خواتین ہراول دستے کا کردار ادا کریں

اور آخر وہ وقت آگیا جس کا خدشہ تھا‘ جس کو روکنے کیلئے ڈاکٹرزالتجائیں کررہے تھے اور احتیاطی تدابیر اختیار کئے جانے پر زور دیا جارہا تھا۔ عید سے قبل جب لاک ڈاؤن میں نرمی کی بات کی جارہی تھی اس وقت اس خدشے کا بھی اظہار کیا جارہا تھا کہ یہ نرمی کسی بڑے خطرے کا شاخسانہ ثابت ہوکر رہے گی اور یہ خدشہ بدترین صورت میں ہمارے سامنے آگیا۔

اس وقت ملک کرونا کی بدترین صورتحال کی بنیادی وجہ کیا ہے؟ لاک ڈاؤن میں نرمی یا عوامی رویہ؟ میرا ووٹ دوسرے کے حق میں ہے کیوں کہ میں نے دیکھا ہے عوام کو بے حسی کی عملی تفسیر بنے ہوئے۔ لاک ڈاؤن میں نرمی کا مقصد عوام کوبھوک اور افلاس سے بچاناہے لیکن لاک ڈاؤن میں نرمی کرتے ہی ایسا لگا کہ لوگوں کو آزاد اور کرونا کو لاک ڈاؤن کرد یا گیا۔

(جاری ہے)

بازاروں اور شاہراہوں پر چہلتے ہوئے‘ احتیاطی تدابیر سے مبرا لوگوں کو دیکھ کر کوئی بھی یہ نہیں کہہ سکتا تھاکہ یہ اس ملک کی عوام ہے جہاں صحت کی بنیادی سہولیات سے بھی محروم ہے۔
مرد حضرات کو دکانوں‘ شاہراہوں اور دیگر جگہوں پر دیکھ کر خود کو تسلی دی اپنے خاندان کو معاشی مسائل سے بچانے کیلئے ان لوگوں کا باہر نکلنا نہایت ضروری ہے لیکن شاپنگ سینٹروں اور بازاروں میں چھوٹے چھوٹے بچوں کے ساتھ خریداری کرتی ہوئی خواتین کو کیا کہا جائے؟
گروسری اسٹور میں ایک ایسی ہی خاتون کوتین چھوٹے بچوں کے ہمراہ دیکھ کر میں خاموش نہ رہ سکی۔

میں نے اس سے کہا کہ ان بچوں کومارکیٹ میں اپنے ہمراہ لانا خطرناک ہوسکتا ہے اور وہ بھی کسی احتیاطی تدبیر کے تو انہوں نے مسکراتے ہوئے بڑی ادا سے کہا کہ بچوں کی ضدکے آگے کون ٹہرسکا ہے اور انہیں ماسک پہنانا بھی مشکل ترین کام ہے۔ میں مزید کچھ کہتی لیکن لاحاصل سمجھ کر آگے بڑھ گئی۔
لاک ڈاؤن کے دوران بازاروں میں جس طرح خواتین کو قطاریں لگاکر خریداری کرتے ہوئے تواسی وقت دل اس بات پر ایمان لے آیا کہ آنے والے چند دن اس ملک کے لئے انتہائی خطرناک ہوں گے۔

یہ بھی دلچسپ لطیفہ ہے کہ لاک ڈاؤن کھلنے کے تین دن کے اندر اندر ملک بھر کی خواتین نے ریکارڈ خریداری کرڈالی۔نئے کپڑوں کے بغیر عیدنہ منانے کی ضد کرنے والی یہ بے فکر ‘ بے حس اوربے شعور خواتین تسلسل سے یہ بات سن رہی تھیں کہ اگر یہ وبا پھیل گئی تو کوئی گھر محفوظ نہیں ہوگا۔ اگر بچ گئے تو عیدیں بہت ‘خوشیاں بہت اور مواقع بہت ۔ صرف کراچی ہی نہیں بلکہ ملک بھر سے یہی افسوسناک اطلاعات آئیں اور ہماری خواتین نے گھروں میں نئے کپڑ ے پہن کر عید منائی ‘ انہیں شاید اس بات کا اندازہ بھی نہیں کہ ان کے شوق اور لاپرواہی کا خمیازہ نہ صرف خود ان کو بلکہ پوری قوم کو بہت جلد اور بے حد اذیت ناک انداز میں بھگتنا پڑے گا۔

