یوم یکجہتی کشمیر، فریال تالپور کا مظلوم کشمیری عوام سے غیر متزلزل حمایت کا اظہار

پیپلز پارٹی شہید بھٹو و بینظیر بھٹو کے ویژن کے تحت کشمیری عوام کی جدوجہد آزادی میں ان کیساتھ کھڑی ہے، بیان

منگل 4 فروری 2025 20:40

کراچی / اسلام آباد (اُردو پوائنٹ اخبارتازہ ترین - این این آئی۔ 04 فروری2025ء)پاکستان پیپلز پارٹی شعبہ خواتین کی مرکزی صدر اور رکن سندھ اسمبلی فریال تالپور نے 5 فروری کو یوم یکجہتی کشمیر کے موقع پر مظلوم کشمیری عوام سے غیر متزلزل حمایت کا اظہار کرتے ہوئے کہا ہے کہ قائدِ عوام شہید ذوالفقار علی بھٹو کے نظریئے اور شہید بینظیر بھٹو کے ویژن کے تحت پاکستان پیپلز پارٹی کشمیری عوام کی جدوجہد آزادی میں ہمیشہ ان کے ساتھ کھڑی رہی ہے اور آئندہ بھی ان کے شانہ بشانہ ساتھ کھڑی رہے گی۔

انہوں نے کہا کہ وہ دن دور نہیں جب کشمیریوں کی قربانیاں اور جدوجہد بھارتی ظلم پر فتح پائیں گی اور مقبوضہ کشمیر کی عوام آزادی کے سورج کو طلوع ہوتا دیکھیں گے۔ فریال تالپور نے یوم یکجہتی کشمیر کے موقع پر اپنے پیغام میں کہا کہ قائدِ عوام شہید ذوالفقار علی بھٹو پاکستان کے وہ پہلے وزیراعظم تھے، جنہوں نے عالمی سطح پر کشمیر کے مقدمے کو موثر انداز میں پیش کیا اور کشمیریوں کے حق خودارادیت کو دنیا بھر میں تسلیم کرانے میں کلیدی کردار ادا کیا۔

(جاری ہے)

انہوں نے کہا کہ شہید بینظیر بھٹو نے بھی زندگی بھر ہر فورم پر کشمیری عوام کی آواز بلند کی اور بھارت کے غیر قانونی قبضے کو چیلنج کیا۔انہوں نے کہا کہ صدر آصف علی زرداری اور پارٹی چیئرمین بلاول بھٹو زرداری کی قیادت میں ہم کشمیری عوام کے حقوق کے لیے ہر سطح پر اپنی جدوجہد جاری رکھیں گے۔ فریال تالپور نے کہا کہ مقبوضہ کشمیر کے عوام گزشتہ کئی دہائیوں سے بھارتی ظلم و جبر کا سامنا کر رہے ہیں، لیکن ان کے حوصلے اور قربانیاں اس بات کا ثبوت ہیں کہ وہ اپنی آزادی کے حق سے کبھی پیچھے نہیں ہٹیں گے۔

انہوں نے عالمی برادری، انسانی حقوق کی تنظیموں اور اقوام متحدہ پر زور دیا کہ وہ مقبوضہ کشمیر میں بھارتی فوج کے مظالم کا فوری نوٹس لے اور کشمیری عوام کے لیے اقوام متحدہ کی قراردادوں کے مطابق حق خودارادیت کو یقینی بنایا جائے۔ انہوں نے مطالبہ کیا کہ بھارتی جیلوں میں قید ہزاروں بے گناہ کشمیریوں کو فوری رہا کیا جائے اور مقبوضہ وادی میں مودی حکومت کی جانب سے آبادی کے تناسب کو تبدیل کرنے کی جاری گھنونی سازش کو بند کیا جائے۔

فریال تالپور نے کہا کہ پاکستانی عوام ہمیشہ کشمیری بھائیوں اور بہنوں کے ساتھ کھڑے رہیں گے اور اس جدوجہد میں ہر ممکن حمایت جاری رکھیں گے۔ انہوں نے اپنے پیغام میں مقبوضہ کشمیر کی عوام کو غیرمتزلزل عزم کے ساتھ اپنے حق خودارادیت جاری رکھنے پر خراج تحسین اور کشمیری شہدا کو شاندار الفاظ میں خراج عقیدت پیش کیا ہے۔