اٹک ،بلاول بھٹو زرداری نے بھارتی جارحیت کا کیس موثر انداز میں پیش کرکے عالمی سطح پر پاکستان کے وقار میں اضافہ کیا، گورنر پنجاب

اٹک (اُردو پوائنٹ اخبارتازہ ترین - اے پی پی۔ 23 جون2025ء) گورنر پنجاب سردار سلیم حیدر خان نے کہا ہے کہ چیئرمین پیپلز پارٹی بلاول بھٹو زرداری نے بھارتی جارحیت کے دوران اور اس کے بعد بھی عالمی برادری کےسامنےموثر انداز میں پاکستان کا کیس پیش کیا جس کی بدولت عالمی سطح پر پاکستان کے وقار میں اضافہ ہوا ۔انہوں نے ان خیالات کا اظہار ضلع اٹک کی تحصیل پنڈی گھیب کے گاؤں ڈھلیاں میں سولر واٹر سپلائی کے افتتاح کے موقع پر بڑے جلسہ عام سے خطاب کرتے ہوئے کیا۔

اس موقع پرپیپلز پارٹی کے رہنما سردار فیضان حیدر، ملک امانت راول ،ملک شیر خان سدریال ملک ریاست سدریال،اصف علی ملک،سردار احسن خان، سید عاطف حسین شاہ گیلانی ،حاجی اختر اور دیگر رہنما بھی موجود تھے ۔اس موقع پر جلسے سے خطاب کرتے ہوئے گورنر پنجاب سردار سلیم حیدر خان نے کہا کہ اپریشن المرصوص میں کامیابی پر فیلڈ مارشل عاصم منیر،بہادر مسلح افواج اور پوری پاکستان قوم کو مبارکباد پیش کرتے ہیں۔

(جاری ہے)

گورنر پنجاب سردار سلیم حیدر خان نے کہا کہ پاکستان پیپلز پارٹی نے پاکستان کے دفاع کے سلسلے میں پاک فوج کے ساتھ ہمیشہ اپنا بھرپور کردار ادا کیا ہے جو تاریخی حیثیت کا حامل ہے ۔انہوں نے کہا کہ بھارتی جارحیت کے دوران صرف ایک اکیلا شیر چیئرمین بلاول بھٹو زرداری تھا جو ہر بین الاقوامی محاذ پہ سفارتی لحاظ سے لڑ رہا تھااور موثر انداز میں پاکستان کا کیس پیش کر رہا تھا۔

ہماری مسلح افواج نے صرف ایک میزائل فتح ون سے بھارت پر حملہ کیا جو ہماری دفاع کا ابتدائی حصہ ہے۔سردار سلیم حیدر خان نے کہا کہ جے ایف 17 تھنڈر ہمارے کامرہ میں بن رہے ہیں ۔اس کے علاوہ جے ٹین سی کے ذریعے بھی ہماری طاقت میں اضافہ ہوا ہے ۔گورنر پنجاب نے کہا کہ صدر اصف علی زرداری نے 2008 سے 2013 تک جو چائنہ کے دورے کیے اس کی وجہ سے پاکستان کا دفاع مضبوط ہوا۔

بھارت نے جب جارحیت شروع کی تو اس وقت پوری دنیا بھارت کے ساتھ کھڑی ہو گئی مگر چیئرمین پیپلز پارٹی بلاول بھٹو زرداری کے مضبوط اور موثر موقف کی وجہ سےحقائق کا اندازہ ہوا اور وہ اب پاکستان کے موقف کے ساتھ کھڑے ہیں۔عوامی فلاحی کاموں کے حوالے سے بات کرتے ہوئے گورنر پنجاب سردار سلیم حیدر خان نے کہا کہ رتوال اور ڈھرنال میں ڈسپنسری قائم کی گئی ہے اس کے علاوہ 14 واٹر سپلائیوں پر بھی کام جاری ہے۔

تحصیل ہیڈ کوارٹر ہسپتال پنڈی گھیب میں ڈائلیسس سینٹر بھی قائم کیا گیا ہے۔فتح جنگ میں بہت جلد سردار ظہور صاحب کے تعاون سے کڈنی ہسپتال بھی قائم کیا جائے گا۔سردار سلیم حیدر خان نے کہا کہ اٹک کی عوام کے لیے گورنر ہاؤس کے دروازے کھلے ہیں۔بعدازاں انہوں نے پاکستان پیپلز پارٹی کی مقامی قیادت کے ہمراہ شہید محترمہ بے نظیر بھٹو کی سالگرہ کا کیک بھی کاٹا۔\378