Live Updates

شکر ہے ن لیگ والوں نے یہ نہیں کہہ دیا کہ علامہ اقبال والا خواب بھی نواز شریف نے ہی دیکھا تھا، پرویزالٰہی

ن لیگ عوام کو نہیں خود کو بے وقوف بنا رہے ہیں، ہماری فوج نے شہادتیں دے کر فتح حاصل کی،پوری قوم پاک فوج کو خراج تحسین پیش کرتی ہے، سابق وزیراعلیٰ پنجاب کی کارکنوں سے گفتگو

فیصل علوی پیر 9 جون 2025 11:00

شکر ہے ن لیگ والوں نے یہ نہیں کہہ دیا کہ علامہ اقبال والا خواب بھی نواز ..

گجرات(اردوپوائنٹ اخبار تازہ ترین۔09 جون 2025)سابق وزیراعلیٰ پنجاب چوہدری پرویز الٰہی کا کہنا ہے کہ ن لیگ عوام کو نہیں خود کو بے وقوف بنا رہے ہیں،ن لیگ والے کہتے ہیں کہ جنگ کا ڈیزائن میاں صاحب نے بیٹھ کر بنایا ہے، شکر ہے ن لیگ والوں نے یہ نہیں کہہ دیا کہ علامہ اقبال والا خواب بھی نواز شریف نے ہی دیکھا تھا، گجرات میں کارکنوں سے گفتگوکرتے ہوئے سابق وزیراعلیٰ پنجاب نے کہا کہ اب عوام بیدار اور باشعور ہو گئے ہیں وہ ان کی باتوں میں نہیں آئیں گے۔

ہماری فوج نے شہادتیں دے کر فتح حاصل کی۔ پوری قوم پاک فوج کو خراج تحسین پیش کرتی ہے۔انہوں نے کہا کہ جب قوم اور فوج کو ضرورت پڑی سب سے پہلے بانی پی ٹی آئی عمران خان اور میں نے بیان دیا تھاکہ ہم اپنی فوج کے ساتھ کھڑے ہیں۔

(جاری ہے)

قائداعظم کے بعد بانی پی ٹی آئی جیسا لیڈر ہماری تاریخ میں پیدا نہیں ہوا۔ قائداعظم کے بعد اگر کسی کو سب سے زیادہ ووٹ ملے ہیں وہ عمران خان ہیں۔

ہم سب اس قوم اور ملک کیلئے اکٹھے ہیں اس قوم کیلئے جو بہتر ہے ادارے بھی اس کے ساتھ ہوں گے اکیلے اکیلے سب کچھ کر کے دیکھ لیا ہے۔خیال رہے کہ اس سے قبل صوبائی وزیراطلاعات عظمیٰ بخاری نے کہا تھا کہ پوری دیانت داری اور ذمہ داری سے کہتی ہوں نواز شریف کی زیر نگرانی بھارت کے خلاف بنیان المرصوص آپریشن ہواتھا۔صوبائی وزیر اطلاعات و ثقافت پنجاب عظمی بخاری نے پنجاب اسمبلی میں اظہار خیال کرتے ہوئے کہاتھا کہ نوازشریف ملک کے سب سے بڑے لیڈر ہیں۔

پاک بھارت جنگ کے دوران نواز شریف نے آپریشن کی نگرانی کی تھی۔ شہباز شریف نے پاک فوج کو اختیارات دے دئیے تھے۔ان کا یہ بھی کہنا تھا کہ علیمہ خان تو کہتی رہیں کہ فوج اور مودی کا گٹھ جوڑ تھا۔وہ اس آپریشن کو جعلی کہتی ہیں، پی ٹی آئی والے کہتے رہے پاک بھارت جنگ ٹوپی ڈرامہ تھا۔ ان کو جواب دوں جو فوج اور ملکی سالمیت کےلئے زہر قاتل تھے۔ حکومت وفاق میں ہو یا پنجاب میں وہی کچھ ہوتا ہے جو نوازشریف کہتا تھا۔