پارٹی کو تجویز دی ہے حکومت میں شامل ہوں یا عوام میں جائیں،یوسف رضا گیلانی

اسلام آباد(اُردو پوائنٹ اخبارتازہ ترین - این این آئی۔ 03 جولائی2025ء)چیئرمین سینیٹ سید یوسف رضا گیلانی نے کہا ہے کہ پارٹی کو تجویز دی ہے کہ حکومت میں شامل ہوں یا الگ ہوکر عوام میں جائیں مگر یہ فیصلہ سینٹرل ایگزیکٹیو کمیٹی ہی کرسکتی ہے،مسلم لیگ(ن)کبھی نہیں چاہے گی کہ جنوبی پنجاب صوبہ بنے، وہ مخالفت کررہی ہے۔نجی ٹی وی کودیئے گئے ایک انٹرویو میں یوسف رضاگیلانی نے دباؤ کے تحت قانون سازی سے متعلق سوال کے جواب میں کہاکہ کوئی رضاکارانہ طور پر اگر اپنی وفاداری تبدیل کرنا چاہے تو وہ اس کی اپنی صوابدید ہے، مگر پارٹی سربراہان کے پاس اتنے وسیع اختیارات ہیں کہ اگر کسی مخصوص معاملے پر کوئی رکن ووٹ نہیں دیتا تو وہ ممبر نہیں رہ سکتا تو اس لیے جو دبا والی بات ہے اس سے میں اتفاق نہیں کرتا۔

(جاری ہے)

گذشتہ انتخابات کے حوالے سے سوال پر چیئرمین سینیٹ نے کہاکہ میں یہ سمجھتا ہوں کہ جس نے جیتنا ہو وہ جیت سکتے ہیں، اور جس نے ہارنا ہو وہ ہار جاتا ہے، مگر اس میں میں کمنٹ اس لیے نہیں کر سکتا اور آپ کو بھی نہیں کرنا چاہیے، کیونکہ یہ معاملہ عدالت میں ہے۔مخصوص نشستوں کی تشریح سے متعلق سوال کا جواب دیتے ہوئے انہوںنے کہاکہ دیکھیے، ان سے غلطی ہوئی کہ انہوں نے الیکشن جو لڑا وہ کسی اور جماعت سے لڑا،جب پاکستان پیپلز پارٹی پر قدغن لگائی گئی تو قانونی ماہرین کے مشورے پر پاکستان پیپلز پارٹی پارلیمینٹیرین بنائی گئی تو عمران خان کو کوئی درست مشورہ نہیں دیا گیا۔

موجو دہ نظام کی نوعیت کے حوالے سے سوال کے جواب میں یوسف رضا گیلانی نے کہا کہ دراصل اب یہ سیکیورٹی اسٹیٹ ہے، ہماری مشرقی اور مغربی سرحد پر اس وقت بہت زیادہ تناؤ ہے، اور عالمی حالات بھی اتنے سازگار نہیں ہیں، اس لیے اب اداروں پر تنقید کے بجائے مل کر اس صورتحال کا مقابلہ کرنا چاہیے اور جب آپ نے مل کر مقابلہ کیا تو پھر آپ نے نتائج بھی دیکھے۔

وزیردفاع کے بیان کے حوالے سے پوچھے گئے سوال کے جواب میں چیئرمین سینیٹ نے کہا کہ ملک میں کوئی ہائبرڈ سسٹم بالکل نہیں ہے، وہ خواجہ آصف کی ذاتی رائے ہوگی۔فیلڈ مارشل کی امریکی صدر سے ملاقات کے حوالے سے انہوں نے کہا کہ یہ بالکل مختلف صورتحال ہے، ہم حالت جنگ میں ہیں، ابھی ہم نے جنگ بھی لڑی ہے اور فتوحات بھی کی ہیں اور اس میں امیج بھی بڑھا ہے ملٹری کا اور ملٹری لیڈرشپ کا، تو میں سمجھتا ہوں کہ ان حالات میں ہماری بہت عزت افزائی ہوئی ہے کہ انہوں نے فیلڈ مارشل کو اپنے پاس بلایا۔

ایک سوال کے جواب میں انہوںنے کہا کہ پیپلزپارٹی کو تجویز دی ہے کہ حکومت میں شامل ہوں یا الگ ہوکر عوام میں جائیں مگر یہ فیصلہ سینٹرل ایگزیکٹیو کمیٹی ہی کرسکتی ہے۔جنوبی پنجاب صوبے کے حوالے سے یوسف رضا گیلانی نے کہا کہ مسلم لیگ(ن)کو اس میں دلچسپی نہیں ہے، وہ مخالفت کررہی ہے، وہ کبھی نہیں چاہے گی کہ یہ صوبہ بنے، مگر جب تک سرائیکی خطے کا اپنا صوبہ نہیں بنے گا اس وقت تک محرومیاں، محکومیاں، اور پسماندگی رہے گی۔

پاکستان تحریک انصاف کے ساتھ مذاکرات کے سوال پر انہوں نے کہا کہ مذاکرات ہی حل ہے، نیلسن منڈیلا کو بھی آخر میں مذاکرات کرنے پڑے تھے، تو اس لیے میں ان سے یہی گزارش کروں گا کہ آپ ڈائیلاگ کریں، یہ راستہ بند نہ کریں۔پنجاب میں اراکین اسمبلی کی معطلی کے حوالے سے انہوں نے کہا کہ احتجاج ایک حق ہے، مگر احتجاج کے اخلاقی طور پر بھی کچھ اصول ہوتے ہیں۔