اسلام آباد چیمبر آف کامرس اینڈ انڈسٹری کا پی اے ایف ہسپتال کے ساتھ مفاہمت کی یادداشت پر دستخط

اسلام آباد ۔ (اُردو پوائنٹ اخبارتازہ ترین - اے پی پی۔ 16 دسمبر2019ء) اسلام آباد چیمبر آف کامرس اینڈ انڈسٹری نے پی اے ایف ہسپتال کے ساتھ مفاہمت کی یادداشت پر دستخط کئے جس کے مطابق پی اے ایف ہسپتال چیمبر کے ممبران، سٹاف اور ان کے زیر کفالت افراد کو خصوصی پیکیج کے تحت رعایتی قیمت پر او پی ڈی، ای پی ڈی اور ایمرجنسی میڈیکل سروسز فراہم کرے گا۔

اسلام آباد آف کامرس اینڈ انڈسٹری میں پیر کو تقریب منعقد ہوئی جس میں چیمبر کی ایم او یو پر عملدرآمد کرنے والی کمیٹی کے چیئرمین عبدالرحمن صدیقی اور پی اے ایف کے ڈائریکٹر ایئر کموڈور طارق نذیر نے سمجھوتے کی یادداشت پر دستخط کئے۔ چیمبر کے صدر محمد احمد وحید، سینئر نائب صدر طاہر عباسی اور نائب صدر سیف الرحمٰن خان بھی اس موقع پر موجود تھے۔

(جاری ہے)

معاہدے کے مطابق پی اے ایف ہسپتال اسلام آباد چیمبر آف کامرس اینڈ انڈسٹری کے ممبران و ملازمین اور ان کے زیر کفالت افراد کوخصوصی ڈسکائونٹپر علاج معالجہ کی مختلف سروسز فراہم کرے گا تاہم ان سروسز کے حصول کیلئے ممبران کو چیمبر کا درست ممبرشپ کارڈ یا لیٹر ہسپتال کو دکھانا ہوگا۔ معاہدے کے مطابق چیمبر کے زیر علاج ممبران کو ادویات ہسپتال فراہم کرے گا جبکہ مریضوں کو طے شدہ رعایتی قیمت خود ادا کرنی پڑے گی۔

معاہدے کے مطابق چیمبر کے ممبران، ملازمین اور ان کے زیر کفالت افراد ہسپتال کی جانب سے وقتاً فوقتاً نافذ کی جانے والی پالیسیوں، رولز اور طریقہ کار کی پاسداری کریں گے ۔ اس موقع پر اپنے خیالات کا اظہار کرتے ہوئے اسلام چیمبر آف کامرس اینڈ انڈسٹری کے صدر محمد احمد وحید نے کہا کہ چیمبر اپنے ممبران کے کاروباری مفادات کے تحفظ اور ان کو بہتر سے بہتر سہولیات فراہم کرنے کیلئے سرگرم عمل ہے اور پی اے ایف ہسپتال کے ساتھ علاج کی بہتر سہولیات کیلئے موجودہ معاہدہ اسی سلسلہ کی ایک کڑی ہے۔

انہوں نے کہا کہ چیمبر اپنے ممبران کو مزید بہتر سہولیات و سروسز فراہم کرنے کیلئے کوششیں جاری رکھے گا۔ انہوں نے معاہدات پر عملدرآمد کرانے والی چیمبر کی کمیٹی کے چیئرمین عبدالرحمن صدیقی کے کردار کو سراہا جن کی کوششوں سے پی اے ایف ہسپتال کے ساتھ معاہدہ طے پایا۔ پی اے ایف ہسپتال کے ڈائریکٹر ایئر کموڈور طارق نذیر نے اپنے خیالات کا اظہار کرتے ہوئے اس بات کی یقین دہانی کرائی کہ ان کا ہسپتال چیمبر کے ممبران ، ملازمین اور ان کے زیر کفالت افراد کو علاج معالجے کی بہتر ین سروسز فراہم کرنے کی کوشش کرے گا۔اس موقع پر دونوں جانب سے مستقبل میں اس معاہدے کے دائرہ کار کو مزید فیملی ممبران تک بڑھانے کے امور پر تبادلہ خیال بھی کیا۔