پی ٹی آئی تسلیم کرے کہ جمہوریت کی بحالی کیلئے امریکی سپورٹ لے رہے ہیں

اسلام آباد ( اردوپوائنٹ اخبار تازہ ترین۔ آئی پی اے ۔ 25 دسمبر 2024ء ) پاکستان پیپلزپارٹی کے مرکزی رہنماء ندیم افضل چن نے کہا ہے کہ پی ٹی آئی تسلیم کرے کہ جمہوریت کی بحالی کیلئے امریکی سپورٹ لے رہے ہیں،پی ٹی آئی کا نعرہ ایبسولوٹلی ناٹ کی جگہ ایبسولوٹلی یس آجائے تو کوئی حرج نہیں ہوگی،لوگوں کو کہا گیا کہ امریکا نے ہماری حکومت گرائی ۔ انہوں نے ہم نیوز کے پروگرام میں گفتگو کرتے ہوئے کہا کہ نوازشریف یا محترمہ بے نظیر بھٹو ڈکٹیٹرشپ کیخلاف کھڑے ہوئے، وہ ڈکٹیٹر جس کو سپورٹ بھی امریکا نے کیا تھا اور 18ملین ڈالر بھی دیئے تھے۔

پی ٹی آئی تسلیم کرے کہ جمہوریت کی بحالی کیلئے امریکا کی سپورٹ لے رہے ہیں، ایبسولوٹلی کی جگہ ایبسولوٹلی یس آجائے تو کوئی حرج نہیں ہوگی، کیونکہ ایبسولوٹلی ناٹ پی ٹی آئی کا نعرہ تھا اور لوگوں کو کہا گیا کہ امریکا نے ہماری حکومت گرائی ہے۔

(جاری ہے)

امریکا کے کردار کو تسلیم کرتے ہیں ذوالفقار بھٹو کی پھانسی میں بھی امریکی رول تھا، تاریخ پڑھ لیں ،ایٹمی پروگرام شروع کرنے سے لے کر اوآئی سی کی تقریر تک بھٹو کو دھمکیاں دی گئیں، ذوالفقار بھٹو کو کہاں سے سپورت ملی تھی؟ان کو آپ کی انسانی حقوق یا جمہوریت کی کوئی ضرورت نہیں، وہ چاہتے کہ پاکستانیوں میں کہیں نیشنل ازم نہ آجائے۔

ہمیں اپنا گھر ٹھیک کرنا چاہئے۔ سب کو پتا ہے کہ ڈیمز کو متنازع کہاں سے بنایا گیا، بلوچستان میں بیرونی مداخلت کہاں سے ہورہی ہے؟عمران خان کی رہائی ایشو نہیں ، قانون کی حکمرانی کو دیکھنا ہوگا، قانون اگر ان کو رہا کردیتا ہے تو کوئی مسئلہ نہیں، عمران خان کو فیئرٹرائل کا حق ملنا چاہئے۔ ہم ہر کسی کے معاملے میں دو نمبری چھوڑنی چاہئے۔ ہاؤس ان آرڈر کرنا سیاسی جماعتوں اور اسٹیک ہولڈرز کی ذمہ داری ہے۔

دوسری جانب پی ٹی آئی کے مرکزی رہنماء فواد چودھری نے نامزد امریکی ایلچی رچرڈ گرنیل کے بیان کو سراہتے ہوئے کہا ہے کہ حکومت کو بانی کی رہائی کیلئے امریکا کا فون نہیں آئے گابس آئی ایم ایف کی قسط لیٹ ہوگی، پاکستان آئی ایم ایف کی قسط کی تاخیر کا متحمل نہیں ہوسکتا،عالمی دباؤ آسکتا ہے اسی لئے کہتا ہوں ہمیں اپنے مسائل خود حل کرنے ہیں۔ انہوں نے اے آروائی نیوز کے پروگرام میں گفتگو کرتے ہوئے کہا کہ عمران خان کے ٹرمپ کے ساتھ تعلقات عارضی نہیں بلکہ بہت پرانے ہیں، عمران خان اور ایوانا ٹرمپ کا بہت پرانا فیملی تعلق ہے، ٹرمپ نے مودی کو فون کیا لیکن ابھی تک تقریب حلف برداری میں دعوت نہیں دی۔

رچرڈ گرینل نے اپنے انٹرویو میں کہاکہ عمران خان بھی ٹرمپ کی طرح سیدھی بات کرتے ہیں، ٹرمپ کی بھی پسند ناپسند بڑی سیدھی سیدھی ہیں۔ پاکستان کی سیاست میں 53 ء سے امریکا کی اہمیت ہے، سی آئی اے کا ریکارڈ آپ کے سامنے ہے کہ ایوب خان کیسے آئے؟ ابھی حال میں دیکھنا ہے توبے نظیر بھٹو سے متعلق دیکھ لیں۔ دوسری چیز پاکستان آج آئی ایم ایف قرض کے تھریٹ میں بندھا ہوا،ہم تو آئی ایم ایف کی قسط کی تاخیر کے متحمل نہیں ہوسکتے۔