Live Updates

عمران خان نے ایران اسرائیل صورتحال کے پیش نظر احتجاجی تحریک 2 ہفتوں کیلئے مؤخر کردی

پاکستان کو اس وقت متحد ہونا چاہیئے، احتجاجی تحریک عالمی حالات کی وجہ سے مؤخر کی، اسرائیل کے بارے میں کیا مؤقف ہے یہ ساری دنیا جانتی ہے؛ سابق وزیراعظم کی ہمشیرہ کی ملاقات کے بعد گفتگو

ساجد علی منگل 17 جون 2025 17:05

عمران خان نے ایران اسرائیل صورتحال کے پیش نظر احتجاجی تحریک 2 ہفتوں ..

راولپنڈی ( اُردو پوائنٹ اخبارتازہ ترین۔ 17 جون 2025ء ) پاکستان تحریک انصاف کے پیٹرن انچیف عمران خان نے ایران اسرائیل صورتحال کے پیش نظر احتجاجی تحریک 2 ہفتوں کیلئے مؤخر کردی۔ راولپنڈی کی اڈیالہ جیل میں سابق وزیراعظم سے ملاقات کے بعد ان کی ہمشیرہ عظمیٰ خان نے بتایا کہ ملاقات کے دوران جب عمران خان کو بیرون ملک احتجاج کے بارے میں بتایا تو وہ ہنس پڑے، تاہم عمران خان نے احتجاجی تحریک کو عالمی حالات کی وجہ سے مؤخر کردیا ہے اور کہا ہے کہ پاکستان کو اس وقت متحد ہونا چاہیئے، اسرائیل کے بارے میں عمران خان کا مؤقف واضح ہے، ان کا مؤقف پوری دنیا جانتی ہے، سوشل میڈیا ان کے بیانات سے بھرا پڑا ہے، اس وقت ہم پاکستانی ان 17 سیٹوں والے، فارم 47 کے حکمرانوں صدر، وزیراعظم اور فیلڈ مارشل کے اسرائیل کے حوالے سے بیان کا انتظار کررہے ہیں۔

(جاری ہے)

انہوں نے بتایا بجٹ کے بارے میں عمران خان کہتے ہیں کہ بجٹ الیٹ کیپچر کا بجٹ ہے، 43 لاکھ پڑھے لکھے لوگ پاکستان چھوڑ گئے ہیں، شہباز شریف نے چوتھا بجٹ پیش کیا ہے جس میں عوام پر مزید بوجھ ڈالا گیا ہے، اس بجٹ کے نتیجے میں پاکستان میں مزید غربت بڑھے گی، صوبہ خیبرپختونخواہ میں جو بجٹ پیش ہوا ہے وہ مشاورت کے بعد ہی پاس ہوگا، خیبرپختونخواہ کا بجٹ عمران خان کی اجازت سے پیش ہوا ہے، انہیں پتا تھا کہ بجٹ پیش ہونا ہے تاہم عمران خان نے علی امین گنڈاپور، عمر ایوب اور شبلی فراز سے اپنی ملاقات تک صوبائی بجٹ کی منظوری روک رکھی ہے۔

پیٹرن انچیف پی ٹی آئی کی ہمشیرہ نورین نیازی کا کہنا ہے کہ عمران خان لاوارث نہیں ہے عمران خان عام قیدی نہیں جسے یہ جب چاہیں جہاں مرضی اٹھا پھینکیں، 9 مئی کی یہ چاہتے ہیں عمران خان معافی مانگیں جب کہ کل کیس لگا ہوا تھا یہ کچھ ثابت نہیں کر پاتے سب جھوٹ ہیں، یہ عمران خان سے ہار چکے ہیں اور اب عمران خان کے ساتھ یہ بہت کچھ کرنا چاہتے ہیں لیکن جس دن عوام کھڑی ہو گئی یہ لوگ بیٹھ بھی نہیں سکیں گے، اگر ہم اڈیالہ کے باہر بیٹھیں تو کسی کو نہیں بلائیں گی خود لوگ آ جائیں گے۔