Live Updates

عمران خان کی کال پر 5اگست کو صوابی میں بھرپور جلسہ کریں گے

ثابت کریں گے کہ پی ٹی آئی مقبول ترین جماعت ہے، حکومت عوام پر ٹیکسز کا بوجھ بڑھا کر خود مزے میں ہے، پیپلزپارٹی اور ن لیگ نے مہنگے داموں پاورپلانٹس لگائے۔ اپوزیشن لیڈر قومی اسمبلی عمر ایوب خان

ثنااللہ ناگرہ جمعرات 1 اگست 2024 19:02

عمران خان کی کال پر 5اگست کو صوابی میں بھرپور جلسہ کریں گے

اسلام آباد ( اردوپوائنٹ اخبارتازہ ترین۔ یکم اگست 2024ء) اپوزیشن لیڈر قومی اسمبلی عمر ایوب خان نے کہا ہے کہ عمران خان کی کال پر 5 اگست کو صوابی میں بھرپور جلسہ کریں گے، ثابت کریں گے کہ پی ٹی آئی مقبول ترین جماعت ہے، حکومت عوام پر ٹیکسز کا بوجھ بڑھا کر خود مزے میں ہے۔پی ٹی آئی کے مرکزی رہنماؤں عمر ایوب خان ، اسد قیصر نے دیگر رہنماؤں کے ہمراہ اڈیالہ جیل کے باہر میڈیا سے گفتگو کرتے ہوئے کہا کہ عمران خان نے بین الاقوامی دنیا کو پیغام دیا ہے کہ اسماعیل ہنیہ کو شہید کیا گیا مغربی ممالک کا ویلیو سسٹم اور اخلاقیات کہاں گئیں؟جس کا وہ چرچا کرتے ہیں، آپ فلسطین ، غزہ میں دیکھیں مسلمانوں کا قتل عام ہورہا ہے، ایران میں اسماعیل کو شہید کیا جاتا ہے ، اس کی مذمت کرتے ہیں، ایسے اقدامات سے مسلمانوں کے دلوں میں غم وغصہ بڑھتا ہے، اسرائیل ہر غلط قدم اٹھارہا لیکن اس کو روک ٹوک کرنے والا کوئی نہیں ہے۔

(جاری ہے)

مغربی ممالک ملکر فلسطین کیلئے امن کو یقینی بنائیں۔بانی پی ٹی آئی نے کال دی ہے کہ 5اگست 2024 بمقام صوابی میں شام کو احتجاجی مظاہرہ کیا جائے گا۔ثابت کریں گے کہ پی ٹی آئی مقبول ترین جماعت ہے، وہاں بھر پور جلسہ کریں گے۔ علی امین گنڈا پور صوابی جلسے میں میزبان ہوں گے۔ میں وزیرتوانائی رہ چکا ہوں، بتانا چاہتا ہوں کہ بجلی کی قیمتوں میں اضافہ پیپلزپارٹی بالخصوص مسلم لیگ ن نے پاور پلانٹس لگائے،کیپسٹی پیمنٹ مہنگے داموں لگے ہیں،آصف زرداری کا 88کروڑ روپے ایوان صدر کا خرچہ بڑھ گیا ہے، عوام پر ٹیکسز کا بوجھ اور اپنے لئے مزے ہیں۔

پی ٹی آئی رہنماء اسد قیصر نے کہا کہ فیصلہ کیا گیا ہے کہ آئندہ 15روز میں گرینڈ الائنس بنائیں گے، جس میں تمام ہم خیال سیاسی جماعتوں کو ساتھ ملائیں گے، وہ جماعتیں جو موجودہ حکومت کے خلاف آواز اٹھا رہی ہے۔بلوچستان ، پنجاب، سندھ اور کے پی کے میں ہوں ، جو بھی اس وقت تحریک چلا رہے ہیں سب کو اکٹھا کررہے ہیں۔ ہمارا صوابی میں جلسہ ہوگا ،اس کا بنیادی مقصد عمران خان کو ناجائز گرفتار کیا گیا، گرفتاری غیرقانونی ہے جو سابق وزیراعظم ہیں، جس نے ورلڈ کپ جیتا، اور پوری دنیا میں پاکستان کی بہت بڑی شخصیت ہیں۔

گرفتارتمام رہنماؤں کی رہائی کیلئے آواز اٹھائیں گے۔ ان کو بتائیں گے ملک آئین قانون کے مطابق چلنا ہے، ملک کوئی بے آئین نہیں ہے۔ مہنگائی اور بجلی کی قیمتوں میں اضافے کو مسترد کرتے ہیں، جماعت اسلامی کے دھرنے کو سپورٹ کرتے ہیں۔