مگر یہ راز آکر کھل گیا

ایک شخص اپنے شہر کے بڑے بازار کا بہت نامی گرامی بیو پاری تھا اور اس کے کاروبار کی کامیابی کا رازسب کو معلوم تھا کہ اس کی اور اس کے دوست کی شراکت داری نے ان کے کاروبار کو ترقی کی بلندیوں پرپہنچا دیا تھالوگ ان کی دوستی اور شراکت پر رشک کرتے تھے دن گزرتے جا رہے تھے اور اس کا کاروبار اس کے شہر سے نکل کر ملک کے تمام بڑے شہروں میں پھیل چکا تھا پورے ملک میں وہ دونوں کاروباری شراکت دار کی حیثیت سے ایک نمایاں پہچان بنا چکے تھے کہ ایک دن سب کچھ بدل گیاوہ دونوں اپنے کاروبار کے حساب کتاب میں مصروف تھے کہ کسی غلط فہمی کی وجہ سے ان کے درمیان تلخ کلامی شروع ہوئی اور یہ تلخ کلامی بڑھتے بڑھتے لڑائی جھگڑے میں بدل گئی وہ شخص لڑائی کے دوران بھی اپنے دوست کی دوستی کا لحاظ رکھتے ہوئے اس کی کڑوی کسیلی باتوں کو نظر انداز کر کے معاملہ ٹھنڈا کرنے کی کوشش کر رہا تھا کہ اس کے دوست نے گالم گلوچ شروع کر دی اور اسی گالم گلوچ میں اس کی ماں کے متعلق نازیبا الفاظ استعمال کیے جسے وہ شخص برداشت نہ کر سکا اور اس نے بھی جوابی وار کرتے ہوئے ہاتھا پائی شروع کر دی بات اتنی بڑھی کہ لوگوں کو بیچ بچاؤ کروا کر انہیں ٹھنڈا کرنا پڑا لیکن اس شخص کا غصہ ٹھنڈا ہونے میں ہی نہیں آ رہا تھا اس کی بس ایک ہی رٹ تھی کہ ''میری ماں کے متعلق نازیبا الفاظ کرنے کی ہمت کیسے ہوئی'' لوگوں نے ان کا جھگڑا ختم کروانے کی کوشش کی صلح کروانا چاہی لیکن وہ شخص ضد پر اڑ گیا کیونکہ ماں سے بڑھ کر عزیز دنیا میں کوئی نہیں ہوتا اور دوست کی زبان سے ماں کے متعلق نامناسب الفاظ نے اس کے دل کو شدید صدمہ پہنچایا تھا وہ سب کچھ چھوڑ چھاڑ کر اس جگہ کو چھوڑ کر چلا گیا دوست رشتے دار سب نے معاملہ رفع دفع کرنے کی کوشش کی لیکن ہر اولاد یہ سمجھتی ہے کہ ماں کے متعلق کسی کے غلط الفاظ سننا دنیا کا سب سے تکلیف دہ لمحہ ہوتا ہے اور اس شخص کی یہ تکلیف کم ہونے میں ہی نہیں آ رہی تھی کیونکہ اس کے دوست نے اس کی ماں کے متعلق ایک مجمعے میں نامناسب الفاظ کا استعمال کیا جس کے نتیجے میں دوستی تو ختم ہوہی گئی لیکن اس شخص نے اپنا کاروبار بھی علیحدہ کر لیا اس کے اس فیصلے نے اس وقتی طور پر بہت نقصان پہنچایا لیکن حالات کے ساتھ سب کچھ ٹھیک ہو گیا سوائے ان دونوں کے تعلقات کے کیونکہ وہ شخص اپنے سابقہ دوست کو دیکھنے تو کیا اس کا نام تک سننے کا بھی روادار نہ تھا اور اس کے کاروبار کے معمول پر آتے ہی اس کے دوست تو دوست دشمن بھی اس کے اس فیصلے کو سراہنے لگے جبکہ اس کے سابقہ دوست کو روز بروز نقصان کا سامنا کرنا پڑ رہا تھا
قارئین دنیا میں ماں باپ اور اولاد سے بڑھ کر محترم و مکرم کوئی نہیں ہوتا لیکن ایک ہستی ایسی ہے جو ماں باپ سے بھی بڑھ کر عزیز ہے اس ہستی نے اپنی مبارک زبان و الفاظ میں خود یہ بات واضح فرمائی:
''کوئی شخص اس وقت تک مومن نہیں ہو سکتا جب تک میں اس کے نزدیک اس کے ماں باپ اولاد اور تمام لوگوں سے بڑھ کر محبوب نہ ہو جاؤں''
بے شک رسول محترمﷺ وہ عظیم ہستی ہیں جن پر ہر مسلمان اپنے ماں باپ مال اولاد اور جان سب قربان کر سکتا ہے اور جو مسلمان اس بارے میں کوئی ابہام رکھتا ہے وہ جان لے کہ اللہ تعالی قرآن پاک میں ارشاد فرماتا ہے:
''تم فرماؤ اگر تمہارے باپ اور تمہارے بیٹے اور تمہارے بھائی اور تمہاری عورتیں اور تمہارا کنبہ اور تمہاری کمائی کے مال اور وہ سودا جس کے نقصان کا تمہیں ڈر ہے اور تمہارے پسند کے مکان یہ چیزیں اللہ اور اس کے رسول اور اس کی راہ میں لڑنے سے زیادہ پیاری ہوں تو راستہ دیکھو (انتظار کرو) یہاں تک کہ اللہ اپنا حکم لائے اور اللہ فاسقوں کو راہ نہیں دیتا۔

