عمر شریف کو فوری طور پر بیرونی ملک بھیجا جائے

کون ہے جو عمر شریف کے نام سے واقف نہیں ہے‘ دنیا بھر میں کامیڈی کنگ کے نام سے معروف عمر شریف اس وقت انتہائی مشکل میں ہیں۔ دل کے عارضے میں مبتلا عمر شریف کو ڈاکٹرز نے بیرون ملک جاکر علاج کرانے کا مشورہ دیا ہے ‘ ڈاکٹرز کے مشورے کے بعد عمر شریف نے وزیر اعظم پاکستان عمران خان سے اپیل کی تھی کہ انہیں بغرض علاج بیرونی ملک بھیجا جائے ‘عمران خان نے بھی ہر ممکن مدد کی یقین دہانی کرائی تاہم خبر آئی وفاقی حکومت کی جانب سے عمر شریف کے علاج کیلئے میڈیکل بورڈ تشکیل دے دیا گیا ہے ۔

اس حوالے سے فواد چوہدری کا کہنا ہے کہ عمر شریف کا علاج پاکستان میں کیا جائے گا یا بیرون ملک اس کا فیصلہ ڈاکٹرز کا بورڈ کرے گا کیوں کہ پاکستان میں دل کا علاج ممکن ہے تاہم ہم نے فیصلہ ڈاکٹرز پر چھوڑا ہے ۔

(جاری ہے)

دوسری جانب عمر شریف کی حالت تاخیر کی متحمل نہیں ‘ جو تصاویر منظر عام پر آرہی ہیں اس میں عمر شریف کو اسپتال کے بیڈ پر لیٹا ہوا دیکھا جاسکتا ہے اور یہ بھی دیکھا جاسکتا ہے کہ ان کے چہرے پر مختلف نلکیاں بھی لگی ہوئی ہیںجو ان کی خراب حالت کا ثبوت ہیں۔

گھروالوں کا کہنا ہے کہ عمر شریف کیلئے ایک ایک منٹ قیمتی ہے‘ اگرانہیں فوری طور پر امریکا منتقل نہیں کیا گیا توان کی یہاں اوپن ہارٹ سرجری کرنا پڑے گی جوان کیلئے نقصان دہ ثابت ہوسکتی ہے۔عمر شریف کے بیٹے جواد عمر کا کہنا ہے کہ ان کی حالت مسلسل بگڑ رہی ہے‘ وہ کسی کو پہچان نہیں پارہے ایسے میں تاخیر خطرناک ہوسکتی ہے
یوں تو فواد چوہدری ‘عمران اسماعیل اور فاروق ستار سمیت سیاسی و سماجی شخصیات عمر شریف کی عیادت کیلئے اسپتال پہنچ رہی ہیں لیکن انہیں بیرونی ملک بھیجنے کے حوالے سے تساہل برتا جارہا ہے۔

ایک شدید بیمار شخص کو بیرون بھیجنے کیلئے پنجاب اسمبلی میں قرار جمع کرانی پڑی ہے اور تسلسل سے بیانات سامنے آرہے ہیں عمران خان کے معاون خصوصی شہباز گل نے عمر شریف کے ویزے میں پیشرفت پر ایک بیان جاری کرتے ہوئے کہا کہ ہے کہ تحریک انصاف حکومت نے عمرشریف کے ویزے کے لیے کوائف امریکی سفارت خانے کو بھجوادیے ہیں۔ وزیراعظم آفس عمر شریف کے خاندان سے رابطے میں ہے، انشاءاللہ انہیں بہت جلد ویزا جاری کردیا جائے گا‘حکومت کی طرف سے عمر شریف کے خاندان سے ہر ممکن تعاون کیا جارہا ہے۔

یہ ایک لمحہ فکریہ ہے کہ وطن عزیز کا قیمتی سرمایہ ہر لمحے موت کے منہ کی جانب بڑھ رہا ہے اور ہمارے سیاسی لوگ اس بات کو بھی کیش کرانے کی جدوجہد میں مگن ہیں۔
یاد رہے کہ عمر شریف کچھ عرصے سے بہت بیمار ہیں‘ بیٹی کے انتقال کے بعد ان کی بیماری میں شدت آگئی جب کہ ان کی یاداشت کا معاملہ بھی کافی عرصے سے چل رہا ہے ‘اس یاداشت کی وجہ سے ان کی ذاتی وازدواجی زندگی میں درآنے والے مسائل بھی عوام کے سامنے آرہے ہیںاور اس کے ساتھ ساتھ سامنے آرہی ہے عمر شریف کی وہ عزت اور قدر جو انہوں نے دنیا بھر میں کمائی ۔

آئیے دیکھتے ہیں کہ گزشتہ دنوں کس کس نے ‘ کس کس انداز میں وزیر اعظم پاکستان عمران سے خان سے کیا اپیل کی ہے ۔
اب اتنے بڑے فنکار کیلئے کسی قسم کی اپیل کی ضرورت ہونی تو نہیں چاہئے‘ لیکن بہرکیف یہ عمر شریف کی محبتوں اور محنتوں کا ثمر ہے۔
حکومتی سطح پر فوری اقدامات کئے جانے چاہئے ‘ اگر کسی چہیتے رکن قومی و صوبائی اسمبلی کیساتھ یہ معاملہ درپیش ہوتا تو اب تک نجی جہاز چل چکے ہوتے ‘موت اور زندگی اللہ کے ہاتھ میں ہے‘ عمر شریف کو اللہ صحت و زندگی دے لیکن اگر کسی تاخیری حربے اور غیر ذمہ داری کی وجہ سے وہ جانبر نہ ہوسکے تو حکومت کو اس کا خمیازہ بھگتنا پڑے گا ۔