حیدرآباد چیمبر کے وفد کی سینئر سپرنٹنڈنٹ آف پولیس حیدرآباد ساجد امیر سدوزئی سے ملاقات

حیدرآباد(اُردو پوائنٹ اخبارتازہ ترین - این این آئی۔ 16 ستمبر2021ء)حیدرآباد چیمبر آف اسمال ٹریڈرز اینڈ اسمال انڈسٹری کے وفد کی صدر سلیم الدین قریشی کی سربراہی میں سینئر سپرنٹنڈنٹ آف پولیس حیدرآباد ساجد امیر سدوزئی سے اُن کے دفتر میں ملاقات کی، وفد نے ایس ایس پی کو عہدہ سنبھالنے پر مبارکباد پیش کی، صدر چیمبر سلیم الدین نے تاجر برادری کی طرف سے ایس ایس پی کو مکمل تعاون کی یقین دہانی کراتے ہوئے اُن کی توجہ حیدرآباد میں لاء اینڈ آرڈر کے نظام کو بہتر بنانے، آر آر ایف فورس کو فعال کرنے، ٹریفک کے مسائل پر قابو پانے اور شہر میں بڑھتے ہوئے چوری ڈکیتی بالخصوص کل جو صراف تاجر کراچی سے اپنا سونا فروخت کرنے حیدرآباد آیا تھا سے نامعلوم افراد نے اُس کو تھانہ سٹی کی حدود حیدر چوک پر روک لیا اور اُس سے اُس کا تھیلا چھین کر فرار ہونے میں کامیابی پر صدر چیمبر اور وفد نے اِس پر تشویش کا اظہار کیا، اُنہوں نے کہا کہ پچھلے دنوں جب نئے ایس ایس پی تعینات ہوئے تو اُنہوں نے چارج سنبھالنے کے فوراً بعد لاء اینڈ آرڈر کی صورتحال پر جس طرح قابو پایا وہ قابل تحسین ہے، تاجر برادری اُسے آج بھی قدر کی نگاہ سے دیکھتی ہے، صدر چیمبر نے کہا کہ تاجر برادری آپ کو اُنہی کے طرز پر لاء اینڈ آرڈر کی صورتحال پر قابو پاتے دیکھ رہی ہے، ایس ایس پی نے تمام مسائل کو سن کر جلد حل کرنے کی اور اپنے مکمل تعاون کی یقین دہانی کراتے ہوئے کہا کہ صراف تاجر سے جو سونا لوٹا گیا ہے اُس پر اُنہوں نے دو ایس پیز کی ڈیوٹی لگادی ہے اور وہ جلد ہی رپورٹ پیش کریں گے، وفد میں سینئر نائب صدر محمد الطاف میمن اور سابق صدر محمد اکرم انصاری موجود تھے۔

Your Thoughts and Comments