برآمدات بڑھانے کے لئے ایف پی سی سی آئی اور ڈپلومیٹ کلب میں معاہدہ

ہفتہ 10 نومبر 2018 18:18

کراچی (اُردو پوائنٹ اخبارتازہ ترین - این این آئی۔ 10 نومبر2018ء) ایف پی سی سی آئی اور ڈپلومیٹ بزنس کلب کے مابین ہفتہ کے روز بین الاقوامی منڈیوں تک پاکستانی مصنوعات کی رسائی کیلئے بااہمی تعاون کے سمجھوتہ پر دستخط ہو گئے ہیں۔ ایف پی سی سی آئی کی جانب سے مفاہمت کی یاداشت پر ادارے کے صدر غضنفر بلور جبکہ ڈپلومیٹ بزنس کلب کی جانب سے اسکے صدر سفیرجاوید ملک نے دستخط کئے۔

اس موقع پر ایف پی سی سی آئی کے صدر غضنفر بلور نے کاروباری برادری سے خطاب کرتے ہوئے کہا کہ دونوں ادارے پاکستان کے کاروباری و اقتصادی مفادات کو قومی اور بین الاقوامی سطح پر فروغ دینے کیلئے مل کر کوششیں کریں گے اور دنیا کے مختلف ممالک کی کاروباری شخصیات کو پاکستان کی کاروباری برادری سے ملائیں گے۔

(جاری ہے)

انھوں نے کہا کہ پاکستانی مصنوعات بہت بہتر ہیں مگر انھیں صحیح طریقہ سے پیش نہیں کیا جا رہا ہے جس کی وجہ سے برامدات میں اضافہ نہیں ہو رہا ہے ۔

سفیرجاوید ملک نے اپنے خطاب میں کہا کہ ڈپلومیٹ بزنس کلب ایک عالمی تنظیم ہے جو برطانیہ، دبئی اور متحدہ عرب امارات سمیت پانچ ممالک میں کام کر رہی ہے اور اس کے ممبران میں برطانیہ کے ممبر پارلیمنٹ اور عرب و خلیجی ممالک کے اعلیٰ حکام شامل ہیں۔ یہ ادارہ مختلف سرگرمیوں کے ذریعے پوری دنیا سے بزنس لیڈرز، تاجر برادری، سرمایہ کاروں، سفارتکاروں اور دیگر ممتاز شخصیات کو آپس میں ملاتا ہے اور یہ پاکستان کی تجارت و سرمایہ کاری کو فروغ دینے کی کوششوں میں مدد کرتا ہے۔

ڈپلومیٹ بزنس کلب چیمبر کے ممبران کیلئے خلیجی ممالک میں کاروبار کے نئے تلاش کرنے کیلئے اپنا کردار ادا کرے گا اور نمائشیں لگانے میں بھی تعاون کرے گا۔انھوں نے ایف پی سی سی آئی کے کردار اور چئیرمین کوآرڈینیشن ملک سہیل کی خدمات کو سراہا جو سفارتکاروں اور کاروباری برادری کو آپس میں ملانے میں اہم کردار ادا کر رہے ہیں۔ اس موقع پر ایف پی سی سی آئی کے نامزد نائب صدور اعجاز عباسی، شیخ عبدالوحید، قربان علی خان، سرحد چیمبر کے صدر فیض محمد فیضی، اسلام آباد چیمبر کے سابق صدر مزمل صابری، کاشف شبیر، عدیل رئوف، علی زولفقار اور دیگر تاجر رہنما بھی موجود تھے۔