Live Updates

جموں و کشمیر کے تنازع کا حل پاک بھارت مستقل امن کے لیے ضروری شرط ہے، بلاول بھٹو زرداری

منگل 3 جون 2025 01:40

نیویارک (اُردو پوائنٹ اخبارتازہ ترین - اے پی پی۔ 03 جون2025ء) سابق وزیر خارجہ اور پیپلز پارٹی کے چیئرمین بلاول بھٹو زرداری نے کہا ہے کہ جموں و کشمیر کے تنازع کا حل پاک بھارت مستقل امن کے لیے ضروری شرط ہے۔ایک چینی ٹی وی چینل کو انٹرویو دیتے ہوئے بلاول بھٹو نےکہا کہ موجودہ جنگ بندی کو مستقل امن کی طرف لے جانا چاہیے ۔ بلاول بھٹو زرداری جو نو رکنی پارلیمانی وفد کی قیادت کر رہے ہیں نے کہا کہ دہائیوں پرانے تنازعہ کشمیر کا حل اقوام متحدہ کی سلامتی کونسل کی قراردادوں اور کشمیریوں کی امنگوں کے مطابق ہونا چاہیئے۔

وقار، طاقت اور سفارت کاری کے ذریعے پاکستان کی امن کی خواہش پر زور دیتے ہوئے انہوں نے ہندوستان کے اقدامات کو "خطرناک" اور بین الاقوامی قوانین کی خلاف ورزی قرار دیا۔

(جاری ہے)

بلاول بھٹو نے کہا کہ 1960 کے سندھ طاس معاہدے کو منسوخ کرنے کا بھارت کا یکطرفہ فیصلہ بین الاقوامی قانون اور معاہدے کی خلاف ورزی ہے۔انہوں نے عالمی برادری پر زور دیا کہ وہ پاکستان اور بھارت کے درمیان مذاکرات میں سہولت کاری کے لیے اپنا کردار ادا کرے۔

وفد کے رہنما نے مزید کہا کہ ہم جموں و کشمیر، سندھ طاس معاہدے اور دہشت گردی پر بھارت کے ساتھ بات کرنے کے لیے تیار ہیں۔انہوں نے کہا کہ پاکستان دہشت گردی کا شکار ہے،سیاسی قیادت سے لے کر فوج اور پاکستانی شہری دہشت گردی سے متاثر ہوئے ہیں۔ انہوں نے کہا کہ پاکستان نے بھارت کے خلاف اپنے دفاع میں کارروائی کی۔بلاول نے مزید کہا کہ پاکستان کی فوج اور اس کی سفارتی فتح نے بھارتی قیادت کو ہلا کر رکھ دیا ہے، جو اب پاکستان کے خلاف زہر اگلنے میں مصروف ہے۔