(جاری ہے)

''(پ10،التوبة:24)
لیکن افسوس صد افسوس کہ ہم میں اکثریت اس حکم کو بھول گئی ہم دنیا داری میں ایسا پڑے کی ناموس رسالتﷺ پر زبانیں دراز کرنے والوں کو بھی گلے سے لگائے بیٹھے ہیں اورناموس رسالتﷺ کے خلاف بولنے والوں کا دفاع کرنے لگے دفاع عمل سے کیا جائے یا زبان سے وہ دفاع ہی کہلائے گا بالکل اسی طرح جیسے احتجاج زبان سے کیا جائے یا عمل سے احتجاج کہلاتا ہے۔

یہاں احتجاج سے ایک وعدہ یاد آگیا بلکہ مجھے تصحیح کرنے دیں''ایک اور وعدہ ''جو ایفا نہ ہو سکا
ایک اور معاہدہ اپنے انجام کو پہنچے بغیر ٹوٹ گیا
ایک بار پھروعدہ خلافی نے تحریک کے لوگوں کو جیل اور عام عوام کو مشکل میں ڈال دیا
طرفہ لسان ہیں وہ وعدہ خلافی کے سبب
جب بگڑتا ہوں کوئی بات بنا لیتے ہیں
حکومت کی مثال اس وعدہ خلاف شخص کی سی ہے جو وعدہ توڑنے سے پہلے ساری احتیاطی تدابیر اختیار کر لیتا ہے حالانکہ غیر جانبداری سے دیکھا جائے تو تحریک لبیک نے حکومت سے ہر طرح کا تعاون کیا ہے جس طرح حکومت پاکستان نے چاہا اسی طرح کا معاہدہ کیا اور جب وعدہ پورا کرنے کا وقت آیا تو حکومت نے پھر وعدہ خلافی کی اور اسی پہ بس نہیں کیا جن سے معاہدہ کیا گیا اان کو گرفتار کر لیا گیا کیا ریاست مدینہ کا نعرہ لگانے والی حکومت نے اس قدر حساس موضوع پہ ایک بڑی سطح پر جس ڈھٹائی سے وعدہ خلافی کی ہے کیا یہ ریاست مدینہ کے تصور کے شایان شان ہے؟ کیا یہ واضح پیغام نہیں ہے کہ آئندہ ہم پہ اعتماد نہ کیا جائے ؟
 ناموس رسالت پہ آواز اٹھانے والی آوازوں کو یوں دبایا جانا یقینا ایک ایسا افسوسناک عمل ہے جس کی ہر مسلمان مخالفت کرتا ہے دوسری جانب ملک کی بگڑتی صورتحال کی ذمہ داری وعدہ توڑنے والوں پر عائد ہوتی ہے کیونکہ تحریک لبیک نے پہلے ہی وعدہ خلافی کی صورت میں احتجاج کی کال دی تھی وہی وعدہ جس کے ایفاء ہونے کا تحریک لبیک نے پانچ مہینے انتظار کیا اگر تحریک کو احتجاج کرنا ہی مقصود ہوتا تو وہ اتنا لمبا عرصہ وعدہ ایفاء ہونے کا انتظار ہرگز نہ کرتے لیکن یہاں مقصد احتجاجی مظاہروں اور توڑپھوڑ کی طرف داری ہر گز نہیں بلکہ یہ باور کروانا ہے کہ ساری دنیا میں یہ سفارتی اصول ہے کہ آپکو کسی ملک سے اختلاف ہو یا پھر کوئی ملک آپ کی آخری حد کو پار کر رہا ہے تو آپ اپنا سفیر واپس بلا لیں اور ان کا سفیر انہیں واپس بھیج دیں کیونکہ سفارتی تعلقات کی معطلی کو پوری دنیا میں احتجاج کا مہذب ترین طریقہ سمجھا جاتا ہے جو اس بات کا ثبوت ہوتا ہے کہ کچھ ایسا ہوا ہے جو حل طلب ہے اور جسے حل نہ کیا گیا تو بات بگڑ سکتی ہے تو کیا ہم تعلقات کو بحال کر کے یہ تاثر دینا چاہتے ہیں کہ بطور ریاست ناموس رسالتﷺ کو اہم نہیں سمجھتے؟
ناموس رسالتﷺ جیسے حساس ترین مسئلے پر قلم اٹھانا یقینا ایک مشکل امر ہے لیکن یہ ایک ایسا معاملہ ہے کہ اس پر خاموش بیٹھنا غیرت ایمانی کوہر گز گوارا نہیں اور ایسے کسی بھی معاملے پر پرامن احتجاج ہر مسلمان کا حق ہے اور فرانس کی اس گستاخی آمیز جرات کے بعد یہ ضروری ہے ہم کسی بھی صورت میں اس گھناؤنے عمل کے خلاف اپنا احتجاج ریکارڈ کروا ئیں تاکہ روز روز کا یہ تماشا بند ہو سکے اور اس کے لیے اس مذموم عمل کے خلاف اپنی زبان، عمل یا قلم کے ذریعے آواز اٹھانا اتنا ہی ضروری ہی جتنا سانس لیناورنہ ہم بروز قیامت اپنے آقاﷺ کو کیا منہ دکھائیں گے حاصل بحث اس بات کے ساتھ کرتی ہوں کہ اگر ناموس رسول ﷺ محفوظ نہیں تو امت کو جینے کا کوئی حق نہیں۔