سستی لیبر اور ابھرتی ہوئی مارکیٹ ہونے کی وجہ سے پاکستان جاپان کے سرمایہ کاروں کی اگلی منزل ہو سکتا ہے

اسلام آباد ۔ (اُردو پوائنٹ اخبارتازہ ترین - اے پی پی۔ 27 فروری2017ء) پاکستان میں جاپانی سفارتخانہ کے فرسٹ سیکرٹری اور ہیڈ برائے پبلک افیئرز اور کلچرل افیئرز کسٹونوری آشیدہ نے کہا ہے کہ سستی لیبر کاسٹ اور کاروبار کیلئے ابھرتی ہوئی مارکیٹ کی وجہ سے پاکستان جاپان کے سرمایہ کاروں کیلئے ان کی اگلی منزل ہو سکتا ہے۔ ان خیالات کا اظہار انہوں نے اسلام آباد چیمبر آف کامرس اینڈ انڈسٹری کے دورہ کے موقع پر تاجر برادری سے خطاب کرتے ہوئے کیا۔

انہوں نے کہا کہ پاکستان میں کاروبار کرنے والی جاپان کی کمپنیاں کافی مطمئن ہیں اور اگر پاکستان میں سیکورٹی کی صورتحال مزید بہتر ہو جائے تو جاپان کی مزید کمپنیاں پاکستان آ سکتی ہیں۔ پاکستان اور جاپان کے درمیان آزاد تجارت کے معاہدہ کے بارے میں اظہار خیال کرتے ہوئے انہوں نے کہا کہ یہ معاہدہ دونوں ممالک کیلئے فائدہ مند ہونا چاہئے کیونکہ اگر صرف ایک ملک ایسے معاہدہ سے زیادہ فائدہ اٹھائے گا تو انصاف کے تقاضے پورے نہیں ہوں گے۔

(جاری ہے)

سی پیک کے حوالہ سے بات کرتے ہوئے انہوں نے کہا کہ اگر سی پیک پاکستان اور جاپان دونوں کیلئے فائدہ مند ہوا تو جاپان اس منصوبے میں شرکت کیلئے تیار ہو گا۔ انہوں نے کہا کہ پاکستان کے آم جاپان کے عوام میں مقبولیت حاصل کر رہے ہیں ۔ انہوں نے مزید کہا کہ جاپان کے ساتھ کاروبار کو فروغ دینے کیلئے پاکستان کی تاجر برادری کو چاہیے کہ وہ جاپان کی مارکیٹ کا اچھی طرح مطالعہ کریں اور اس کو سمجھ کر تجارت کو فروغ دینے کی کوشش کریں۔

کسٹونوری آشیدہ نے کہا کہ پاکستان کے اہم ایئرپورٹس پر چہرے کو پہچاننے والا سسٹم نصب کرنے کیلئے جاپان پاکستان کو 453ملین روپے کی امداد دے گا تاکہ ایئرپورٹس پر سیکیورٹی کی صورتحال کو مزید بہتر کیا جائے۔انہوںنے کہا کہ پاکستان اور جاپان کے درمیان سفارتی تعلقات کی 65ویں برسی منانے کیلئے تیاریاں جا ری ہیں جن کے تحت کئی کلچرل پروگرام کا اہتمام کیا جائے گا۔

انہوں نے کہا کہ اس موقع پر جاپان کے طلبا کا پاکستان کا دورہ کرنے کی منصوبہ بندی کی جا رہی ہے اور وہ کچھ روز پاکستان کے کسی گھر میں بھی رہیں گے تا کہ وہ پاکستان کے کلچر اور ثقافت کو بہتر طور پر سمجھ سکیں۔ اس موقع پر خطاب کرتے ہوئے اسلام آباد چیمبر آف کامرس اینڈ انڈسٹری کے سینئر نائب صدر خالد ملک نے کہا کہ پاکستان اور جاپان کے درمیان عمدہ سیاسی تعلقات قائم ہیں جس سے استفادہ حاصل کرتے ہوئے دونوں ممالک کے درمیان تجارتی و اقتصادی تعلقات کو مزید بہتر کرنے پر توجہ دی جائے۔

انہوںنے کہا کہ جاپان کی کئی کمپنیاں پاکستان میں کامیابی کے ساتھ کاروبار کر رہی ہیں اور اس بات پر زور دیا کہ جاپان کی مزید کمپنیاں پاکستان مین سرمایہ کاری اور جوائنٹ وینچرز کے مواقع تلاش کرنے پر توجہ دیں کیونکہ پاکستان غیر ملکی سرمایہ کاروں کیلئے ایک پرکشش مارکیٹ ہے۔ انہوں نے کہا کہ پاکستان کے طلبا جاپان کا دورہ کرتے رہتے ہیں اور ضرورت اس بات کی ہے کہ جاپان کے طلباء بھی باقاعدگی کے ساتھ پاکستان کا دورہ کیا کریں جس سے ایک دوسرے کے کلچر اور مارکیٹ کو سمجھنے میں مدد ملے گی اور کاروباری تعلقات بھی مزید مستحکم ہوں گے۔

اسلام آباد چیمبر آف کامرس اینڈ انڈسٹری کے نائب صدر طاہر ایوب نے اس بات پرزور دیا کہ جاپان پاکستان کے ساتھ زراعت کے شعبے میں تعاون بڑھائے کیونکہ دونوں ممالک اس شعبے میں کاروبار کو فروغ دینے کی عمدہ صلاحیت رکھتے ہیں۔ سید ندیم منصور، راجہ عبدالمجید، سعید احمد بھٹی، نوید ملک، ناصرہ علی اور دیگر نے بھی اپنے خیالات کا اظہار کیا اور دونوں ممالک کے درمیان تجارتی تعلقات کو بہتر کرنے کی ضرورت پر زور دیا۔