افسوس ان کی ناعاقبت اندیشی کی وجہ سے ہی صورتحال آج اس نہج پر آئی ہے بصورت دیگر پاکستان میں معاملات بہتر انداز میں چل رہے تھے
عید کے بعد ہر گزرتے ہوئے دن میں کورونا کے مریضوں اور اموات کی شرح میں اضافہ ہوتا چلا گیا ‘ محض ہماری خواتین کی بے احتیاطی کی وجہ سے نہ صرف بچوں اور خواتین میں کرونا کی شرح خطرناک حدتک جا پہنچی بلکہ مجموعی طور پر یہ شرح انتہائی تیزی سے آگے بڑھ رہی ہے۔

ایسی صورتحال میں تو ہماری خواتین کو ہراول دستے کا کردار ادا کرتے ہوئے نہ صرف خود کو بلکہ اپنے بچوں کو گھرمیں محدود کرلینا چاہئے تھابلکہ گھر سے ضروری کام سے نکلنے والے مردوں کو احتیاطی لوازمات سے آراستہ کرکے گھروں سے روانہ کریں۔
مجھے اس بات کایقین ہے کہ اگر ہماری خواتین چاہیں تو صورتحال پر قابو پایا جاسکتا ہے۔ابھی بھی وقت ہے‘ یہ وائرس تیزی سے پھیل رہا ہے‘ آنے والے پندرہ دن خطرناک قرار دیئے جارہے ہیں۔

متاثرین کی تعداد تیزی سے بڑ ھ رہی ہے‘ اموات کی شرح میں اضافہ ہورہا ہے ایسے میں اپنے بچوں کو گھروں میں محدود کریں‘ کسی ضروری کام کیلئے بھی گھر سے باہر نہ نکلیں ناگزیرہو تو مردوں کو بازار بھیجیں۔ آج کل آن لائن شاپنگ کا رواج عام ہے‘ بڑے مہنگے برانڈز سے کر ان بر انڈڈ ملبوسات ‘ جوتے‘ بیگ‘ زیورات و دیگرنہایت سہولت سے مل جاتے ہیں۔ کھانے پینے کی تمام اچھی اشیائآپ گھر بیٹھ کر منگواسکتے ہیں تو خدارا گھروں سے باہر نہ نکلیں۔

اگر نکلنا ناگزیر ہو تو ماسک اور گلوز کا استعمال کریں اور اپنے گھر والوں کو بھی کرائیں۔
یہ مشکل وقت ہے اسپتالوں میں جگہ نہیں ہے۔ اب ہمیں اپنے اردگرد کرونا کے مریض نظر آنے لگے ہیں۔ جان پہچان والوں کی اموات کی اطلاع آرہی ہیں۔ ماحول میں خوف و ہراس پھیل رہا ہے۔اس گمان سے باہر نکل آئیں کہ کروناآپ کو کچھ نہیں کہے گا۔ کل تک جو لوگ یہ کہہ رہے تھے کہ کورونا سیاسی افواہ ہے آج ان کے عزیز و اقارب اسپتالوں میں دم توڑ رہے ہیں ۔

حکومت ایک بار پھر مختلف جگہوں پر لاک ڈاؤن کرنے پر مجبور ہوچکی ہے۔
 ہمارے اپنوں کی زندگیوں کا سوال ہے ایسے میں خواتینآگیآئیں اور اپنی ذمہ داری ادا کریں۔ نہ خود باہر نکلیں اور نہ بچوں کو نکلنے دیں‘ اگر خواتین چاہیں تو لاک ڈاؤن میں نرمی کے باوجود اپنے گھر والوں کو اس وبا سے محفوظ رکھ سکتی ہیں۔ اپنے احساس ذمہ داری کو جگائیں اور آنکھیں کھول کر دیکھیں‘ کچھ بھی اہم نہیں آپ کے اور آپ کے گھر کے علاوہ۔ خدا کے واسطے سنجیدگی اختیار کریں اورکمر کس کر اس عہد کے ساتھ میدان میں اتر آئیں کہ اپنے گھر والوں کو اس وبا سے ہر قیمت پر بچائیں گی۔ہم کوشش کرسکتے ہیں باقی من جانب اللہ۔