ترقیاتی و تعمیراتی منصوبے روشن کل ضمانت

راحت جاوید:
لاہور اورنج لائن میٹرو ٹرین پاکستان میں اپنی نوعیت کا پہلا اور منفرد منصوبہ ہے۔ یہ منصوبہ پنجاب کے عوام کیلئے خصوصی جبکہ پاکستان کے عوام کیلئے عمومی طورپر انتہائی اہمیت کا حامل ہے۔ پنجاب حکومت کے دیگر ترقیاتی منصوبوں کی طرح لاہور اورنج لائن میٹرو ٹرین بھی یقینا فن تعمیر اور اعلیٰ معیار کا شاہکار ہوگا جس سے لاہور میں دور حاضر کی تعمیروترقی میں ایک اضافہ ہوگا۔

یہ منصوبہ پایہ تکمیل پر پہنچنے کے بعد عوام کو ٹرانسپورٹ کی جدید ترین سہولیات فراہم کرنے کیساتھ ساتھ ٹرانسپورٹ کلچر میں واضح تبدیلی آئے گی۔ بڑے ترقیاتی منصوبوں کے آس پاس کے علاقوں میں گردوغبار اور جگہ جگہ رکاوٹوں کی وجہ سے عوام وقتی طورپر اگرچہ بہت سے مسائل و مشکلات کا شکار ہوتے ہیں انہیں روزمرہ زندگی کے معمولات میں دشواری کا سامنا بھی کرنا پڑتا ہے۔

(جاری ہے)

مگر حفاظتی تدابیر اور انتظامات کے سلسلے میں بھرپور آگاہی مہم چلا کر لوگوں کی رہنمائی کرنا بھی حکومت کی ذمہ داری ہے۔گزشتہ پانچ برسوں سے لاہور میں کیا جانے والا تعمیراتی و ترقیاتی کام اسے دوسرے صوبوں سے امتیازی و بالاتر بنا رہا ہے جس کی بدولت لاہور کی عوام آئندہ چند سالوں میں مزید ترقی اور خوشحالی کے دور میں داخل ہو جائیں گے۔ پنجاب کے بڑے شہروں میں نئی فیڈر بس سروس کی دستیابی سے ٹرانسپورٹ کے شعبے میں کافی بہتری آئی ہے۔

ان بسوں کا کرایہ انتہائی معقول اور بسوں کی تعداد کافی زیادہ ہونے کی بنا پر عوام کو آرام دہ سف کی سہولت بہم پہنچانا ہے۔ جس کے بے بہا فوائد میں سے سب سے اہم سڑکوں پر ٹریفک کا دباوٴ کم کرنا اور دھواں چھوڑتی گاڑیوں سے ماحول کو صاف بنانا ہے۔
لاہور ٹرانسپورٹ کمپنی LTC شہر میں اربن روٹس اور نواحی علاقوں میں مسافروں کو عالمی معیار کی آرام دہ، محفوظ اور معیاری ایئرکنڈیشن بس سروس مہیا کرر ہی ہے۔

لاہور میں پبلک ٹرانسپورٹ کے شعبہ میں سرمایہ کاری کے وسیع مواقع موجود ہیں۔ ایل ٹی سی کی مربوط منصوبہ بنی کے بعد آئندہ سالانہ ڈویلپمنٹ پروگرام میں سکول بس پروجیکٹ‘ ڈرائیورز ٹریننگ پروگرام‘ پبلک ٹرانسپورٹ انفراسٹرکچر کے حامل منصوبہ جات شامل کئے گئے ہیں۔ضرورت اس امر کی ہے کہ عوام الناس تک آگاہی و معلومات کی فراہمی کیلئے اقدامات کئے جائیں تاکہ وہ مسائل سے چھٹکارا پا سکیں۔

اس کیلئے عوامی نمائندوں کی زیادہ سے زیادہ شمولیت ان منصوبوں کی افادیت بڑھا سکتی ہے۔ کیونکہ اگر عوام تمام صورتحال سے آگاہ ہوگی تو یقینا وہ ان سے ضرور مستفید ہونے کا سوچے گی۔ جس طرح سی پیک کی کامیاب تکمیل نا صرف پاکستان کیلئے ترقی کے دروازے کھولے گی اسی طرح مقامی سطح پرمکمل ہونے والے منصوبوں کے بھی عوام کے معیار زندگی پر اچھے اثرات مرتب ہوں گے۔

ملک کے عوام کسی حد تک اس تمام صورتحال سے آگاہ ہیں اور باقی صوبوں کی حالت زار ان کے سامنے ہے۔ ملکی سطح پر اگر دیکھا جائے تو پاکستان کے سارے صوبوں میں وزیراعلیٰ پنجاب کے عوامی منصوبوں کی بازگشت سنائی دیتی ہے۔ چترال سے کراچی تک لوگ اپنے صوبوں میں بھی ایسی ہی ترقی کے خواہاں ہیں۔اس لئے وطن عزیز کیلئے ضروری ہے ان تمام معاملات سے آگاہی کے بعد تعمیراتی کاموں میں اپنا حصہ ڈالیں اور ان کاموں کو جلد از جلد مکمل ہونے میں حکومت کے ساتھ تعاون کریں نا کہ اور مشکلات کو بڑھایا جائے۔ اگر مشکلات و مسائل کو عارضی سمجھتے ہوئے آئند کیلئے مفید تسلیم کر لیا جائے تو کوئی وجہ نہیں ان پر تنقید کافی حد تک کم ہو جاتی ہے۔