پاکستان زندہ باد، اللّہ ربّ العزت کا شکر ہے کہ پاکستان کو سر بلند کردیا

وزیراعظم، آرمی چیف، ائیرچیف اور افواجِ پاکستان کو شاباش مبارکباد دیتا ہوں، پاکستان امن پسند ملک ہے مگر اپنا دفاع کرنا بھی جانتا ہے۔ صدرپی ایم ایل این میاں نوازشریف کا ٹویٹ

ثنااللہ ناگرہ ہفتہ 10 مئی 2025 18:59

پاکستان زندہ باد، اللّہ ربّ العزت کا شکر ہے کہ پاکستان کو سر بلند کردیا

اسلام آباد ( اردوپوائنٹ اخبار تازہ ترین۔ آئی پی اے ۔ 10 مئی 2025ء ) سابق وزیراعظم اور صدرپی ایم ایل این میاں محمد نوازشریف نے پاکستان بھارت جنگ بندی پر کہا ہے کہ پاکستان زندہ باد، اللّہ ربّ العزت کا شکر ہے کہ پاکستان کو سر بلند کردیا ہے۔ انہوں نے ایکس پر اپنے پیغام میں کہا کہ اللّہ ربّ العزت کا شکر ہے کہ اس نے پاکستان کو سر بلند کیا۔ میں، وزیر اعظم پاکستان شہباز شریف، فوج کے سپہ سالار جنرل سید عاصم منیر، چیف آف ائیر سٹاف ائیر چیف مارشل ظہیر سندھو اور افواجِ پاکستان کو شاباش اور مبارکباد دیتا ہوں۔

پاکستان امن پسند ملک ہے اور امن کو ترجیح دیتا ہے مگر اپنا دفاع کرنا بھی جانتا ہے۔ پاکستان زندہ باد۔

یاد رہے امریکی صدر ڈونلڈ ٹرمپ نے پاکستان اور بھارت کے درمیان جنگ بندی کا اعلان کردیا ہے۔

(جاری ہے)

انہوں ایکس پر اپنے بیان میں کہا کہ پاکستان اور بھارت فوری طور پر سیز فائر پر متفق ہوگئے ہیں۔ انہوں نے کہا کہ امریکہ کی ثالثی میں ایک طویل بات چیت کے بعد مجھے یہ اعلان کرتے ہوئے خوشی ہو رہی ہے کہ ہندوستان اور پاکستان نے مکمل اور فوری جنگ بندی پر اتفاق کیا ہے، ذہانت اور تدبر سے کام لینے پر دونوں ممالک کو مبارکباد پیش کرتا ہوں، اس معاملے پر تمام فریقین کی دلچسپی پر شکریہ ادا کرتا ہوں۔

دوسری جانب جنگی جنون میں مبتلا بھارتی حکومت کو پاکستان کے حملوں کے نتیجے میں 83 بلین ڈالرز کا نقصان اٹھانا پڑا۔ عالمی نیوز ایجنسی رائٹرز نے رپورٹ کیا کہ پاکستان اور بھارت کے درمیان جاری کشیدگی کے باعث ہندوستانی حصص مسلسل گرنے سے مارکیٹ ویلیو میں تقریباً 83 بلین ڈالر کا نقصان ہوا کیوں کہ ہندوستان اور اس کے ہمسایہ ملک پاکستان کے درمیان عسکری کارروائی میں شدت نے سرمایہ کاروں کو پریشان کردیا،بھارت کی سٹاک مارکیٹ کے 13 بڑے شعبوں میں سے 12 شعبے شدید مندی کا شکار ہوئے، جس کے بعد سے سٹاک مارکیٹ میں شدید بے چینی کی فضا دیکھی گئی، خطے میں کشیدگی پر غیرملکی سرمایہ کاروں نے واضح طور پر تحفظات کا اظہار کیا۔