کیاگیا ہے ۔یہ گاڑیاں پی ایس او کے سڑک کے ذریعے فیول کے نقل و حمل کے نظام کی استعداد اور کارکردگی میں اضافے کے ساتھ ساتھ ملک کے طول و عرض میں فیول کی بلا تعطل فراہمی میں مدد فراہم کریں گی۔ پی ایس او اور الحاجFAWموٹرز کا یہ اقدام سی پیک منصوبے کے پیش نظر نہایت اہمیت کا حامل ہے، کیونکہ سرحدپار تجارت میں صرف ریگولیٹری معیار ات کی حامل گاڑیوں کو حصہ لینے کی اجازت ہوگی۔

تقریباً آٹھ ہزار گاڑیوں پر مشتمل پی ایس او لاجسٹکس مینجمنٹ سسٹم ملک کا سب سے بڑا ٹینک لاری فلیٹ ہے جو ملک بھر میں پیٹرولیم مصنوعات کی نقل و حمل میں اپنا کردار ادا کررہا ہے۔ اگرچہ کمپنی ریل اور پائپ لائنز نیٹ ورک کے ذریعے بھی پیٹرولیم مصنوعات کی ترسیل کرتی ہے لیکن فیول کی نقل و حمل کا بنیادی ذریعہ سٹرک ہی ہے۔ تقریب سے خطاب کرتے ہوئے ایم ڈی اور سی ای او پی ایس او شیخ عمران الحق نے کہا: ’’پی ایس او اپنے صارفین کو بہترین خدمات فراہم کرنے کے لیے تمام ممکنہ اقدامات کرتی ہے۔

ہم اپنے ٹرانسپورٹ سسٹم میں بہتری اور معیار کے فروغ کے ساتھ ساتھ اسے بہت تیزی سے جدید خطوط پر استوار کررہے ہیں ۔ پی ایس او کو پیٹرولیم مصنوعات کی ترسیل کے عمل میں FAWکے اشتراک سے اوگرا اور این ایچ اے کے معیارات کے نفاذپر بے حد خوشی ہے۔ نئے ٹینکرز کی شمولیت سے نہ صرف پی ایس او کی ترسیل کی استعداد میں اضافہ ہوگا بلکہ کمپنی کو پاک چین اقتصادی راہداری جیسے میگا منصوبوں اور مسلسل معاشی ترقی کے نتیجے میں پیدا ہونے والے کاروباری مواقع سے مستفید ہونے کے لیے تیار ی کا موقع ملے گا۔

‘‘اس موقع پر اظہار خیال کرتے ہوئے پاکستان میں FAWکے نمائندے مسٹر نیان کا کہنا تھا: ’’FAWچین کا سرفہرست ٹرک برانڈ ہے جو صارفین کو محفوظ، قابل ِ بھروسا، بہترین اور عالمی معیار کی مصنوعات فراہم کرتا ہے۔ ہمارے لیے نہایت فخرکا مقام ہے کہ پاکستان کی صف اول کی آئل مارکیٹنگ کمپنی ، پی ایس او نے ہمیں پاکستان میں فیول کی نقل و حمل کے نظام کی بہتری کے لیے کردار ادا کرنے کا موقع دیا ہے۔

الحاج FAWکیرج کنٹریکٹرز کو تین سالہ التوا کے ساتھ ادائیگی کی آسانی کے ساتھ ریگولیٹری معیارات کے حامل FAWموورز اور سی آئی ایم سی آئل ٹینکرز کی خریداری کے لیے ون ونڈو سہولت فراہم کررہا ہے تاکہ پی ایس او کے کیرج کنٹریکٹرز کو پی ایس او کے ٹرانسپورٹیشن سسٹم میں معیاری گاڑیاں شامل کرنے میں آسانی حاصل ہو۔‘‘