پاکستان پیپلزپارٹی نے ملتان میں مسلم لیگ ن کی اہم وکٹیں اڑا دیں

امیدوار حلقہ پی پی 213 ملک ظفرعباس راں پیپلزپارٹی میں شامل ہوگئے، پیپلزپارٹی قیادت کا ان کی شمولیت کا خیرمقدم

ثنااللہ ناگرہ بدھ 17 جنوری 2024 23:24

پاکستان پیپلزپارٹی نے ملتان میں مسلم لیگ ن کی اہم وکٹیں اڑا دیں

ملتان ( اردوپوائنٹ اخبارتازہ ترین ۔ 17 جنوری 2024ء) پاکستان پیپلزپارٹی نے ملتان میں پاکستان مسلم لیگ ن کی اہم سیاسی وکٹیں گرا دیں، مسلم لیگ ن کے سابق ٹکٹ ہولڈر اور امیدوار حلقہ پی پی 213 ملک ظفرعباس راں پیپلزپارٹی میں شامل ہوگئے۔ تفصیلات کے مطابق مسلم لیگ ن کے سابق ٹکٹ ہولڈر پی پی 218 اور امیدوار ایم پی اے حلقہ پی پی 213 ملک ظفر عباس راں نے مسلم لیگ ن کو خیرآباد کہہ دیا ہے اور پاکستان پیپلزپارٹی میں شمولیت اختیار کرلی ہے۔

سابق وزیراعظم سینیٹر سید یوسف رضا گیلانی، سابق ایم این اے سید علی موسیٰ گیلانی، سابق صوبائی وزیر سید علی حیدر گیلانی اور سابق ایم پی اے ملک واصف مظہر راں کے ساتھ پریس کانفرنس کرتے ہوئے ملک ظفر عباس راں نے پیپلزپارٹی میں شمولیت کا اعلان کیا۔

(جاری ہے)

پیپلزپارٹی کی قیادت نے ان کی پارٹی میں شمولیت کا خیرمقدم کیا ہے۔ ملک ظفر عباس راں نے حلقہ پی پی213، این اے148، پی پی291 ، این اے 151 میں پاکستان پیپلزپارٹی کے امیدواران کی بھرپور حمایت کا بھی اعلان کیا ہے۔

مزید برآں پاکستان پیپلزپارٹی کے چیئرمین بلاول بھٹو زرداری نے شہداد پور میں خطاب کرتے ہوئے کہا کہ شیر تو بلی بن کرگھر میں چھپا بیٹھا ہے شکار کرنے پر تیار ہی نہیں، یہ کیسا شیر ہے جو چاہتا ہے کہ کوئی اور اس کیلئے شکار کرے، یہ شیر مزدوروں ، کسانوں اور عوام کا خون چوستا ہے ۔ پنجاب میں ن لیگ کا نشان شیر ہے ، ستارے والے بھی سہولت کررہے ہیں، آپ ان سے پوچھیں چوتھی بار وزیراعظم بننا چاہتے ہیں آپ کا منشور کیا ہے؟ بلاول بھٹو نے کہا کہ میں دائیں بائیں نہیں دیکھتا عوام پر بھروسہ کرتا ہوں، کوئی جیل سے بچنے کیلئے اور کوئی جیل سے نکلنے کیلئے الیکشن لڑ رہا ہے، میرا دس نکاتی عوامی معاشی ایجنڈا ہے جس کو گھر گھر پہنچانا ہے۔

انہوں نے کہا کہ ہم آپ کی آمدن میں اضافہ کریں گے، 300 یونٹ تک مفت بجلی سولر کے ذریعے دلاؤں گا، ہم نے روٹی کپڑا اور مکان کا وعدہ پورا کرنا ہے۔ اقتدار میں آکر اشرافیہ کی ایک ہزار پانچ سو ارب روپے کی سبسڈی ختم کردوں ، اشرافیہ کی سبسڈی ختم کرکے یہ پیسا عوام پر خرچ کروں گا۔ بلاول بھٹو نے امیدواروں سے حلف لیا کہ وعدہ کریں آپ عوامی خدمت کریں گے اپنے خاندان کی نہیں۔

پورے پاکستان میں الیکشن مسلم لیگ ن اور پیپلزپارٹی کے درمیان ہے۔ میں پُرامید ہوں کہ آپ 8 فروری کو ایک نئی سوچ کا ساتھ دیں گے، ایک ایسی سوچ جو ملک کو تقسیم کرنے کے بجائے ملک کو جوڑکر عوام کے مسائل کا حل نکالے گی۔ انشاء ﷲ ہم ملکر اپنے عوامی معاشی معاہدے کے 10 نکات پر عمل درآمد کرکے غریب، مزدور، محنت کش، جوان، بے گھر، خواتین، کسان اور ہاری کی قسمت بدلیں گے۔ اسی طرح بدين میں انتخابی جلسے سے خطاب کرتے ہوئے پاکستان پیپلز پارٹی کے چیئرمین بلاول بھٹو زرداری نے کہا کہ پیپلز پارٹی ملک بھر میں جدوجہد کر رہی ہے کہ 8 فروری کو عوام کی حکومت بنے، چاہتے ہیں کہ ملک میں عوامی راج قائم ہو۔