تاجر کل بینکوں سے مکمل طور پر کاروبار بند کرکے غیراعلانیہ ہڑتال پر مجبور کردیں،عتیق میر

کراچی(اُردو پوائنٹ اخبار تازہ ترین۔ 03 ستمبر۔2015ء) آل کراچی تاجر اتحاد کے چیئرمین عتیق میر نے تاجروں سے اپیل کی ہے کہ جمعہ 4ستمبر کو بینکوں سے مکمل طور پر کاروبار بند کرکے انھیں غیراعلانیہ ہڑتال پر مجبور کردیں، آمدنی کے بجائے امانتوں پر ٹیکس کے خلاف احتجاجی تحریک کامیابی تک جاری رہیگی، چوری اور سینہ زوری کا قانون نہیں چلنے دینگے، بینک ٹرانزیکشن ٹیکس کے خلاف جنگ "ہم نہیں یا تم نہیں"کی بنیاد پر لڑیں گے، انھوں نے کہا کہ FBRکا غیرلچکدار اور جارحانہ رویہ اشتعال انگیز ہے، بینک ٹرانزیکشن ٹیکس کے خلاف احتجاجی تحریک کی قیادت کرنے والے تاجر نمائیندگان کو دھمکانے اور ڈرانے کی کوشش کی جارہی ہے جس کی بھرپور مذمت کرتے ہیں، IMFکے ایجنٹ سن لیں تاجر کسی دباؤ میں نہیں آئینگے، تاجروں پر مزید سختی کی گئی تو سڑکوں پر آجائینگے، جمہوریت پر اعتبار ختم آمریت کو نجات دہندہ سمجھنے پر مجبور ہونگے، انھوں نے کہا کہ جنرل راحیل شریف نے ملک میں امن و امان بہتر کرکے کاروباری حالات سازگار بنادیئے لیکن میاں محمد نواز شریف کے چہیتے وزیرِخزانہ اسحاق ڈار کے اقدامات معیشت کُش ہیں، جمعرات کو شہر کی مختلف مارکیٹوں کے نمائیندگان سے ملاقات کے بعد عتیق میر نے پریس و میڈیا کو جاری کیئے گئے ایک بیان میں کہا کہ وزیرِ خزانہ کا صرف ایک مثبت فیصلہ تاجروں کے ملک گیر انتشار اور کشیدگی کو ختم کرسکتا ہے لیکن ان کی ضد اور انا نے بینکوں کے کاروبار اور تجارت کو ناقابلِ تلافی نقصان سے دوچار کردیا ہے،انھوں نے تاجروں سے اپیل کی کہ احتجاج کے اگلے مرحلے میں بینک ٹرانزیکشن ٹیکس کے خلاف بدھ 9ستمبر کی ملک گیر ہڑتال کو کامیاب بناکر اپنی مکمل یکجہتی اور اتحاد ثابت کردیں، انھوں نے واضح کیا کہ FBRنے ٹیکس اصلاحات کے تحت تاجر نمائیندگان کی تجاویز پر عمل کیا تو ٹیکس نیٹ میں اضافے کی ملک گیر تحریک چلائینگے اور نیٹ سے فرار اختیار کرنے والے ٹیکس دہندگان کو واپس اور نئے ٹیکس گذاروں کو نیٹ میں لانے کی بھرپور کوشش کرینگے، انھوں نے کہا کہ FBRکی پالیسیوں سے صاف ظاہر ہے کہ وزارت خزانہ کو ملکی ترقی کے بجائے IMFسے قرض وصولی کی فکر ہے،FBRٹیکس گذاروں کی مشکلات ختم کرنے کے بجائے روائتی سختی اختیار کررہا ہے جس کے نتائج انتہائی خطرناک اور بھیانک ثابت ہوسکتے ہیں،انھوں نے کہا کہ FBRکی انتہائی منفی پالیسیوں اور غیرسنجیدہ اقدامات کے نتیجے میں ملک کی معاشی و اقتصادی ترقی کے اشاریئے منفی ہورہے ہیں، غیرحقیقی، فرضی اور غلط اعداد و شمار جاری کرکے اپنی کارکردگی کو مثالی اور سود مند ظاہر کرنے کی کوشش کی جارہی ہے جبکہ ملک بتدریج معاشی مشکلات اور زبوں حالی کا شکار ہورہا ہے،انھوں نے کہا کہ عسکری اداروں کی جانب سے کراچی سمیت ملک بھر میں بحالی امن کی کامیاب کوششوں کے باوجود ملک کی معیشت ترقی کی جانب گامزن نہ ہوسکی جس کی پوری ذمے داری جموری حکومت کی معاشی اور اقتصادی پالیسیاں ہیں، انھوں نے کہا کہ مملکتوں کی معاشی کمزوری فوجی طاقت اور عسکری کارکردگی کو بھی متاثر کرتی ہے۔