Live Updates

,امیر جماعت اسلامی سراج الحق پر خود کش حملہ کے واقعہ پر مختلف ممالک کی اسلامی تحریکوں کے رہنمائوںکی مذمت ، خیریت دریافت کی

غ* قائدین اور کارکنان جماعت نے حملہ کی شفاف تحقیقات کا مطالبہ کیا ہے،قیصر شریف

ہفتہ 20 مئی 2023 22:45

Kلاہور (اُردو پوائنٹ اخبارتازہ ترین - آن لائن۔ 20 مئی2023ء) امیر جماعت اسلامی سراج الحق پر ژوب بلوچستان میں خود کش حملہ کے افسوسناک واقعہ پر مختلف ممالک کی اسلامی تحریکوں کے رہنمائوں کی جانب سے پیغامات میں دہشت گردی کے واقعہ کی پر زور مذمت اور امیر جماعت کی خیریت دریافت کی گئی ہے ۔سیکرٹری اطلاعات جماعت اسلامی قیصر شریف کے مطابق ایران کے نائب وزیر خارجہ ، اخوان المسلمون کے مرشد عام ڈاکٹر محمود حسین نے امیر جماعت پر خود کش حملہ کی مذمت کی۔

ڈاکٹر محمود نے سراج الحق کی سلامتی ،حفاظت ،زخمی کارکنان کی صحت یابی کی دعا کی۔ فلسطین ، ترکی، افغانستان، بنگلہ دیش، ملائشیا ، مقبوضہ کشمیر میںبھی اسلامی تحریکوں کے رہنماؤں نے ژوب حملہ کی مذمت کی اور امیر جماعت اور کارکنان جماعت کے لیے دعا کی۔

(جاری ہے)

قیصر شریف نے کہا کہ مختلف قومی رہنمائوں نے بھی امیر جماعت پر حملہ پر افسوس کا اظہار کیا ہے۔

وزیراعظم شہباز شریف ، پی پی چیئرمین بلاول بھٹو ،چیئرمین پی ٹی آئی عمران خان نے حملہ کی مذمت کی ہے۔ گورنر بلوچستان عبدالولی کاکڑ نے کوئٹہ میں سراج الحق سے ملاقات کی۔مسلم لیگ ق کے صدر چوہدری شجاعت ، پی پی رہنما سینٹر رضاربانی ، امیرجے یو آئی س حامد الحق حقانی اور امیر اہلسنت جماعت مولانا احمد لدھیانوی نے ٹیلی فون رابطہ کرکے امیر جماعت کی خیریت دریافت کی۔

تحریک لبیک پاکستان کے سربراہ سعد رضوی کی جانب سے بھی سراج الحق پر حملہ کی مذمت کی گئی ہے ۔ سیکرٹری اطلاعات نے کہا کہ جماعت اسلامی مختلف جماعتوں کے قائدین اور اسلامی تحریکوں کا نیک پیغامات پر شکریہ ادا کرتی ہے۔مزید برآں قیصر شریف نے کہا ہے جے آئی یوتھ ، جماعت اسلامی کے کارکنان کی جانب سے دہشت گردحملہ کے خلاف ملک بھر میں مظاہرے کیے گئے ہیں ۔ انہوں نے کہا کہ قائدین اور کارکنان جماعت نے حملہ کی شفاف تحقیقات کا مطالبہ کیا ہے۔ انہوں نے کہا کہ حملہ کے منصوبہ سازوں کو سامنے لائے۔